ଫିରିଙ୍ଗିଆ, ୨୧ା୮- ସରକାରୀ ସ୍ତରରେ ନିଷ୍ପତ୍ତି ହୋଇଛି କି ପ୍ରାଥମିକ ଶିକ୍ଷାରୁ କେହି ବଞ୍ଚିତ ହେବେ ନାହିଁ। କିନ୍ତୁ ଭିତ୍ତିଭୂମିକୁ ଅଣଦେଖା କରାଯାଉଛି। ପିଲାମାନେ ପଢ଼ିବାକୁ ଇଚ୍ଛା କରୁଥିଲେ ମଧ୍ୟ ବିଦ୍ୟାଳୟର ଭଙ୍ଗା ଶ୍ରେଣୀଗୃହ ଏଥିରେ ଅନ୍ତରାୟ ସାଜୁଛି। ନୂତନ ଶ୍ରେଣୀଗୃହ କାର୍ଯ୍ୟ ବର୍ଷ ବର୍ଷ ଧରି ସରିବାର ନାଁ ଧରୁନି। ଏବେ ବର୍ଷା ଦିନ। ପୁରୁଣା ଶ୍ରେଣୀ ଗୃହ ଆଜବେଷ୍ଟରୁ ପାଣି ଗଳୁଛି। ଉପାୟ ନ ପାଇ ପିଲାମାନେ ବାରଣ୍ଡାରେ ପଢ଼ିବାକୁ ବାଧ୍ୟ ହେଉଛନ୍ତି। ଏଭଳି ଘଟଣା ଫିରିଙ୍ଗିଆ ବ୍ଲକ ଟେଲାପାଲି ସେବାଶ୍ରମରେ ଦେଖିବାକୁ ମିଳିଛି।
ଟେଲାପାଲି ସେବାଶ୍ରମ ୧୯୪୮ ମସିହାରେ ସ୍ଥାପିତ ହୋଇଥିଲା। ଏଠାରେ ପ୍ରଥମରୁ ସପ୍ତମ ପର୍ଯ୍ୟନ୍ତ ଶ୍ରେଣୀ ରହିଛି। ଆବଶ୍ୟକ ଶ୍ରେଣୀ ଗୃହ ନାହିଁ। ଏବେ ୩ ଶ୍ରେଣୀ ଗୃହରେ ପିଲାମାନେ ପାଠ ପଢୁଛନ୍ତି। ଏ ସମସ୍ତ ଘର ଭଙ୍ଗାରୁଜା ଅବସ୍ଥାରେ। ଶ୍ରେଣୀଗୃହ ଅବସ୍ଥାକୁ ଲକ୍ଷ୍ୟ କରି ପ୍ରାୟ ୮ ବର୍ଷ ପୂର୍ବେ ୪ ଶ୍ରେଣୀଗୃହ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। କିନ୍ତୁ ତାହା ଆଜି ପର୍ଯ୍ୟନ୍ତ ସରୁନାହିଁ। ସମ୍ପୃକ୍ତ ଠିକାଦାର ଜଣକ କାମ ଅଧା ପନ୍ତରିଆ କରି ଛାଡିଛନ୍ତି। ସେବାଶ୍ରମରେ ପ୍ରଥମରେ ୧୫, ଦ୍ୱିତୀୟରେ ୧୯, ତୃତୀୟରେ ୧୮, ଚତୁର୍ଥରେ ୧୦, ପଞ୍ଚମରେ ୧୫, ଷଷ୍ଠରେ ୫, ସପ୍ତମରେ ୯ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତୁ। ମୋଟ ୯୧ ପିଲାଙ୍କ ମଧ୍ୟରେ ୪୦ ଜଣ ସେବାଶ୍ରମରେ ରହୁଛନ୍ତି। ସମସ୍ତ ପିଲା ଗୋଟିଏ ଘରେ ଶୋଇବାକୁ ବାଧ୍ୟ ହେଉଛନ୍ତି। କାରଣ ଏହି ପିଲାମାନଙ୍କ ପାଇଁ ଯେଉଁ ହଷ୍ଟେଲ ହୋଇଛି, ସେଠାରେ ପାଣିର ଅସୁବିଧା ଥିବାରୁ ଏଭଳି ସମସ୍ୟା ସୃଷ୍ଟି ହେଉଛି ବୋଲି ପ୍ରଧାନ ଶିକ୍ଷୟିତ୍ରୀ କୁନ୍ତୀ ଦଣ୍ଡସେନା କହିଛନ୍ତି। ବର୍ଷାରେ ଆଜବେଷ୍ଟରୁ ପାଣି ଗଳୁଛି। ଭିତରେ ପାଠ ପଢ଼ାଇ ହେଉନାହିଁ। ବାରଣ୍ଡାରେ ପଢ଼ାଇବାକୁ ବାଧ୍ୟ ହେଉଛୁ। ନୂତନ ଶ୍ରେଣୀ ଗୃହ କାମ ସରୁ ନାହିଁ। ଏ ନେଇ ବିଭାଗୀୟ ଅଧିକାରୀଙ୍କୁ ବାରମ୍ବାର ଜଣାଇଲେ ସୁଦ୍ଧା କିଛି ସୁଫଳ ମିଳୁନାହିଁ। ଏ ସେମ୍ପର୍କରେ ମଙ୍ଗଳ ସମ୍ପ୍ରସାରଣ ଅଧିକାରୀ ରବୀନ୍ଦ୍ର କୁମାର ବେହେରାଙ୍କୁ ପଚାରିବାରୁ ଆମେ ଘଟଣା ନେଇ ଅବଗତ ଅଛୁ। ବିଲଡିଂ କାମ ବନ୍ଦ ଥିଲା। ବର୍ଷା ଦିନ ପରେ କାମ ଆରମ୍ଭ ହେବ ବୋଲି କହିଛନ୍ତି।
