ନୂଆଦିଲ୍ଲୀ,୧୦-୧୦: ପିଆଜ ପରେ ଏବେ ଟମୋଟୋ ଦର ଆକାଶ ଛୁଆଁ ହୋଇଛି। ଜାତୀୟ ରାଜଧାନୀ ନୂଆଦିଲ୍ଲୀରେ ଟମାଟୋର କିଲୋ ପ୍ରତି ଦର ବୁଧବାର ୮୦ ଟଙ୍କା ଛୁଇଁଛି। କର୍ନାଟକ ସମେତ ଅନ୍ୟାନ୍ୟ ଉତ୍ପାଦନକାରୀ ରାଜ୍ୟଗୁଡିକରେ ବର୍ଷା ଯୋଗୁ ଯୋଗାଣ ବାଧାପ୍ରାପ୍ତ ହେବାରୁ ଏଭଳି ସ୍ଥିତି ଉପୁଜିଥିବା ଜଣା ପଡିଛି। ମାତ୍ର ଗତ ସପ୍ତାହ ତୁଳନାରେ ପିଆଜ ଦର ସାମାନ୍ୟ ହ୍ରାସ ଘଟି ପ୍ରାୟ ୬୦ ଟଙ୍କା ରହିଛି। ମଦର ଡେରୀର ସଫଳ ଆଉଟଲେଟରେ ଟମାଟୋ କିଲୋ ପ୍ରତି ଦର ୫୮ ଟଙ୍କା ରହିଛି। ମାତ୍ର ସ୍ଥାନୀୟ ଭେଣ୍ଡରମାନେ ଏହାକୁ ୬୦ରୁ ୮୦ ଟଙ୍କାରେ ବିକ୍ରି କରୁଥିବା ଜଣାପଡ଼ିଛି। ଟମାଟୋର ଗୁଣବତ୍ତା ଏବଂ ବିଭିନ୍ନ ସ୍ଥାନ ଆଧାରରେ ଦରରେ କିଛିଟା ଭିନ୍ନତା ଦେଖାଯାଇଛି। କେନ୍ଦ୍ର ସରକାରଙ୍କ ତଥ୍ୟ ମୁତାକବ ଦିଲ୍ଲୀରେ ଟମାଟୋର ହାରାହାରି ରିଟେଲ ଦର ବୁଧବାର ୫୪ଟଙ୍କା ରହିଛି। ଏହା ଅକ୍ଟୋବର ପହିଲାରେ ୪୫ ଟଙ୍କା ରହିଥିଲା। କର୍ନାଟକ, ତେଲେଙ୍ଗାନା ଏବଂ ପାର୍ବତ୍ୟାଞ୍ଚଳରେ ଗତ କିଛି ହେବ ବର୍ଷା ଯୋଗୁ ଫସଲ ଉତ୍ପାଦନ ବାଧାପ୍ରାପ୍ତ ହୋଇଛି। ଦେଶର ମେଟ୍ରୋ ସହର ଗୁଡିକରେ ଟମାଟୋ ଦର ଉଚ୍ଚରେ ରହିଥିବା ଦେଖାଯାଇଛି। କଲିକତାରେ ଏହାର ଦର ୬୦ ଟଙ୍କା ଥିବା ବେଳେ ମୁମ୍ବାଇରେ ୫୪, ଚେନ୍ନାଇରେ ୪୦ ଟଙ୍କା ରହିଥିବା ସରକାରୀ ତଥ୍ୟରୁ ଜଣାଯାଇଛି। ନାଫେଡ, ଏନ୍ସିସିଏଫ୍ ଏବଂ ମଦରଡେରୀ ଭଳି କୋଅପରେଟିଭଗୁଡିକ ପିଆଜ କିଲୋ ପ୍ରତି ବର୍ତ୍ତମାନ ୨୩.୯୦ ଟଙ୍କାରେ ବିକ୍ରି କରୁଛନ୍ତି।
