ସିରମୋର,୧୩।୫: ଦମ୍ପତିଙ୍କ ପାଇଁ ବିବାହ ବାର୍ଷିକୀର ସ୍ବତନ୍ତ୍ର ମହତ୍ତ୍ୱ ରହିଥାଏ। ଏହାକୁ ପାଳନ କରିବାଲାଗି ସଭିଏଁ ପ୍ରୟାସ ମଧ୍ୟ କରିଥାନ୍ତି। ତେବେ ୫ ଭାଇଙ୍କ ବିବାହ ବାର୍ଷିକୀ ଗୋଟିଏ ଦିନରେ ପାଳିତ ହେବା ଶୁଣିଲେ ଯେ କେହି ଆଶ୍ଚର୍ଯ୍ୟ ହେବା ସ୍ବାଭାବିକ। କିନ୍ତୁ ଏହା ସତ। ହିମାଚଳପ୍ରଦେଶର ସିରମୋର ଜିଲାର ଗିରିପାରର ଆଞ୍ଜ୍ଭୋଜ୍ ଅଞ୍ଚଳର ନଘେତା ଗାଁରେ ବାସ କରୁଥିବା ୫ ଭାଇ ପ୍ରତିବର୍ଷ ମେ ୧୨ରେ ସେମାନଙ୍କ ବିବାହ ବାର୍ଷିକୀ ପାଳନ କରିଥାନ୍ତି। ଏହି ଦିନ ଘରେ ଏକ ବଡ଼ ଉତ୍ସବ ହୋଇଥାଏ। ୧୯୯୮ ମେ ୧୨ରେ ଘରର ଦୁଇ ବଡ଼ ପୁଅ ସୁରେଶ ଶର୍ମା ଏବଂ ଦିନେଶ ଶର୍ମାଙ୍କ ବିବାହ ଯଥାକ୍ରମେ ମିଥଲେଶ ଏବଂ ରୀତାଙ୍କ ସହିତ ହୋଇଥିଲା। ଏହାପରେ ୨୦୦୯ ମେ ୧୨ରେ ରାଜୁ ଶର୍ମା ଏବଂ ସୁଦେଶ ଶର୍ମାଙ୍କ ବିବାହ ତାରା ଏବଂ ପ୍ରମିଳାଙ୍କ ସହିତ ହୋଇଥିଲା। ସେହିପରି ୨୦୧୮ ମେ ୧୨ରେ ସୁଭାଷ ଶର୍ମାଙ୍କ ବିବାହ ଶ୍ୟାମାଙ୍କ ସହିତ ହୋଇଥିଲା। ପରିବାରର ୫ ଭାଇ ଗୋଟିଏ ଘରେ ବାସ କରୁଛନ୍ତି। ବୋହୂମାନେ ଗୋଟିଏ ରୋଷେଇ ଘରେ ରନ୍ଧାବଢ଼ା କରିଥାନ୍ତି। ଏହି ସଂଯୁକ୍ତ ପରିବାର ସ୍ଥାନୀୟ ଅଞ୍ଚଳରେ ଏକ ଉଦାହରଣ ସୃଷ୍ଟି କରିଥିବା ଲୋକେ କୁହନ୍ତି।
