ଜୁନାଗଡ,୨୯।୮(ଡି.ଏନ.ଏ.): କଳାହାଣ୍ଡି ଜିଲା ଜୁନାଗଡ ବ୍ଲକ ସଭାଗୃହଠାରେ ଗୁରୁବାର ପଞ୍ଚାୟତ ସମିତି ବୈଠକ ଅନୁଷ୍ଠିତ ହୋଇଥିଲା। ବ୍ଲକ ଅଧ୍ୟକ୍ଷା ନୁର୍ଯ୍ୟ ମାଝିଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଜୁନାଗଡ ବିଡିଓ ଦୁଳାରାମ ମାରାଣ୍ଡି, ବ୍ଲକ ଉପାଧ୍ୟକ୍ଷ ଟଙ୍କଧର ନାଏକ, ଏମ୍ପି ପ୍ରତିନିଧି ମୁକେଶ ଅଗ୍ରୱାଲ, ବିଧାୟକ ପ୍ରତିନିଧି ପ୍ରମୋଦ ବେହେରା, ଜିପିଓ ସିର୍ଦ୍ଦେଶ୍ୱର ମେହେର, ଜିଲା ପରିଷଦ ସଭ୍ୟା ଶର୍ମିଷ୍ଟା ମେହେର, ଯାଜ୍ଞସିନୀ ମହାନନ୍ଦ, ସହକାରୀ ଯନ୍ତ୍ରୀ ଗୋବିନ୍ଦ ବଳ୍ଲଭ ମହାରଣା ପ୍ରମୁଖ ମଞ୍ଚସୀନ ଥିଲେ। ଜୁନାଗଡ ବ୍ଲକ କୁଲହାରୀର ଏକ ସଂୟ ସହାୟକ ଗୋଷ୍ଠୀ ନିମ୍ନମାନର ଛତୁଆ ଯୋଗାଣ କରୁଥିବା ନେଇ ବୈଠକରେ ଅଭିଯୋଗ ହୋଇଥିଲା। ଏହି ସ୍ବଂୟ ସହାୟକ ଗୋଷ୍ଠୀ ଜୁନାଗଡ ବ୍ଲକର ବିଭିନ୍ନ ସେକ୍ଟରରେ ଗତ ୨୦୧୧ରୁ ଛତୁଆ ପ୍ରସ୍ତୁତ ଓ ଯୋଗାଣ ଦାୟିତ୍ୱ କରିଆସୁଛି। ଜୁନାଗଡ ବ୍ଲକରେ ୨୦୧୧ଟି ସଂୟ ସହାୟକ ଗୋଷ୍ଠୀ ରହିଥିବାବେଳେ ସେମାନଙ୍କୁ ସୁଯୋଗ ଦିଆ ନ ଯାଇ ଉପରୋକ୍ତ ସ୍ବଂୟ ସହାୟକ ଗୋଷ୍ଠୀକୁ ଗତ ୮ ବର୍ଷ ଧରି କାହଁିକି ଅନୁକମ୍ପା କରାଯାଉଛି ବୋଲି ବୈଠକରେ କ୍ଷୋଭ ପ୍ରକାଶ ପାଇଥିଲା। ପ୍ରଶାସନ ଏ ଦିଗରେ ଶୀଘ୍ର ଦୃଷ୍ଟି ଦେଇ ଟେଣ୍ଡର ଆହ୍ବାନ କରି ଅନ୍ୟ ସ୍ବଂୟ ସହାୟକ ଗୋଷ୍ଠୀକୁ ସୁଯୋଗ ଦିଆଯାଉ ବୋଲି ଦାବି ହୋଇଥିଲା। ସେହିପରି କାଳିଆ ଯୋଜନାରେ ଯୋଗ୍ୟ ହିତାଧିକାରୀ ଟଙ୍କା ପାଇ ନ ଥିବା ବେଳେ ଅଯୋଗ୍ୟ ହିତାଧିକାରୀ ଟଙ୍କା ହାତେଇଥିବା ନେଇ ବୈଠକରେ ଉଦବେଗ୍ ପ୍ରକାଶ ପାଇଥିଲା। ଏଥିରେ ବ୍ଲକର ସମସ୍ତ ପଞ୍ଚାୟତ ସରପଞ୍ଚ, ସମିତିସଭ୍ୟ ଓ ବିଭିନ୍ନ ବିଭାଗର ଅଧିକାରୀମାନେ ଯୋଗଦେଇଥିଲେ।
