ଧର୍ମଗଡ଼,୨୬।୮(ଡି.ଏନ୍.ଏ.): କଳାହାଣ୍ଡି ଜିଲା କୋକସରାଠାରେ ସୋମବାର ଜେଏମ୍ଏଫ୍ସି କୋର୍ଟ ଉଦ୍ଘାଟିତ ହୋଇଯାଇଛି। ଦୀର୍ଘଦିନର ଦାବି ପୂରଣ ହୋଇଥିବାରୁ ଅଞ୍ଚଳବାସୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ଏହି ଅବସରରେ ମୁଖ୍ୟ ଅତିଥି ଭାବରେ କଳାହାଣ୍ଡି ସେସନ ଜଜ୍ ଶିଶିର କୁମାର ରଥ ଯୋଗଦେଇ କୋର୍ଟ ଉଦ୍ଘାଟନ କରିଛନ୍ତି। ସମ୍ମାନିତ ଅତିଥି ଭାବରେ ଓଡ଼ିଶା ରାଜ୍ୟ ବାର୍ କାଉନ୍ସିଲ ସଦସ୍ୟ ମାନସ କୁମାର ଚାନ୍ଦ ଯୋଗଦେଇ ଜେଏମ୍ଏଫ୍ସି କୋର୍ଟ ଖୋଲିବା ଫଳରେ ଅଞ୍ଚଳରେ ଆଇନକାନୁନ୍ ଓ ଶୃଙ୍ଖଳା ରହିବ ବୋଲି କହିଥିଲେ। କୋକସରା ବାର୍ ଆସୋସିଏଶନ ସଭାପତି ପଞ୍ଚାନନ ବେଶ୍ରାଙ୍କ ସଭାପତିତ୍ୱରେ ସମସ୍ତ କାର୍ଯ୍ୟକ୍ରମକୁ ଆଇନଜୀବୀ ଓ କର୍ମଚାରୀମାନେ ସଂପାଦନା କରିଥିଲେ। ଏହି ଅବସରରେ ପୂର୍ବତନ ବିଧାୟକ ପୁଷ୍ପେନ୍ଦ୍ର ସିଂଦେଓ ଓ ବର୍ତ୍ତମାନର ବିଧାୟକ ମୌଷଧୀ ବାଗ୍ଙ୍କ ସମେତ ଅଞ୍ଚଳର ବୁଦ୍ଧିଜୀବୀ ଓ ସଚେତନ ନାଗରିକମାନେ ଉପସ୍ଥିତ ଥିଲେ।
