ଲାଠୋର, ୨୦ା୮(ଡି.ଏନ୍.ଏ.):
ଉଭଏ କେନ୍ଦ୍ର ଆର ରାଏଜ୍ ସରକାର ନିଅଁାସି ଗରିବ୍ ଦୁଖିକୁ ପକାଘର ଯୁଗେଇ ଦେଉଛନ୍। ହେଲେ ସର୍ଭେରେ ଭୁଲଭଟକା, ତଦାରଖ ଅଭାବୁ ଅନେକ ହକ୍ଦାର ଗରିବ୍ ହିତାଧିକାରୀ ସରକାରକଁର ଇ ମହତ୍ ଯୋଜନାରୁ ବାଦ୍ ପଡ଼ୁଛନ୍। ଏନ୍ତା ଗୁଟେ ଘଟନା ଦେଖ୍ବାକେ ମିଲିଛେ ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ପଁଚେତ୍ ଅଧୀନ ଗୁଦାମପଡ଼ାରେ।
ସୂଚନା ଅନ୍ସାରେ ଗୁଦାମପଡ଼ାର ବିଧବା ମହିଲା ଫୁଲତୁଲି ସୁନା(୨୬)। ପରିବାର କହେଲେ ପୁଓ ପ୍ରିତମ(୫) ଆର ଝି’ ପ୍ରୀତି(୩)କେ ନେଇ ତାକର ସଁସାର। ଆପ୍ନେ ହେମସାଗର ସୁନା ୨୦୧୮ରେ ରୋଗ୍ରେ ପଡ଼ି ଆରପାରକେ ଚାଲିଯାଇଛନ୍। ପରିବାରଟା ନିହାତି ଗରିବ୍ ହେଇଥିଲାବେଲେ ଗୁଟେ ଭଂଗା ଦଦ୍ରା ମାଏଟ୍ ଖପର ଘରେ ରହୁଛନ୍। ହେମସାଗର ଦାଦନ୍ ଖଟି କୁଟୁମ ପୁଷୁଥିଲେ। ୨୦୧୮ରେ ହେମସାଗର ଗୁଟୁମବସିଆ ଆନ୍ଧ୍ରପ୍ରଦେଶର କାରିମନଗରକେ ଦାଦନ୍ ଖଟି ଯାଇଥିଲେ। ସେଠାନେ ସେ ଟ୍ରାକ୍ଟର ଡ୍ରାଇଭର ହିସାବେ କାମ୍ କରୁଥିଲେ। ସେ ଯାହା କମଉଥିଲେ ସେଥ୍ରେ ପରିବାରଟା ଦୁଖେସୁଖେ ଚଲି ଯାଉଥିଲେ। ହେଲେ ଦିନେ ତାକର ବେଟ୍ ବଥାବାର ସଂଗେ ଜର ଆର ଝାଡ଼ା ହେଇଥିଲା। ଏନ୍ତାଥି ମାଏକିନା ଫୁଲତୁଲି ମାଲିକ୍ ସଂଗେ ଯୋଗାଯୋଗ କରି ହେମସାଗରକୁଁ ଚିକିଛା ଲାଗି ଡାକ୍ତରଖାନା ନେଇଥିଲେ। ସେଠାନେ ଚିକିଛା ଆରମ୍ ହେଲା ଉତାରୁ ତାକର ଝାଡ଼ା ପରିସ୍ରା ବଁଦ୍ ହେଇ ପେଟ୍ ଫୁଲି ଯାଇଥିଲା ଆର ଫେବୃୟାରୀ ୨, ୨୦୧୮ରେ ତାକର ମୁର୍ତୁ ହେଇଥିଲା। ଏନ୍ତାଥି ମାଲିକ ଶବ୍ ସଂଗେ ପରିବାର ଲୁକ୍କୁ ନିଜର ଗଁା ଲାଠୋରକେ ପଠେଇ ଦେଇଥିଲେ। ହେମସାଗରକଁର ହଠାତ୍ ମୁର୍ତୁରେ ପରିବାରଟା ବେସାହାରା ହେଇଗଲେ। ସରକାରୀ ସାହାଯ୍ କହେଲେ ଫୁଲତୁଲି ପାଉଥିବାର ୫ଶହ ଟଁକା ବିଧବା ଭତା ଆର ୫ କେ.ଜି. ଚାଉଲ ସାହାଭରସା। ହେଲେ ତିନ୍ ଝନିଅଁା କୁଟୁମ୍କେ ଇ ସରକାରୀ ସାହାଯ୍ ନିଅଁଟ୍ ହେଉଛେ। ଇଆଡ଼େ ତିନ୍ହିଁ ମାଇପିଲା ଆଶ୍ରେ ନେଇଥିବାର ଘରର ଆଗ୍ଫାଲ ଆର ପଛ୍ ଫାଲର କଁାଥି ଝରି ବରଷାରେ ଭାଂଗି ଯାଇଛେ। କେତେ ବେଲେ ଇ ଘରଟା ମାଟିରେ ମିଶିଯିବା କିଛି କହି ନାଇଁ ହେବାର। ଏନ୍ତା ଅବସ୍ତାରେ ବି ତିନ୍ହିଁ ମାଇପିଲା ଉପେ ଶୂଇନ୍ ହେଇ ଜୀବନ୍କେ ପାଏନ୍ ଛଡ଼େଇ ଇ ଭଂଗା ଦଦ୍ରା ଘରେ ରହୁଛନ୍। ଇଆଡ଼େ ପରିବାର କେନ୍ଥେଇ ଚଲବା, ଦୁଇ ଛୁଆକର ଭବିଷତ୍ କେନ୍ଥେଇ ଗଢ଼ବେ, ଘର ବଖ୍ରେ କେନ୍ଥେଇ ତିଆରବେ ସେ ଚିନ୍ତାରେ ଫୁଲତୁଲି ହରମେଶା ଘାରି ହେଉଛନ୍। ଇ ଦୁଖି ଗରିବ୍ ପରିବାର ଉପରେ ଜିଲା ପରଶାସନ ଦୁରୁଷ୍ଟି ଦେଇ ନିୟମ ହିସାବେ ସରକାରୀ ସାହାଯ୍ ଯୁଗେଇ ଦେବାକେ ପଡ଼ାବାସୀ ଦାବି କରିଛନ୍।
