ନୂଆଦିଲ୍ଲୀ,୨୪ା୨(ପି.ଟି.): ରାଷ୍ଟ୍ରପତି ଟ୍ରମ୍ପ୍ଙ୍କ ଗସ୍ତ ପୂର୍ବରୁ ରାଜଧାନୀ ଦିଲ୍ଲୀରେ ଅଭୂତପୂର୍ବ ସୁରକ୍ଷା ବ୍ୟବସ୍ଥା କରାଯାଇଛି। ଟ୍ରମ୍ପ୍ ଆଗ୍ରାରେ ତାଜମହଲ ପରିଦର୍ଶନ ପରେ ଦିଲ୍ଲୀ ଆସି ସର୍ଦ୍ଦାର ପଟେଲ ମାର୍ଗସ୍ଥିତ ଆଇଟିସି ମୌର୍ଯ୍ୟ ହୋଟେଲରେ ରହିବେ। ତେଣୁ ସେଠାରେ ସିସିଟିଭି ସଂଯୋଗ ସହ ଅଭେଦ୍ୟ ଦୁର୍ଗ ଭଳି ସୁରକ୍ଷା ବନ୍ଦୋବସ୍ତ କରାଯାଇଛି। ସେନା ଓ ଅର୍ଦ୍ଧସାମରିକ ବଳକୁ ଆଇଟିସି ମୌର୍ଯ୍ୟରେ ଆଗୁଆ ମୁତୟନ କରାଯାଇଛି। ଆମେରିକାର ସିକ୍ରେଟ ସର୍ଭିସ୍ ସହିତ ସମନ୍ବୟ ରଖି ଭାରତୀୟ ସୁରକ୍ଷା ସଂସ୍ଥାଗୁଡ଼ିକ କାମ କରୁଛନ୍ତି। କୌଣସି ପ୍ରକାର ଅଘଟଣକୁ ଏଡ଼ାଇବା ପାଇଁ ଏନ୍ଏସ୍ଜିର ଆଣ୍ଟାଇ-ଡ୍ରୋନ୍ ଡିଟେଚ୍ମେଣ୍ଟ, ସ୍ବାଟ୍ କମାଣ୍ଡୋ, କାଇଟ୍ କ୍ୟାଚର୍, ଶାର୍ପ ଶୁଟର ଓ ପରାକ୍ରମ ଭ୍ୟାନ୍ଗୁଡ଼ିକୁ ନିୟୋଜିତ କରାଯାଇଛି।
