କଲମ୍ବୋ, ୨୬।୫(ଏଏଫପି)-
ଡ୍ରଗ୍ସ କାରବାର ଅଭିଯୋଗରେ ଶ୍ରୀଲଙ୍କାର ଅନ୍ତର୍ଜାତୀୟ କ୍ରିକେଟର ଶେହାନ ମଦୁଶନକାଙ୍କୁ ପୋଲିସ ଅଟକ ରଖିଛି। ୨୦୧୮ରେ ନିଜର ପ୍ରଥମ ଅନ୍ତର୍ଜାତୀୟ ମ୍ୟାଚରେ ହ୍ୟାଟ୍ରିକ ଅର୍ଜନ କରିଥିବା ୨୫ ବର୍ଷୀୟ ମଦୁଶନକାଙ୍କୁ ୨ ସପ୍ତାହପାଇଁ ପୋଲିସ ହେପାଜତରେ ରଖିବାକୁ ନିର୍ଦ୍ଦେଶ ଦିଆଯାଇଛି। ରବିବାର ପାନ୍ନାଲା ସହରରେ ତାଙ୍କ ନିକଟରୁ ପୋଲିସ ୨ ଗ୍ରାମ୍ରୁ ଅଧିକ ହେରୋଇନ୍ ଜବତ କରିଥିଲା। ଦେଶବ୍ୟାପୀ କରୋନା ଭାଇରସ ଜନିତ କର୍ଫ୍ୟୁ ଥିବାବେଳେ ମଦୁଶନକା ଗାଡ଼ି ଡ୍ରାଇଭିଂ କରୁଥିଲେ, ଫଳରେ ପୋଲିସ ତାଙ୍କୁ ଅଟକାଇଥିଲା। ସେ ଜଣେ ଡାହାଣହାତୀ ପେସ୍ ବୋଲର । ୨୦୧୮ ଜାନୁୟାରୀରେ ବାଂଲାଦେଶ ବିପକ୍ଷ ଏକଦିବସୀୟ ଅନ୍ତର୍ଜାତୀୟ ପଦାର୍ପଣ ମ୍ୟାଚରେ ସେ ହ୍ୟାଟ୍ରିକ ଉଇକେଟ ନେଇଥିଲେ। ସେହିବର୍ଷ ସେ ବାଂଲାଦେଶ ବିପକ୍ଷରେ ୨ଟି ଟି୨୦ ମ୍ୟାଚ ଖେଳିଥିଲେ। ତା’ ପରଠାରୁ ଆହତ ସମସ୍ୟା ଯୋଗୁ ସେ ଆଉ ଅନ୍ତର୍ଜାତୀୟ ମ୍ୟାଚ ଖେଳିପାରି ନ ଥିଲେ।
