ବାରିପଦା ଅଫିସ,୭ା୩- ବିଦ୍ୟୁତ୍ ବିଭାଗର ବେଫିକର ମନୋଭାବ ଯୋଗୁ ବାରିପଦା ସହରର ବିଭିନ୍ନ ସ୍ଥାନରେ ଧନ ଜୀବନର ସୁରକ୍ଷା ନେଇ ଆଶଙ୍କା ସୃଷ୍ଟି ହୋଇଛି। ମୁଣ୍ଡ ଉପରେ ବିପଦ ସାଜି ଝୁଲି ରହିଛି ବିଦ୍ୟୁତ୍ ତାର। ସେହିପରି ରାସ୍ତା ପାର୍ଶ୍ୱ ଟ୍ରାନ୍ସଫର୍ମର ଗୁଡ଼ିକ ମୁକୁଳା ପଡ଼ିଥିବା ଦେଖିବାକୁ ମିଳିଛି। ଗତ ଫେବୃୟାରୀ ୯ ତାରିଖରେ ଗଞ୍ଜାମ ଜିଲା ଗୋଳନ୍ଥରା ଥାନା ଅଧୀନ ମେଣ୍ଡାରାଜପୁର ଗ୍ରାମରେ ବସ୍ରେ ବିଦ୍ୟୁତ୍ ତାର ଲାଗି ୧୨ ଜଣଙ୍କ ଜୀବନ ଚାଲି ଯାଇଥିଲା। ଏହା ପରେ ମଧ୍ୟ ବାରିପଦା ନେସ୍କୋ ବିଭାଗ ସଚେତନ ହୋଇ ପାରି ନାହିଁ। ମୁକୁଳା ଟ୍ରାନ୍ସଫର୍ମର ଚାରିପଟେ ତାରବାଡ଼ ଦେଇ ଘେରାଉ କରିବା ଏବଂ ଓହଳି ପଡ଼ିଥିବା ତାରକୁ ଉପରକୁ ଉଠାଇବା ପାଇଁ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନାହିଁ। ବିଭାଗର ଏଭଳି ଅବହେଳାକୁ ନେଇ ଜନ ଅସନ୍ତୋଷ ବଢି ଚାଲିଛି। ଭଞ୍ଜପୁର ରେଲୱେ ଷ୍ଟେଶନ ନିକଟରେ ଏକ ମୁକୁଳା ଟ୍ରାନ୍ସପର୍ମର ରହିଛି। ଉକ୍ତ ରାସ୍ତା ଦେଇ ପ୍ରତିଦିନ ବହୁ ଲୋକ ଯାତାୟାତ କରୁଥିବା ବେଳେ କେତେବେଳେ ଯେ ଅଘଟଣ ଘଟିବ ତାହା କୁହାଯାଇ ନ ପାରେ। ସେହିଭଳି ଷ୍ଟେଶନ ବଜାର, ୱାର୍ଡ଼ ନମ୍ବର ୧୬ କମଳା ବାଳିକା ନେହେରୁ ଉଚ୍ଚ ବିଦ୍ୟାଳୟ ନିକଟ, ଓସ୍ତିଆ ଛକ ନିକଟ, ସନ୍ତୋଷୀ ମା’ ମନ୍ଦିର ଭଳି ଅନେକ ସ୍ଥାନରେ ଟ୍ରାନ୍ସଫର୍ମର ମୁକୁଳା ଭାବେ ପଡ଼ି ରହିଛି। ଚିପଟଓସ୍ତିଆ ପୋଲ ଉପରେ ଦୀର୍ଘ ଦିନ ହେଲାଣି ବିଦ୍ୟୁତ ତାର ଝୁଲି ରହିଥିବା ବେଳେ ଅସୁରକ୍ଷିତ ଭାବେ ପ୍ରତିଦିନ ଉକ୍ତ ପୋଲ ଦେଇ ଯାନବାହାନ ଚଳାଚଳ କରୁଛି। ଭଞ୍ଜପୁର ପାୱେଲ ସ୍କୁଲ ପାର୍ଶ୍ୱରେ ଥିବା ରାସ୍ତାରେ ତାର ଝୁଲି ରହିଥିବା ବେଳେ ବିଦ୍ୟୁତ୍ ବିଭାଗର କିନ୍ତୁ ଏହି ଦିଗ ପ୍ରତି ନିଘା ନାହିଁ। ପ୍ରତିଦିନ ସ୍କୁଲକୁ ପିଲାମାନେ ଆସୁଥିବା ବେଳେ ଉକ୍ତ ରାସ୍ତା ଦେଇ ଯାନବାହନ ଚଳାଚଳ କରୁଛି। ଫଳରେ ଅଘଟଣକୁ ସହଜରେ ଏଡ଼ାଇ ଦିଆ ଯାଇ ନ ପାରେ। ବିଦ୍ୟୁତ୍ ବିଲ୍ ବାକି ରଖିଥିବା ଗ୍ରାହକଙ୍କର ବିଦ୍ୟୁତ୍ ସଂଯୋଗ କାଟି ଦିଆଯାଉଥିବା ବେଳେ ମରାମତି ଓ ରକ୍ଷଣାବେକ୍ଷଣ ପ୍ରତି ବିଭାଗ ଦୃଷ୍ଟି ଦେଉ ନାହିଁ। ଅନ୍ୟପଟେ ବିଭିନ୍ନ ସ୍ଥାନରେ ବିଭାଗର କର୍ମଚାରୀମାନେ କାର୍ଯ୍ୟ କଲା ବେଳେ ବିନା ସୁରକ୍ଷା ସରଞ୍ଜାମରେ ଅସୁରକ୍ଷିତ ଭାବେ କାର୍ଯ୍ୟ କରୁଥିବା ଦେଖିବାକୁ ମିଳୁଛି। ଏ ନେଇ ବାରିପଦା ଡିଭିଜିନ ନେସ୍କୋ ଅଧୀକ୍ଷଣ ଯନ୍ତ୍ରୀ କ୍ଷୀରୋଦ ଚନ୍ଦ୍ର ବେହେରାଙ୍କୁ ପଚାରିବାରୁ ବିଭିନ୍ନ ସ୍ଥାନରେ ସର୍ଭେ କରାଯାଇ ଏହିଭଳି ୩୫୦୦ ସ୍ଥାନ ଚିହ୍ନଟ କରାଯାଇଛି। ମୁକୁଳା ପଡ଼ିଥିବା ଟ୍ରାନ୍ସଫର୍ମରକୁ ଘେରାଉ କରାଯିବା ସହି ଝୁଲି ରହିଥିବା ତାରକୁ ଉଠାଯିବ ବୋଲି ସେ ପ୍ରକାଶ କରିଥିଲେ। ସେହିଭଳି ଗତ ୧୬ରୁ ୨୯ ତାରିଖ ଭିତରେ ୨୩୦୦ ଗ୍ରାହକଙ୍କ ବିଦ୍ୟୁତ୍ ସଂଯୋଗ କାଟି ଦିଆଯାଇ ଥିବା ବେଳେ ୨ କୋଟିରୁ ଉର୍ଦ୍ଧ୍ୱ ବକେୟା ଟଙ୍କା ଆଦାୟ ହୋଇଥିବା ସେ ପ୍ରକାଶ କରିଥିଲେ।
