କେନ୍ଦୁଝର, ୨୫ା୬ (ସ୍ବ.ପ୍ର.)-ବଣପାହାଡ ଘେରା କେନ୍ଦୁଝର ଜିଲାରେ ଅନେକ ବନବାସୀ ଆଜି ବି ଜଙ୍ଗଲଜାତ ଦ୍ରବ୍ୟ ଉପରେ ନିର୍ଭର କରି ଚଳୁଛନ୍ତି। ସେମାନେ ବିଭିନ୍ନ ଋତୁକାଳୀନ ଫଳ ସଂଗ୍ରହ କରି ହାଟବଜାରରେ ବିକି ତେଲଲୁଣ କିଣିଥାନ୍ତି। ଆମ୍ବ ଅମଳ ଋତୁରେ ସେମାନେ ସଂଗ୍ରହ କରୁଥିବା କଞ୍ଚା, ପାଚିଲା ଆମ୍ବକୁ ବିକ୍ରି କରିବା ସହ ବଳକା ଆମ୍ବରୁ ଆମ୍ବୁଲ, ଆମ୍ବଶଢା ଓ ଆଚାର ଆଦି ପ୍ରସ୍ତୁତ କରି ବିକିଥାନ୍ତି। ଜିଲା ଓ ଜିଲା ବାହାରେ ଏସବୁର ଚାହିଦା ଥିଲେ ମଧ୍ୟ ବଜାର ସୁବିଧା ଅଭାବରୁ ସେମାନେ ଏହାକୁ କମ୍ ଦରରେ ବେପାରୀଙ୍କୁ ବିକି କ୍ଷତି ସହୁଛନ୍ତି। ଆମ୍ବ ଭଳି ବିଭିନ୍ନ ଜଙ୍ଗଲଜାତ ଦ୍ରବ୍ୟର ସଂରକ୍ଷଣ ଓ ପ୍ରକ୍ରିୟାକରଣ ବ୍ୟବସ୍ଥା କରାଗଲେ ଆଦିବାସୀଙ୍କ ଆର୍ଥିକ ବିକାଶ ସମ୍ଭବ ହୋଇ ପାରନ୍ତା ବୋଲି ଅଞ୍ଚଳବାସୀ ଦାବି କରୁଛନ୍ତି। କିନ୍ତୁ ସରକାର ଓ ପ୍ରଶାସନ ପକ୍ଷରୁ ଏହାକୁ ଅଣଦେଖା କରି ଚାଲିଛନ୍ତି।
କେନ୍ଦୁଝର ଜିଲାର ବଣଜଙ୍ଗଲରେ ବହୁ ସଂଖ୍ୟାରେ ଆମ୍ବ ଗଛ ରହିଛି ା ବର୍ତ୍ତମାନ ବନବାସୀମାନେ ଜଙ୍ଗଲରୁ କଞ୍ଚା ପାଚିଲା ଆମ୍ବ ସଂଗ୍ରହ କରି ହାଟବଜାରକୁ ଆଣି ବିକ୍ରି କରୁଥିବା ଦେଖାଯାଉଛି। ବିଗତ କିଛି ବର୍ଷ ଧରି ଜିଲାରେ କଲମୀ ଆମ୍ବ ଚାଷର ପ୍ରସାର ପରେ ଦେଶୀ ଖଟାମିଠା ଆମ୍ବର ଚାହିଦା କ୍ରମେ କମି କମି ଚାଲିଛି। ବନବାସୀମାନେ ଆମ୍ବ ବିକି ପୂର୍ବଭଳି ଆଉ ଅର୍ଥ ଉପାର୍ଜନ କରିପାରୁ ନାହାନ୍ତି। ଏଭଳି ସ୍ଥିତିରେ ବଳକା କଞ୍ଚା, ପାଚିଲା ଆମ୍ବରୁ ପାରମ୍ପରିକ ଶୈଳୀରେ ଆମ୍ବୁଲ, ଆମ୍ବଶଢା ଆଦି ଖାଦ୍ୟ ସାମଗ୍ରୀ ପ୍ରସ୍ତୁତ କରି ବିକ୍ରି କରୁଛନ୍ତି। ପାଚିଲା ଆମ୍ବରୁ ରସ ବାହାର କରି ତାହାକୁ ଖରାରେ ଶୁଖାଇ ଆମ୍ବଶଢା ପ୍ରସ୍ତୁତ କରାଯାଇଥାଏ। ଏହାର ଭଲ ଚାହିଦା ଥିଲେ ମଧ୍ୟ ସରକାରୀ ପ୍ରୋତ୍ସାହନ ଓ ବଜାର ସୁବିଧା ଅଭାବରୁ ବନବାସୀମାନେ ଏହାର ବ୍ୟବସାୟକୁ ଆଗେଇ ନେଇପାରୁ ନାହାନ୍ତି। ବର୍ତ୍ତମାନ ନାମୀଦାମୀ କମ୍ପାନୀ ଖାଦ୍ୟ ପ୍ରକ୍ରିୟାକରଣ ପଦ୍ଧତିରେ ଆମ୍ବଶଢା ପ୍ରସ୍ତୁତ କରି ସୁନ୍ଦର ଭାବେ ଏହାକୁ ପ୍ୟାକେଟ କରି ବଜାରରେ ବିକି ଲାଭବାନ ହେଉଛନ୍ତି। ବନବାସୀମାନେ ପାରମ୍ପରିକ ଭାବେ ପ୍ରସ୍ତୁତ କରୁଥିବା ଆମ୍ବସଢାରୁ ସେଭଳି ଲାଭ କରିପାରୁ ନାହାନ୍ତି। ଖାଦ୍ୟ ପ୍ରକ୍ରିୟାକରଣ ସମ୍ପର୍କରେ ବନବାସୀଙ୍କୁ ତାଲିମ ଦେବା ବ୍ୟବସ୍ଥା କରାଗଲେ ସେମାନଙ୍କ ଅର୍ଥନୈତିକ ଅଭିବୃଦ୍ଧି ଘଟିପାରନ୍ତା ବୋଲି ପରିବେଶବିତ ହରେକୃଷ୍ଣ ମହାନ୍ତ କହିଛନ୍ତି। ଏ ସମ୍ପର୍କରେ ଓରମାସ କାର୍ଯ୍ୟନିର୍ବାହୀ ଅଧିକାରୀ ସପନ ଗୋସ୍ବାମୀଙ୍କୁ ପଚାରିବାରୁ ଉଦ୍ୟାନ ବିଭାଗ ସହାୟତାରେ ଆମ୍ବଶଢା ବ୍ୟବସାୟକୁ ଅଧିକ ବ୍ୟାପକ କରିବାକୁ ଚେଷ୍ଟା କରାଯାଉଛି ବୋଲି କହିଛନ୍ତି।
