ବାରିପଦା ଅଫିସ, ୧୩ା୫- ବାରିପଦାସ୍ଥିତ ଶ୍ରୀ ଶ୍ରୀ ହରିବଳଦେବଜୀଉଙ୍କ ମନ୍ଦିରର ସେବାୟତମାନେ ମଙ୍ଗଳବାର ଜିଲାପାଳଙ୍କୁ ଭେଟି ୨ ଦଫା ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି। କାର୍ଯ୍ୟରତ ସେବାୟତମାନଙ୍କୁ ମହାମାରୀ କରୋନା ସମୟରେ ଆର୍ଥିକ ସାହାଯ୍ୟ ଓ ମନ୍ଦିରକୁ ନିମ୍ନମାନର ଭୋଗ ଯୋଗାଇ ଦିଆଯାଉଥିବାରୁ ଏହାର ସମାଧାନ ପାଇଁ ଦାବି ସେମାନେ କରିଛନ୍ତି। ସେବାୟତମାନଙ୍କ ସୂଚନା ଅନୁସାରେ ଦେଢ଼ମାସ ହେଲା ମହାମାରୀ କରୋନା ଯୋଗୁଁ ମନ୍ଦିରରେ ଭକ୍ତଙ୍କ ଦର୍ଶନ ବନ୍ଦ ରହିଛି। ବର୍ତ୍ତମାନ ସେବାୟତମାନଙ୍କୁ ଯାହା କିଛି ଅର୍ଥ ମିଳୁଛି ତାହା ସମୁଦ୍ରଙ୍କୁ ଶଙ୍ଖେ। ମହାପ୍ରଭୁଙ୍କ ପ୍ରସାଦ ବର୍ତ୍ତମାନ ବିକ୍ରି ହୋଇପାରୁ ନାହିଁ। ସେହିଭଳି ଭକ୍ତ ନ ଆସିବାରୁ ଦାନ ଦକ୍ଷିଣା କିଛି ବି ମିଳୁ ନାହିଁ। ଫଳରେ ପରିବାର ପ୍ରତିପୋଷଣ କରିବା ପାଇଁ ସେବାୟତମାନଙ୍କ ପକ୍ଷରେ ଅସୁବିଧା ହେଉଛି। ତେଣୁ ସେମାନଙ୍କୁ ଆର୍ଥିକ ସାହଯ୍ୟ ପ୍ରଦାନ ପାଇଁ ଦାବିପତ୍ରରେ ଉଲ୍ଲେଖ କରାଯାଇଛି। ସେହିଭଳି ମହାପ୍ରଭୁଙ୍କ ପ୍ରସାଦ ଲାଗି ଅତ୍ୟନ୍ତ ନିମ୍ନମାନର ରୋଷେଇ ଓ ଭୋଗ ସାମଗ୍ରୀ ଆସୁଛି। ଏ ନେଇ କର୍ତ୍ତୃପକ୍ଷଙ୍କୁ ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁନି ବୋଲି ସେବାୟତମାନେ ଅଭିଯୋଗ କରିଛନ୍ତି। ଏହି ଦାବି ପୂରଣ ନ ହେଲେ ସେବାୟତମାନଙ୍କ ପରିବାର ଅନିର୍ଦ୍ଦିଷ୍ଟ କାଳ ପାଇଁ ଉପବାସ ବ୍ରତ କରିବେ ବୋଲି ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି। ମନ୍ଦିର ପୂଜକ କାମେଶ୍ୱର ତ୍ରିପାଠୀ, ଅରୁଣ କୁମାର ମିଶ୍ର, ଅସିତ କୁମାର ମିଶ୍ରଙ୍କ ସମେତ ଏକାଧିକ ସେବାୟତ ଓ ତାଙ୍କ ପରିବାରବର୍ଗ ଜିଲାପାଳଙ୍କୁ ଦାବିପତ୍ର ପ୍ରଦାନ ବେଳେ ଉପସ୍ଥିତ ଥିଲେ।
