ମୁମ୍ବାଇ,୮।୬: କରୋନା ପାଇଁ ଦେଶର ଅର୍ଥବ୍ୟବସ୍ଥା ଚାପରେ ରହିଛି। ଚଳିତ ଆର୍ଥତ୍କ ବର୍ଷରେ ବ୍ୟାଙ୍କଗୁଡିକର ମୋଟ ଅନାଦାୟ ଋଣ (ଏନ୍ପିଏ) ସମସ୍ୟା ଚିନ୍ତାକୁ ବଢାଇବ ବୋଲି ଆକଳନରେ କୁହାଯାଇଛି। ଏହି ସମୟରେ ଏନ୍ପିଏ ୧୧.୩ରୁ ୧୧.୬%କୁ ବଢିବା ନେଇ ଆଶଙ୍କା କରାଯାଇଛି। ୨୦୨୦ ମାର୍ଚ୍ଚ ସୁଦ୍ଧା ଏହା ୮.୬% ରହିଥିଲା। ରେଟିଂ ଏଜେନ୍ସି ଇକ୍ରା ପକ୍ଷରୁ ଜାରି ଏକ ରିପୋର୍ଟରେ କୁହାଯାଇଛି ଯେ, ୨୦୨୦-୨୧ରେ ପ୍ରଦାନ କରାଯାଉଥିବା ଅଗ୍ରୀମର ୫ରୁ ୫.୫% ଚାପଗ୍ରସ୍ତ ହେବ ବୋଲି କୁହାଯାଇଛି। ଫଳରେ ଏହା ବ୍ୟାଙ୍କଗୁଡିକର ଋଣ ଯୋଗାଣ ଏବଂ ଆୟ କ୍ଷେତ୍ରରେ ପ୍ରଭାବ ପକାଇବାର ଆଶଙ୍କା ରହିଛି। ଋଣ ଯୋଗାଣ ଅଭିବୃଦ୍ଧି ଆଖିଦୃଶିଆ ହେଉ ନ ଥିବାରୁ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ୪୫,୦୦୦ ରୁ ୮୨,୫୦୦ କୋଟି ଟଙ୍କାର ପୁଞ୍ଜି ଆବଶ୍ୟକ କରିପାରନ୍ତି ବୋଲି ଏହି ରିପୋର୍ଟରେ କୁହାଯାଇଛି। ବର୍ତ୍ତମାନ ରିଜର୍ଭ ବ୍ୟାଙ୍କ ଅଗଷ୍ଟ ମାସ ଯାଏ ମୋରାଟୋରିୟମ ସୁବିଧା ଦେଇଛି। ଆସେଟ କ୍ୟାଲିଟିରେ ଚାପ ଚଳିତ ଆର୍ଥତ୍କ ବର୍ଷର ତୃତୀୟ ଏବଂ ଚତୁର୍ଥ ତ୍ରୈମାସରେ ଦେଖାଯିବ ବୋଲି ଇକ୍ରାର ଫାଇନାନ୍ସିଆଲ ସେକ୍ଟର ରେଟିଂ ମୁଖ୍ୟ ଅନୀଲ ଗୁପ୍ତା କହିଛନ୍ତି। ଏହି ସମୟରେ ଘରୋଇ ବ୍ୟାଙ୍କଗୁଡିକର ଆୟରେ ମଧ୍ୟ ପରିବର୍ତ୍ତନ ଦେଖାଯିବ। ବ୍ୟାଙ୍କଗୁଡିକର ଋଣ ଅଭିବୃଦ୍ଧି ୬ରୁ୭% ରହିପାରେ। ରାଷ୍ଟ୍ରାୟତ୍ତ ବ୍ୟାଙ୍କ କ୍ଷେତ୍ରରେ ଏହା ୩.୫ରୁ ୪.୩% ଏବଂ ଘରୋଇ ବ୍ୟାଙ୍କ କ୍ଷେତ୍ରରେ ୭ରୁ ୯% ରହିବା ନେଇ ଆକଳନ କରାଯାଇଛି।
