ଦିଗପହଣ୍ଡି,୭ା୩(ଡି.ଏନ.ଏ.)
ଦିଗପହଣ୍ଡି ଥାନା ଅଧୀନ ମହୁଡ଼ା ଗ୍ରାମ ନିକଟରେ ଜଣେ ଇଟାଭାଟି ସୁପରଭାଇଜରଙ୍କୁ ଦୁର୍ବୃତ୍ତମାନେ ଗୁଳି କରି ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଛି। ବ୍ରହ୍ମପୁର ଟାଉନ ଥାନା ବିଜିପୁର ଲକ୍ଷ୍ମୀ ସାହିର ଇଟାଭାଟି ସୁପରଭାଇଜର ସାଗର ପାତ୍ରଙ୍କ ଏତଲା କ୍ରମେ ଶୁକ୍ରବାର ଦିଗପହଣ୍ଡି ଆଇଆଇସି ବସନ୍ତ କୁମାର ସେଠୀ ନଂ.୪୫/୨୦ରେ ମାମଲା ରୁଜୁ କରି ତଦନ୍ତ ଚଳାଇଛନ୍ତି। ପୋଲିସ ଘଟଣାସ୍ଥଳରୁ ଖୋକା ଜବତ କରିଛି।
ପ୍ରକାଶ ଯେ, ଗତ ଗୁରୁବାର ସାଗର ସନ୍ତୋଷ ବେହେରାଙ୍କ ଇଟାଭାଟିରେ କାମ କରୁଥିବାବେଳେ ୨ ଜଣ ଦୁର୍ବୃତ୍ତ ଏକ ବାଇକ୍ରେ ଆସି ସାଗର କିଏ ବୋଲି ପଚାରିଥିଲେ। ସେଠାରେ ଉପସ୍ଥିତ ଥିବା ସାଗର ନିଜର ପରିଚୟ ଦେବା ପରେ ସେମାନେ ଇଟା କିଣିବେ ବୋଲି କହିଥିଲେ। ଭାଟିରେ ଇଟା ଷ୍ଟକ ନ ଥିବାରୁ ନୂଆଇଟା ବାହାରିଲେ ବିକ୍ରି କରାଯିବ ବୋଲି ସାଗର କହିଥିଲେ। ଯୁବକ ଦ୍ୱୟ ସେଠାରୁ ଫେରି ଯାଇଥିଲେ। ପ୍ରାୟ ୫ ମିନିଟ ପରେ ପୁଣି ସେମାନେ ଆସି ଇଟାଭାଟି କର୍ମଚାରୀଙ୍କ ଦ୍ୱାରା ସାଗରଙ୍କୁ ଡକାଇଥିଲେ। ସାଗର ପହଞ୍ଚିବାପରେ ଜଣେ ଯୁବକ ତାଙ୍କୁ ଫୋନ ଦେଇ ଦାଦାଙ୍କ ସଙ୍ଗେ କଥା ହେବାକୁ ବାଧ୍ୟ କରିଥିଲେ। ସାଗର ମନା କରି ଇଟାଭାଟି ଅଫିସକୁ ଯିବା ସମୟରେ ଜଣେ ଦୁର୍ବୃତ୍ତ ତାଙ୍କ ଉପରକୁ ଗୁଳି ମାଡକରି ଚମ୍ପଟ ମାରିଥିଲେ। ସାଗର ଅଳ୍ପକେ ବର୍ତ୍ତିଯାଇଥିବା ଏତଲାରେ ଉଲ୍ଲେଖ ରହିଛି। ପୂର୍ବରୁ ଜଣେ ପେଶାଦାର ଅପରାଧୀ ଓ ତାଙ୍କ ଭାଇ ସହ ସାଗରର ଶତ୍ରୁତା ଥିଲା। ସେମାନଙ୍କ ମଧ୍ୟରୁ ଜଣେ ବର୍ତ୍ତମାନ ବ୍ରହ୍ମପୁର ଜେଲରେ ବିଚାରାଧୀନ ବନ୍ଦୀ ଥିବା ନେଇ ପୋଲିସକୁ ସୂଚନା ମିଳିଛି। ଦାଦା ବଟିକୁ କେନ୍ଦ୍ରକରି ସାଗରଙ୍କୁ ହତ୍ୟା ଉଦ୍ୟମ କରାଯାଇପାରେ ବୋଲି ପୋଲିସ ସନ୍ଦେହ କରୁଛି। ଅନ୍ୟପକ୍ଷରେ କିଛି ଯୁବକ ପୂର୍ବରୁ ଧାର ସୂତ୍ରରେ ତାଙ୍କୁ ଇଟା ମାଗିଥିଲେ। ଷ୍ଟକ ନାହିଁ, ଭାଟିରୁ ନୂଆଇଟା ବାହାରିଲେ ସେ ଦେଖିବା କହିଥିଲେ। ଏନେଇ ଆକ୍ରମଣ ଆଶଙ୍କାକୁ ଏଡାଇ ଦିଆଯାଇ ନ ପାରେ ବୋଲି ପ୍ରାରମ୍ଭିକ ତଦନ୍ତରୁ ଜଣାପଡିଥିବା ଆଇଆଇସି କହିଛନ୍ତି।
