କେନ୍ଦୁଝର,୧୪।୮( ସ୍ବ.ପ୍ର.)-ଦିନରେ କଠିନ ପରିଶ୍ରମ ଓ ରାତିରେ ହାତୀ ପାଇଁ ଉଜାଗର । ଏଭଳି କଷ୍ଟ ଯନ୍ତ୍ରଣାରେ ଗରିବ ଚାଷୀ ମାନେ ଦିନ ଓ ରାତି କଟାଉଛନ୍ତି । ହାତୀ ଆକ୍ରମଣରେ ବ୍ୟାପକ କ୍ଷୟକ୍ଷତି ହେବା ସହ ଧନଜୀବନ ହାନି ଘଟୁଥିବାରୁ ଭୟ ଓ ଆତଙ୍କରେ ଲୋକ ମାନେ ରହୁଛନ୍ତି। ଭୟରେ ଲୋକ ମାନେ ରାତି ଉଜାଗର ହୋଇ ଧନଜୀବନର ସୁରକ୍ଷା ପାଇଁ ହାତୀ ମାନଙ୍କୁ ଘଉଡାଇବାକୁ ଲାଗୁଛନ୍ତି। ଏହି ସମୟରେ ଲଗାଣ ବର୍ଷା ଦାଉ ସାଧୁଛି। ଅନେକ ହାତୀ ଉପଦ୍ରରୁ ଜୀବନ ବଞ୍ଚାଇବାପାଇଁ ଘର ଛାଡି ମଞ୍ଚା ଉପରେ ରାତି କାଟୁଛନ୍ତି । ବୟସ୍କ, ଭିନ୍ନକ୍ଷମ, ଶିଶୁ ତଥା ମହିଳା ମାନେ ବେଶୀ ଅସୁବିଧା ଭୋଗୁଛନ୍ତି। ଏଭଳି ଅବସ୍ଥା ଭୋଗୁଛନ୍ତି ସଦର ରେଞ୍ଜ କୁସୁମିତା ଗାଁର ଭୂୟାଁ ଆଦିବାସୀ ଲୋକ। ଆଖପାଖ ଅଞ୍ଚଳରେ କିଛିଦିନ ହେଲା ୩୦ରୁ ଅଧିକ ହାତୀ ରହୁଛନ୍ତି। ଦିନରେ ଜଙ୍ଗଲରେ ରହୁଛନ୍ତି ଓ ରାତିରେ ଜନବସତି ମୁହାଁ ହୋଇ ବ୍ୟାପକ କ୍ଷୟକ୍ଷତି କରୁଛନ୍ତି । କିଛି ଦିନ ମଧ୍ୟରେ ୨୦ରୁ ଅଧିକ ଘର ଭାଙ୍ଗିବା ସହ ବ୍ୟାପକ ଫସଲ ନଷ୍ଟ କରିଛନ୍ତି । ଫଳରେ ଭୟଭୀତ ହୋଇ ଗାଁର କିଛି ଲୋକ ଗଛ ଉପରେ ମଞ୍ଚା କରି ରହୁଛନ୍ତି । ସେହିପରି ଶଙ୍କାରୀ ଗାଁର କିଛି ଲୋକ ସ୍କୁଲ ଛାତ ଉପରେ ପାଲ ଟାଣି ରାତି କାଟୁଛନ୍ତି। କେନ୍ଦୁଝର ଜିଲାରେ ୧୫୦ରୁ ଅଧିକ ହାତୀ ରହୁଥିବା ବେଳେ ଜଙ୍ଗଲ ଓ ପାହାଡ ତଳି ଆଦିବାସୀ ଗ୍ରାମରେ ସମାନ ସମସ୍ୟା ଲାଗି ରହିଛି। ଦୁଇ ମାସ ଭିତରେ ହାତୀ ଆକ୍ରମଣରେ ୪ ଜଣ ପ୍ରାଣ ହରାଇବା ସହ ୫୦ରୁ ଅଧିକ ଘର ଭାଙ୍ଗିଛି। ହାତୀ ଆତଙ୍କରୁ ବର୍ତ୍ତିବା ପାଇଁ ଚମ୍ପୁଆ, ଯୋଡା, ବଡବିଲ, ଘଟଗାଁ ବ୍ଲକରେ ବହୁ ଲୋକ ଗଛ ଉପରେ ମଞ୍ଚ ବାନ୍ଧି ରହୁଛନ୍ତି । ସେପଟେ ହାତୀ ପଲକୁ ଘଉଡାଇବାକୁ ବନ ବିଭାଗର ଉଦ୍ୟମ ଫେଲ ମାରୁଥିବାରୁ ଅସନ୍ତୋଷ ବଢୁଛି। ହାତୀ ମନେ ଦଳ ଦଳ ହୋଇ ବିଭିନ୍ନ ଅଞ୍ଚଳରେ ବୁଲୁଥିବା ରୁ ସେମାନଙ୍କୁ ନିୟନ୍ତ୍ରଣ କରିବା ବନ ବିଭାଗ ପାଇଁ ସହଜ ହେଉନାହିଁ। ବର୍ଷା ଯୋଗୁଁ ହାତୀ ମାନଙ୍କ ଗତିପଥ ନଜର କରିବା ଓ ଘଉଡାଇବା ବନବିଭାଗ ପକ୍ଷେ ସମ୍ଭବ ହେଉନାହିଁ। ଏଣୁ ଏଭଳି ପରିସ୍ଥିତିରେ ଉଭୟ ମଣିଷ ଓ ବନ ବିଭାଗ ଅସହାୟ ହୋଇ ପଡିଥିବା ବେଳେ ଭାଗ୍ୟକୁ ଆଦରି ଲୋକମାନେ ରହିଛନ୍ତି।
