ଆରଡ଼ି,୧୦।୨ (ଡି.ଏନ.ଏ.)-ଜବରଦଖଲକାରୀଙ୍କ କବଳରେ ସରକାରୀ ଜମି। କାର୍ଯ୍ୟାନୁଷ୍ଠାନ ପାଇଁ ୨୦୧୪ରୁ ଗ୍ରାମବାସୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଜବରଦଖଲ ଉଚ୍ଛେଦ ଲାଗି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। କିନ୍ତୁ ତହସିଲ କାର୍ଯ୍ୟାଳୟର ଉଦାସୀନତା ପାଇଁ ତାହା କାର୍ଯ୍ୟକାରୀ ହୋଇପାରୁନି ବୋଲି ଅଭିଯୋଗ କରି ପୁନଃ ଗ୍ରାମବାସୀ ଉଚ୍ଚ ନ୍ୟାୟାଳୟ ଦ୍ୱାରସ୍ଥ ହୋଇଛନ୍ତି। ଏଭଳି ଅଭିଯୋଗ ହୋଇଛି ଭଦ୍ରକ ଜିଲା ଚାନ୍ଦବାଲି ବ୍ଲକ ଓଳଗ ପଞ୍ଚାୟତ ଅଧୀନ ଷାଠିବାଙ୍କୁଡ଼ା ଗାଁରେ।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ଏହି ଗାଁରେ ରକ୍ଷିତ, ଗୋଚର, ଆବାଦିଯୋଗ୍ୟ ଅନାବାଦୀ, ପାଣିନାଳ ଆଦି ବିଭିନ୍ନ କିସମର ସରକାରୀ ଜମି ରହିଛି। ଗ୍ରାମରେ ଥିବା ତଫସିଲଭୁକ୍ତ ଜାତି, ଗ୍ରୀନକାର୍ଡଧାରୀ ଓ ଅନ୍ୟ ସରକାରୀ କର୍ମଚାରୀଙ୍କୁ ନିୟମାନୁସାରେ ସରକାରୀ ଜମି ଯୋଗାଇ ଦିଆଯାଇଛି। ହେଲେ ଗାଁର ୪୦ରୁ ଅଧିକ ପରିବାର ପ୍ରଥମେ ବାଡ଼ ବୁଜି ସରକାରୀ ଜାଗା ଅକ୍ତିଆର କରିଥିଲେ। ଯେଉଁ ଜାଗା ଖେଳପଡ଼ିଆ ଓ ଚାରଣ ଭୂମି ରୂପେ ପୂର୍ବରୁ ବ୍ୟବହୃତ ହେଉଥିଲା, ସେଠାରେ କେତେକ ବ୍ୟକ୍ତି ବାଉଁଶରେ ତିଆରି ଅସ୍ଥାୟୀ ଘର, ବ୍ୟବସାୟ ପ୍ରତିଷ୍ଠାନ, ପକ୍କାଘର ଏପରିକି ପାଇଖାନା ନିର୍ମାଣ କରିଛନ୍ତି। ଏହାକୁ ବିରୋଧ କରି ଗ୍ରାମବାସୀ ୨୦୧୩ରେ ଚାନ୍ଦବାଲି ତହସିଲ ଓ ଜିଲା ପ୍ରଶାସନକୁ ଅବଗତ କରିଥିଲେ। କୌଣସି କାର୍ଯ୍ୟାନୁଷ୍ଠାନ ନିଆ ନ ଯିବାରୁ ସେମାନେ ୨୦୧୪ରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ୨୦୧୬ରେ ଜବରଦଖଲକାରୀଙ୍କ ବିରୋଧରେ ଆଉ ଏକ ଜନସ୍ବାର୍ଥ ମାମଲା ହାଇକୋର୍ଟରେ ଦାଏର କରାଯାଇଥିଲା। ୨୦୧୭ ନଭେମ୍ବର ୭ରେ ହାଇକୋର୍ଟ ୬ ମାସ ମଧ୍ୟରେ ଜବରଦଖଲକାରୀଙ୍କୁ ହଟାଇବା ସହ କାର୍ଯ୍ୟାନୁଷ୍ଠାନ ନେବାକୁ ଜିଲାପାଳଙ୍କୁ ନିର୍ଦ୍ଦେଶ ଦେଇଥିଲେ। ଜିଲାପାଳ ଚାନ୍ଦବାଲି ତହସିଲଦାରଙ୍କୁ ସେହି ଜମିର ବର୍ତ୍ତମାନର ସ୍ଥିତି ପରଖି ରିପୋର୍ଟ ପ୍ରଦାନ କରିବାକୁ ନିର୍ଦ୍ଦେଶ ଦେଇଥିଲେ। ତହସିଲ କାର୍ଯ୍ୟାଳୟ ପକ୍ଷରୁ ମଧ୍ୟ ତଦନ୍ତ କରାଯାଇଥିଲା। ଏହାମଧ୍ୟରେ ଦୁଇବର୍ଷ ବିତିଯାଇଥିଲେ ମଧ୍ୟ ଜବରଦଖଲ ଉଚ୍ଛେଦ ହୋଇପାରି ନାହିଁ। ଫଳରେ ଜବରଦଖଲକାରୀ ଅଧିକ ସକ୍ରିୟ ହୋଇ ଆହୁରି ସରକାରୀ ଜମି ଅକ୍ତିଆର କରିବାରେ ଲାଗିଛନ୍ତି। ମୋ ସରକାରରେ ରାଜସ୍ବ ବିଭାଗ ଅନ୍ତର୍ଭୁକ୍ତ ହେବାକୁ ଯାଉଥିବାରୁ ଷାଠିବାଙ୍କୁଡ଼ା ଗ୍ରାମବାସୀ ସେଠାରେ ଅଭିଯୋଗ କରିବେ ବୋଲି କହିଛନ୍ତି। ଏ ସମ୍ପର୍କରେ ଆରଡ଼ି ରାଜସ୍ବ ନିରୀକ୍ଷକ ଦେବାଶିଷ ରାୟଙ୍କୁ ପଚାରିବାରୁ କହିଛନ୍ତି, ୪୧ ଜବରଦଖଲକାରୀଙ୍କ ମଧ୍ୟରୁ ପ୍ରାୟ ଓହରି ଆସିଲେଣି। ନିକଟରେ ଅମିନ ଡାକି ଅନ୍ୟମାନଙ୍କୁ ଜବରଦଖଲରୁ ହଟାଯିବାକୁ ତହସିଲ ପକ୍ଷରୁ ଯୋଜନା ଚାଲିଛି। ଖୁବ୍ଶୀଘ୍ର ତାହା କାର୍ଯ୍ୟକାରୀ ହେବ ବୋଲି ସେ କହିଛନ୍ତି।
