ଶଙ୍କରାଖୋଲ,୨୯ା୮ (ଡି.ଏନ୍.ଏ)-ଚକାପାଦ ଥାନା ପସରା ନିକଟରେ କଡ଼ିକାଡୁ ଘାଟିର ପାଣିପକା ବୁଲାଣିଆ ରାସ୍ତାରେ ବୁଧବାର ଦିନ ଗୋରୁ ପଲଙ୍କ ଉପରେ ବାଲି ବୋଝେଇ ଡମ୍ପର ମାଡିଯିବାରୁ ୫ ଗାଈ ବଳଦ ମୃତ ହୋଇଥିବା ବେଳେ ୧୫ରୁ ଅଧିକ ଗୋରୁ ଗାଈ ଆହତ ହୋଇଛନ୍ତି। ଏ ନେଇ ଚକାପାଦ ଥାନାରେ ୪୭/୧୯ରେ ମାମଲା ରୁଜୁ ହୋଇ ଡମ୍ପର ଚାଳକ ବିଧାନ ଗୌଡଙ୍କୁ ଗିରଫ କରିଥିବା ଥାନାଧିକାରୀ ତରୁଣ ତପନ ବେହେରା କହିଛନ୍ତି। ପ୍ରକାଶ ଅନୁଯାୟୀ ଟିକାବାଲିରୁ ମୁଣ୍ଡାଗାଁକୁ ବାଲି ବୋଝେଇ ଡମ୍ପର ଓଡି୦୨ଏ-୩୬୦୧ ଯାଉଥିବା ବେଳେ ଟିକାବାଲି-ଚକାପାଦ ରାସ୍ତାର ପସରା ନିକଟ ପାଣିପକା ବୁଲାଣିଆ ରାସ୍ତାରେ ଭାରସାମ୍ୟ ହରାଇ ବିପରୀତ ଦିଗରୁ ଗାଈଗୋରୁ ଗୋଠ ଆସୁଥିବା ସମୟରେ ମାଡିଯାଇଥିଲା। ଫଳରେ ଘଟଣାସ୍ଥଳରେ ୫ଗାଈଗୋରୁ ମୃତ୍ୟୁବରଣ ହୋଇଥିବା ବେଳେ ୧୫ରୁ ଅଧିକ ଗାଈଗୋରୁ ଆହତ ହୋଇଛନ୍ତି। କ୍ଷତିଗ୍ରସ୍ତ ହୋଇଥିବା ଗାଈଗୋରୁଙ୍କର ମାଲିକମାନେ ହେଲେ ପସରା ଗ୍ରାମର ଅରୁଣ ବିଷୋୟୀ, ଗଣ୍ଡା ମଲିକ, ପ୍ରାଞ୍ଜଳୀ ସାହୁ, ଖଗେଶ୍ୱର ନାୟକ ଓ ପଦ୍ମ ଚରଣ ବିଷୋୟୀଙ୍କର ଜଣାଯାଇଛି। ମୃତ ଗାଈଗୋରୁ ପସରା ପ୍ରାଣୀଧର କେନ୍ଦ୍ରର ଡାକ୍ତର ବିଭି ବିଜୟ କୁମାର ସାହୁ ଓ ସତ୍ୟ ନାରାୟଣ ପାଢୀ ଶବ ବ୍ୟବଚ୍ଛେଦ କରିଥିଲେ।
