ଆଡିଲେଡ୍,୮।୧- ଆଫଗାନିସ୍ତାନର ଯୁବ ଲେଗ୍ ସ୍ପିନର ରଶିଦ ଖାଁ ଟି୨୦ କ୍ୟାରିୟରରେ ତୃତୀୟ ଥର ପାଇଁ ହ୍ୟାଟ୍ରିକ ଉଇକେଟ ହାସଲ କରିଛନ୍ତି। ଚଳିତ ବିଗ୍ ବାଶ ଲିଗ୍(ବିବିଏଲ)ରେ ସିଡ୍ନୀ ସିକ୍ସର୍ସ ବିପକ୍ଷ ମ୍ୟାଚ୍ରେ ସେ ଏହି ସଫଳତା ପାଇଛନ୍ତି। ଆଡିଲେଡ୍ ଷ୍ଟ୍ରାଇକର୍ସ ପାଇଁ ଖେଳୁଥିବା ରଶିଦ ୧୧ତମ ଓଭର ୫ମ ଓ ୬ଷ୍ଠ ବଲରେ ଜେମ୍ସ ଭିନ୍ସ ଓ ଜ୍ୟାକ ଏଡ୍ଓ୍ବାଡର୍ସଙ୍କୁ ଯଥାକ୍ରମେ କ୍ୟାଚ୍ ଓ ଏଲବିଡବ୍ଲ୍ୟୁ ଆଉଟ୍ କରିଥିଲେ। ୧୩ତମ ଓଭର ପ୍ରଥମ ବଲରେ ଜୋର୍ଡାନ ସିଲ୍କଙ୍କୁ କ୍ଲିନ ବୋଲ୍ଡ କରି ହ୍ୟାଟ୍ରିକ ପୂରଣ କରିଛନ୍ତି। ଏହାସତ୍ତ୍ୱେ ମ୍ୟାଚ୍କୁ ସିକ୍ସର୍ସ ଦଳ ୨ ଉଇକେଟରେ ଜିତି ନେଇଛି। ରଶିଦ ୨୦୧୭ ସିପିଏଲରେ ଜାମାଇକା ଥଲାଇଭାସ ବିପକ୍ଷରେ ହ୍ୟାଟ୍ରିକ ନେଇଥିଲେ। ଗତବର୍ଷ ଆୟର୍ଲାଣ୍ଡ ବିପକ୍ଷରେ ସେ ଅନ୍ତର୍ଜାତୀୟ ଟି୨୦ରେ ୪ ବଲରେ ୪ ଉଇକେଟ ମଧ୍ୟ ହାତେଇଥିଲେ।
