ଭୁବନେଶ୍ୱର, ୧୧ା୪(ବ୍ୟୁରୋ): କରୋନା କଟକଣା ପାଇଁ ସମଗ୍ର ଦେଶରେ ପୂଜାପାଠ, ପର୍ବପର୍ବାଣି ସବୁକିଛି ପ୍ରଭାବିତ ହୋଇଥିବାବେଳେ ମନ୍ଦିରରୁ ଆରମ୍ଭକରି ଚର୍ଚ୍ଚ ଓ ମସ୍ଜିଦ୍ ସବୁଠି ତାଲା ଝୁଲୁଛି। ଭୁବନେଶ୍ୱରର ୟୁନିୟନ୍ ଚର୍ଚ୍ଚ ସମେତ ରାଜ୍ୟର ଅନ୍ୟ ସମସ୍ତ ଚର୍ଚ୍ଚ ବନ୍ଦ ରହିଥିବାବେଳେ ପୂଜାପାଠକୁ ମଧ୍ୟ ବନ୍ଦ ରଖାଯାଇଛି। ତେଣୁ ଚଳିତ ବର୍ଷ ଖ୍ରୀଷ୍ଟିଆନ ଧର୍ମାବଲମ୍ବୀଙ୍କ ବଡ଼ପର୍ବ ଗୁଡ୍ ଫ୍ରାଇଡେ ଚର୍ଚ୍ଚରେ ପାଳନ ହୋଇପାରିନି। ଶୁଭ ଶୁକ୍ରବାର ଭାବେ ପରିଚିତ ଏହିଦିନରେ ଖ୍ରୀଷ୍ଟିଆନମାନେ ବିଭିନ୍ନ ଚର୍ଚ୍ଚରେ ଏକାଠି ହୋଇ ବାଇବେଲ୍ ପାଠ କରିବା ସହ ପରସ୍ପରକୁ ପବିତ୍ର ଦିନର ଶୁଭେଚ୍ଛା ଜଣାଇଥାନ୍ତି। ସାମୂହିକ ପ୍ରାର୍ଥନା ମାଧ୍ୟମରେ ପ୍ରଭୁ ଯିଶୁଖ୍ରୀଷ୍ଟଙ୍କୁ ସ୍ମରଣ କରିଥାନ୍ତି। ହେଲେ ଲକ୍ଡାଉନ୍ ଯୋଗୁ ସମସ୍ତ ଚର୍ଚ୍ଚ ବନ୍ଦ ଥିବାରୁ ଘର ଭିତରେ ପରିବାର ସଦସ୍ୟଙ୍କ ସହିତ ଗୁଡ୍ ଫ୍ରାଇଡେ’ ପାଳନ କରି ଲୋକେ ଏହି ମହାନ ଦିବସକୁ ସ୍ମରଣ କରିଛନ୍ତି। ତେଣୁ ଲୋକେ ସାମାଜିକ ଦୂରତ୍ୱକୁ ଗୁରୁତ୍ୱ ଦେଇ ସୋସିଆଲ ମିଡ଼ିଆରେ ପରସ୍ପରକୁ ଏହି ଦିନର ଶୁଭେଚ୍ଛା ଜଣାଇଛନ୍ତି। ମଣିଷ ସମାଜର ଉଦ୍ଧାର ପାଇଁ ପ୍ରଭୁ ଯିଶୁଖ୍ରୀଷ୍ଟଙ୍କ ତ୍ୟାଗ, ବଳିଦାନକୁ ସ୍ମରଣ କରି ତାଙ୍କ ୭ଟି ବାଣୀକୁ ମାର୍ଗଦର୍ଶକ ଭାବେ ଗ୍ରହଣ କରିଛନ୍ତି। କରୋନା କବଳରୁ ସମଗ୍ର ବିଶ୍ୱକୁ ମୁକ୍ତ କରିବାକୁ ପ୍ରାର୍ଥନା କରିଛନ୍ତି। ଏହାସହ କରୋନା ଯୁଦ୍ଧରେ ଯୋଦ୍ଧାଭାବେ ଆଗଧାଡ଼ିରେ ଲଢୁଥିବା ସ୍ବାସ୍ଥ୍ୟକର୍ମୀ, ପୋଲିସ କର୍ମଚାରୀଙ୍କୁ ଧନ୍ୟବାଦ ଜଣାଇବା ସହ ତାଙ୍କ ମଙ୍ଗଳ କାମନା କରିଛନ୍ତି ଖ୍ରୀଷ୍ଟ ଧର୍ମାବଲମ୍ବୀ।
