ବାଲେଶ୍ୱର ଅଫିସ, ୩୦।୫-ବାଲେଶ୍ୱର ଜିଲା ତଥା ସହରରେ ଥିବା ଘରୋଇ କୋଚିଂ ସେଣ୍ଟର ଓ ଟ୍ୟୁଟୋରିଆଲଗୁଡ଼ିକ ଦୀର୍ଘଦିନ ଧରି ବନ୍ଦ ଥିବା କାରଣରୁ ଛାତ୍ରୀଛାତ୍ରଙ୍କର ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷା ପାଇଁ ଶିକ୍ଷା ପ୍ରଦାନରେ ବ୍ୟାଘାତ ସୃଷ୍ଟି ହେବା ସହିତ ଉକ୍ତ ସଂସ୍ଥାଗୁଡ଼ିକରେ କାର୍ଯ୍ୟ କରୁଥିବା କର୍ମଚାରୀ, ଶିକ୍ଷୟିତ୍ରୀ, ଶିକ୍ଷକଙ୍କ ଆର୍ଥିକ ଦୁର୍ଦ୍ଦଶା ମଧ୍ୟରେ ଗତି କରୁଛନ୍ତି। ଏହି ସଙ୍କଟରୁ ଉଦ୍ଧାର ପାଇଁ ଘରୋଇ କୋଚିଂ ଓ ଟ୍ୟୁଟୋରିଆଲ ସେଣ୍ଟର ମାଲିକମାନେ ଶୁକ୍ରବାର ପୂର୍ବାହ୍ନରେ ଏକଜୁଟ୍ ହୋଇ ସେଣ୍ଟରଗୁଡ଼ିକୁ ଖୋଲିବା ପାଇଁ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କଠାରେ ଲିଖିତ ଆବେଦନ କରିଛନ୍ତି।
କରୋନା ମହାମାରୀ ପାଇଁ ଘରୋଇ କୋଚିଂ ସେଣ୍ଟରଗୁଡ଼ିକ ଦୀର୍ଘଦିନ ହେଲା ବନ୍ଦ ରହିଛି। ଫଳରେ ଶତାଧିକ ଛାତ୍ରୀଛାତ୍ରଙ୍କ ପାଠପଢ଼ା ବ୍ୟାହତ ହେବା ସହ ଅନୁଷ୍ଠାନଗୁଡ଼ିକ ମଧ୍ୟ ଆର୍ଥିକ କ୍ଷତି ସହୁଛନ୍ତି। ଅନ୍ଲାଇନ୍ ପାଠ୍ୟ କାର୍ଯ୍ୟକ୍ରମରେ ଛାତ୍ରୀଛାତ୍ରମାନେ ସମ୍ପୂର୍ଣ୍ଣ ଉପକୃତ ହୋଇପାରୁ ନ ଥିବାବେଳେ ଏହା ଏକ ପ୍ରହସନ ପାଲଟିଛି। ଅନେକ ଦିନ ଧରି ବନ୍ଦ ଯୋଗୁ ଅନୁଷ୍ଠାନ ପାଇଁ ନିଆଯାଇଥିବା ଘରଭଡ଼ା ଓ ଶିକ୍ଷକମାନଙ୍କ ମାସିକ ବେତନ ବୋଝ ଉପରେ ଲଳିତା ବିଡ଼ା ସାଜିଛି। ଅନୁଷ୍ଠାନ ଉପରେ ନିର୍ଭର କରି ଚଳୁଥିବା ମାଲିକ ଓ କର୍ମଚାରୀମାନେ ଆର୍ଥିକ ସଙ୍କଟରେ ଗତି କରି ପରିବାର ଚଳାଇବାରେ ଅସମର୍ଥ ହୋଇପଡ଼ିଲେଣି। ସରକାରଙ୍କ ସମସ୍ତ ନିର୍ଦ୍ଦେଶନାମା ପାଳନ ତଥା ସାମାଜିକ ଦୂରତା ରକ୍ଷା କରି ଅନୁଷ୍ଠାନଗୁଡ଼ିକୁ ଖୋଲିବା ପାଇଁ ସର୍ତ୍ତମୂଳକ ଅନୁମତି ପ୍ରଦାନ କରିବା ପାଇଁ ଜିଲା ପ୍ରଶାସନ ନିକଟରେ ଦାବି କରିଛନ୍ତି। ଦାବିପତ୍ର ପ୍ରଦାନ ବେଳେ ସୁଶାନ୍ତ ମହାନ୍ତି, ଓମ୍ପ୍ରକାଶ ମହାପାତ୍ର, ଜଗନ୍ନାଥ ସାସମଲ, ଦିଲୀପ ଦାସମହାପାତ୍ର, ଶୈଳେନ୍ଦ୍ର ମିଶ୍ର, କ୍ଷୀତିଶ କୁମାର ମଣ୍ଡଳ ପ୍ରମୁଖ ସାମିଲ ଥିଲେ।
