ଚର୍ଚ୍ଚାରେ ପରଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର: ମୃତଦେହ ବ୍ୟବଚ୍ଛେଦ କଲେ ଆୟୁଷ ଡାକ୍ତର
7:35 amSeptember 25, 2019 / 21

ପରଜଙ୍ଗ, ୨୫।୯(ଡି.ଏନ.ଏ.)-ଢେଙ୍କାନାଳ ଜିଲା ପରଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଜଣେ ଆୟୁଷ ଡାକ୍ତର ମୃତଦେହ ବ୍ୟବଚ୍ଛେଦ (ପୋଷ୍ଟମର୍ଟମ) କରିଛନ୍ତି। ଏମ୍‌ବିବିଏସ୍‌ ଡାକ୍ତର ହିଁ ଶବ ବ୍ୟବଚ୍ଛେଦ କରିପାରିବେ ଏବଂ ଏହାର ରିପୋର୍ଟ ମଧ୍ୟ ସେ ହିଁ ପ୍ରସ୍ତୁତ କରିବେ ବୋଲି ନିୟମ ରହିଛି। ହେଲେ ଏମ୍‌ବିବିଏସ୍‌ ଡାକ୍ତରଙ୍କ ଅନୁପସ୍ଥିତିରେ ଏହି କାର୍ଯ୍ୟ କରାଯାଇଥିବାବେଳେ ଏବେ କିଏ ଏବଂ କେମିତି ବ୍ୟବଚ୍ଛେଦ ରିପୋର୍ଟ ପ୍ରଦାନ କରିବେ ତାହାକୁ ନେଇ ସୃଷ୍ଟି ହୋଇଛ ପ୍ରଶ୍ନବାଚୀ।
ପାଣିଗେଙ୍ଗୁଟିଆ ଗ୍ରାମର ଜଣେ ଛାତ୍ରୀ ରବିବାର ପାଣିରେ ବୁଡ଼ିଯାଇ ପ୍ରାଣ ହରାଇଥିଲେ। ଅଗ୍ନିଶମ ବିଭାଗ କର୍ମଚାରୀ ତାଙ୍କୁ ଉଦ୍ଧାର କରି ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଉକ୍ତ ସମୟରେ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡା. ସ୍ଥିତପ୍ରଜ୍ଞ ମହାନ୍ତି ଅନୁପସ୍ଥିତ ଥିଲେ। ତେଣୁ ଛାତ୍ରୀଙ୍କୁ ମୃତ ଘୋଷଣା କରିବାକୁ ନେଇ ଅଡ଼ୁଆ ବଢ଼ିଥିଲା। କାରଣ କୌଣସି ବ୍ୟକ୍ତିଙ୍କୁ ମୃତ ଘୋଷଣା କରିବା ଆୟୁଷ ଡାକ୍ତରଙ୍କ କାର୍ଯ୍ୟ ପରିସର ବାହାରେ। ତେଣୁ ସ୍ବାସ୍ଥ୍ୟକେନ୍ଦ୍ରରେ ଉପସ୍ଥିତ ଆୟୁଷ ଡାକ୍ତର ରଞ୍ଜନା ଗଡ଼ନାୟକ ଏହି କାର୍ଯ୍ୟ କରିବାକୁ ମନା କରିଥିଲେ। ହେଲେ ଏମ୍‌ବିବିଏସ୍‌ ଡାକ୍ତର ଅନୁପସ୍ଥିତ ଥିବାରୁ ପରେ ସେ ଛାତ୍ରୀଙ୍କୁ ମୃତ ଘୋଷଣା ସହ ବ୍ୟବଚ୍ଛେଦ ମଧ୍ୟ କରିଥିଲେ।
ଏ ନେଇ ପୂର୍ବତନ ଜିଲା ପରିଷଦ ସଭ୍ୟ ନିରାକାର ପ୍ରଧାନ କୁହନ୍ତି, ପାଣିରେ ବୁଡ଼ିଯାଇ କେହି ପ୍ରାଣ ହରାଇଲେ ୪ଲକ୍ଷ ଟଙ୍କା ସରକାରୀ ସହାୟତା ଦେବାକୁ ବ୍ୟବସ୍ଥା ରହିଛି। ଏଥିଲାଗି ବ୍ୟବଚ୍ଛେଦ ରିପୋର୍ଟ ବେଶ୍‌ ଗୁରୁତ୍ୱ ରଖେ। ହେଲେ ଆୟୁଷ ଡାକ୍ତର ବ୍ୟବଚ୍ଛେଦ କରିବା ଏବଂ ଏହାର ରିପୋର୍ଟ ଅନୁପସ୍ଥିତ ଥିବା ଏମ୍‌ବିବିଏସ୍‌ ଡାକ୍ତର କିପରି ଦେବେ ତାହାକୁ ନେଇ କଳ୍ପନାଜଳ୍ପନା ଦେଖାଦେଇଛି। ଏ ନେଇ ସେ ଜିଲା ସ୍ବାସ୍ଥ୍ୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରିବେ। ଆବଶ୍ୟକ ପଡ଼ିଲେ ଅନଶନରେ ବସିବେ ବୋଲି କହିଛନ୍ତି।
ଡାକ୍ତର ରଞ୍ଜନା ନିଜର ମତାମତରେ କୁହନ୍ତି, ସ୍ବାସ୍ଥ୍ୟକେନ୍ଦ୍ର ଅଧିକାରୀ ଅନୁପସ୍ଥିତ ଥିଲେ। ତାଙ୍କ ନିର୍ଦ୍ଦେଶକ୍ରମେ ସେ ଶବ ବ୍ୟବଚ୍ଛେଦ କରିଥିଲେ। ହେଲେ ଅଥରାଇଜ ନ ଥିବାରୁ ରିପୋର୍ଟ ଦେବା ତାଙ୍କ ପକ୍ଷେ ସମ୍ଭବ ନୁହେଁ ବୋଲି ସେ କହିଛନ୍ତି। ଏ ନେଇ ସ୍ବାସ୍ଥ୍ୟକେନ୍ଦ୍ର ଅଧିକାରୀ କୁହନ୍ତି, ଆୟୁଷ ଡାକ୍ତର ମୃତଦେହ ଦେଖି ଭୟ କରୁଛନ୍ତି। ରବିବାର ଅନ୍ୟ କେହି ଡାକ୍ତର ନ ଥିବାର ଛାତ୍ରୀଙ୍କ ବ୍ୟବଚ୍ଛେଦ କରିବାକୁ ଡାକ୍ତର ରଞ୍ଜନା ଗଡ଼ନାୟକଙ୍କୁ ସେ ନିର୍ଦ୍ଦେଶ ଦେଇଥିଲେ। ହେଲେ ରିପୋର୍ଟ ଦେବା ତାଙ୍କ ଅଧିକାର ନାହିଁ। ତାଙ୍କଠାରୁ ପଚାରି ବୁଝି ବ୍ୟବଚ୍ଛେଦ ରିପୋର୍ଟ ଦିଆଯିବ। ଏଥିରେ କୌଣସି ସମସ୍ୟା ହେବନାହିଁ।