ନୂଆଦିଲ୍ଲୀ,୨୮।୪(ପିଟି): କରୋନା ସଂକ୍ରମିତଙ୍କୁ ଚିହ୍ନଟ କରିବା ଉଦ୍ଦେଶ୍ୟରେ ଚାଇନାର ୨ଟି କମ୍ପାନୀରୁ ଭାରତକୁ ଆସିଥିବା କୋଭିଡ-୧୯ ରାପିଡ ଆଣ୍ଟିବଡି ଟେଷ୍ଟ କିଟ୍କୁ ବ୍ୟବହାର ନ କରିବାକୁ ସମସ୍ତ ରାଜ୍ୟକୁ ଇଣ୍ଡିଆନ କାଉନ୍ସିଲ ଅଫ ମେଡିକାଲ ରିସର୍ଚ୍ଚ(ଆଇସିଏମ୍ଆର) ସୋମବାର ମନା କରିଛି। ଏହିସବୁ କିଟ୍ ତ୍ରୁଟିପୂର୍ଣ୍ଣ ହୋଇଥିବାରୁ ଏହାକୁ ବ୍ୟବହାର ନ କରି ଯୋଗାଣକାରୀ ସଂସ୍ଥାକୁ ଫେରାଇ ଦେବାକୁ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ଶାସନ ସଚିବଙ୍କୁ ଆଇସିଏମ୍ଆର ପକ୍ଷରୁ କୁହାଯାଇଛି। ଚାଇନାର ଗୁଆଞ୍ଝୋ ଓ୍ବଣ୍ଡଫୋ ବାୟୋଟେକ୍ ଏବଂ ଝୁଆଇ ଲିଭ୍ସନ୍ ଡାଇଗ୍ନୋଷ୍ଟିକ୍ସ ଇନ୍ ଫିଲ୍ଡ କଣ୍ଡିଶନ ସଂସ୍ଥାରୁ ଆସିଥିବା କିଟ୍ଗୁଡ଼ିକର ଗୁଣବତ୍ତା ଜାଣିବା ପାଇଁ ଆଇସିଏମ୍ଆର୍ ପକ୍ଷରୁ ପରୀକ୍ଷା କରାଯାଇଥିଲା। ହେଲେ ଏଥିରେ ଭିନ୍ନ ଭିନ୍ନ ରିପୋର୍ଟ ଆସିବାରୁ ଏହା ତ୍ରୁଟିପୂର୍ଣ୍ଣ ବୋଲି ଜଣାପଡ଼ିଛି। ତେଣୁ ଏହି କିଟ୍ଗୁଡ଼ିକୁ ବ୍ୟବହାର ନ କରି ସମ୍ପୃକ୍ତ ଯୋଗାଣକାରୀ ସଂସ୍ଥାକୁ ଫେରାଇଦେବାକୁ ସମସ୍ତ ରାଜ୍ୟକୁ କୁହାଯାଇଛି। କିଟ୍ ଗୁଡ଼ିକର କାର୍ଯ୍ୟକାରିତା ସମ୍ପର୍କରେ ବୈଜ୍ଞାନିକ ମୂଲ୍ୟାୟନ କରାଯାଇ ସମ୍ପୃକ୍ତ ସଂସ୍ଥାକୁ ପ୍ରଥମେ ବରାଦ କରାଯାଇଥିଲା, ହେଲେ ତ୍ରୁଟିପୂର୍ଣ୍ଣ ଜଣାପଡ଼ିବା ପରେ ସମସ୍ତ ବରାଦକୁ ରଦ୍ଦ କରାଯାଇଛି। ଶତପ୍ରତିଶତ ବରାଦ କିଟ୍ ଯୋଗାଣକାରୀ ସଂସ୍ଥା ପଠାଇ ନ ଥିବାରୁ ତାଙ୍କୁ କିଛି ବି ଟଙ୍କା ଦିଆଯାଇ ନାହିଁ। ତେଣୁ କ୍ଷତିର ପ୍ରଶ୍ନ ଉଠୁ ନାହିଁ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
