ମୁମ୍ବାଇ, ୧୩ା୫: ମହାମାରୀ କରୋନା ଭାଇରସ୍ ଯୋଗୁ ଦେଶବ୍ୟାପୀ ଲକ୍ଡାଉନ୍ ଜାରି ରହିଛି। ଏହା ମଧ୍ୟରେ ମହାରାଷ୍ଟ୍ର ସରକାର ମଦ୍ୟପଙ୍କ ଲାଗି ମଦ ହୋମ୍ ଡେଲିଭରି କରିବା ପଦକ୍ଷେପ ଗ୍ରହଣ କରୁଛନ୍ତି। ଘରପାଖ ରିଟେଲ ଶପ୍ରୁ ଅନ୍ଲାଇନ୍ରେ ଯେକେହି ମଦ ମଗାଇ ପାରିବେ। ବର୍ତ୍ତମାନ ଫୋନ୍ ଦ୍ୱାରା ଏହାକୁ ଅର୍ଡର କରାଯାଇ ପାରିବ ବୋଲି ସରକାର କହିଛନ୍ତି। ମଦ ଅର୍ଡର କରିବାର ଦୁଇଦିନ ମଧ୍ୟରେ ଏହା ଗ୍ରାହକଙ୍କ ଘରେ ପହଞ୍ଚିବ। କାରଣ ଡେଲିଭରି ବୟ, ପ୍ରସ୍ତୁତି ସହ ଯୋଗାଇବା ଲାଗି କିଛି ସମୟ ଲାଗିବ ବୋଲି ଅବକାରୀ ବିଭାଗର ଜଣେ ଅଧିକାରୀ ପ୍ରକାଶ କରିଛନ୍ତି।
ମଙ୍ଗଳବାରଠାରୁ ରାଜ୍ୟ ଅବକାରୀ ବିଭାଗ ବିଭିନ୍ନ ଲାଇସେନ୍ସପ୍ରାପ୍ତ ମଦ ଦୋକାନଗୁଡ଼ିକୁ ଖୋଲିବା ସହ ଲୋକଙ୍କ ଅର୍ଡର ରଖିବା ଲାଗି ନିର୍ଦ୍ଦେଶ ଦେଇଛନ୍ତି। ଗ୍ରାହକଙ୍କ ନାମ ଓ ଠିକଣା ରଖି ଏସବୁକୁ ହୋମ୍ ଡେଲିଭରି କରିବାର ବ୍ୟବସ୍ଥା କରିବାକୁ ପରାମର୍ଶ ଦିଆଯାଇଛି। ବିଭାଗ ପକ୍ଷରୁ ଇ-ଟୋକନ ସିଷ୍ଟମ ଲାଗୁକରିବାକୁ ନିର୍ଦ୍ଦେଶ ଦିଆଯାଇଛି। ମୁମ୍ବାଇ, ପୁଣେ, ନାସିକ ଆଦି ସହରର ହୋଲ୍ସେଲରମାନେ ଫୋନ୍ ଓ ଆପ୍ ମାଧ୍ୟମରେ ଅର୍ଡର ରଖି ନିର୍ଦ୍ଧାରିତ ସମୟରେ ମଦର ହୋମ୍ ଡେଲିଭରୀ କରିବାକୁ କୁହାଯାଇଛି। ସନ୍ଧ୍ୟା ୬ଟାରେ ସମସ୍ତ ମଦ ଦୋକାନ ବନ୍ଦ ରଖିବା ଓ ବିନା ଲାଇସେନ୍ସଯୁକ୍ତ ଦୋକାନ ଏହି କାରବାର ନ କରିବାକୁ ନିର୍ଦ୍ଦେଶ ରହିଛି। ହୋମ୍ ଡେଲିଭରି କରୁଥିବା ବୟ ମୁହଁରେ ମାସ୍କ ପିନ୍ଧିବା, ହ୍ୟାଣ୍ଡ୍ ସାନିଟାଇଜର ବାରମ୍ବାର ବ୍ୟବହାର କରିବା ଓ ସାମାଜିକ ଦୂରତ୍ୱ ରକ୍ଷାକରିବା ଉପରେ ଗୁରୁତ୍ୱ ଦେବାକୁ ପରାମର୍ଶ ଦିଆଯାଇଛି। ଏହି ବୟ ମେଡିକାଲରୁ ଡାକ୍ତରଙ୍କ ଦ୍ୱାରା ସ୍ବୀକୃତ ଫିଟ୍ନେସ୍ ସାର୍ଟିଫିକେଟ ପାଇଥିବା ଜରୁରୀ। ମଦ ଦୋକାନ ମାଲିକ ଏସବୁର ଦାୟିତ୍ୱ ଗ୍ରହଣ କରି ବିଭିନ୍ନ ସ୍ଥିତିର ସମୀକ୍ଷା କରିବେ ବୋଲି କୁହାଯାଇଛି। ସରକାରଙ୍କ ଏଭଳି ନିଷ୍ପତ୍ତିକୁ ଆସୋସିଏସନ ଅଫ୍ ପ୍ରୋଗ୍ରେସିଭ୍ ଲିକର ଭେଣ୍ଡର୍ସ ପକ୍ଷରୁ ସ୍ବାଗତ କରାଯାଇଛି।
