ନାଟକ ଆରମ୍ଭରୁ ସେ ଗୀତ ଗାଇ ଦର୍ଶକଙ୍କ ମନକୁ ଝୁମେଇ ଦିଅନ୍ତି। ପୁଣି ନାଟକରେ କମେଡ଼ି କରି ଦର୍ଶକମାନଙ୍କୁ ହସେଇ ହସେଇ ବେଦମ୍ କରିଦିଅନ୍ତି। ଉଭୟ ଗୀତ ଆଉ ଅଭିନୟର ଯୁଗଳବନ୍ଦୀରେ ଯାତ୍ରାଜଗତରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଥିବା ଗାୟିକା-ଅଭିନେତ୍ରୀ ଜଣକ ହେଉଛନ୍ତି ଝରଣା ଘୋଷ ଓରଫ୍ ବେବିନା। ତେବେ ଯାତ୍ରାଜଗତରେ ତାଙ୍କୁ ଝରଣା ବୋଲି ଖୁବ୍ କମ୍ ଲୋକ ଜାଣିଥିବା ବେଳେ ସେ ସମସ୍ତଙ୍କ ନିକଟରେ ବେବିନା ଭାବରେ ପରିଚିତ। ଭଦ୍ରକର ଧାମରାରେ ଅଙ୍ଗଦ ଘୋଷ ଏବଂ କଳ୍ପନା ଘୋଷଙ୍କ କୋଳରେ ଜନ୍ମଗ୍ରହଣ କରିଥିଲେ ବେବିନା। ପିଲାବେଳେ ସୁନ୍ଦର ଗୀତ ଗାଉଥିଲେ। ସ୍କୁଲରେ ତାଙ୍କ ଗୀତ ଶୁଣି ସମସ୍ତେ ଚକିତ ହୋଇଯାଉଥିଲେ। ସେତିକି ନୁହେଁ ସେ ସ୍କୁଲ ଡ୍ରାମାରେ ମଧ୍ୟ ଚମତ୍କାର ଅଭିନୟ କରୁଥିଲେ। ଯେଉଁଠି ଯାତ୍ରା ପଡୁଥିଲା ସେଠାକୁ ଧାଇଁ ଯାଉଥିଲେ ଯାତ୍ରା ଦେଖିବା ପାଇଁ। ପିଲାଟି ବେଳୁ ତାଙ୍କ ଭିତରେ ଯାତ୍ରା ପ୍ରତି ଆଗ୍ରହ ଗଢ଼ି ଉଠିଥିଲା। ସେ ଚାହୁଁଥିଲେ ଯାତ୍ରାପାର୍ଟିରେ ଯୋଗଦେବାକୁ। ମାତ୍ର ଯେତେ ଚେଷ୍ଟା କଲେ ବି ସୁଯୋଗ ମିଳୁ ନ ଥିଲା। ତୁଳସୀ ଗଣନାଟ୍ୟର ଜଣେ କର୍ମଚାରୀ ବାପିବାବୁଙ୍କ ସହିତ ତାଙ୍କର ପରିଚୟ ଥିଲା। ସେ ହିଁ ତାଙ୍କୁ ତୁଳସୀକୁ ନେଇଆସିଲେ। ପ୍ରଥମେ ତ ବାପାମା’ କାହାରି ଇଚ୍ଛା ନ ଥିଲା ଝିଅକୁ ଯାତ୍ରାରେ ଛାଡ଼ିବା ପାଇଁ। ମାତ୍ର ବେବିନାଙ୍କ ଜିଦ୍ ନିକଟରେ ସମସ୍ତେ ହାର ମାନିଲେ। ତୁଳସୀରେ ଯୋଗଦେଲେ ବେବିନା। ପ୍ରଥମେ ସେ ମେଲୋଡି ଗାଇଲେ। ତେବେ ତାଙ୍କ ଭିତରେ ଯେ ଅଭିନୟ ଦକ୍ଷତା ରହିଛି ସେକଥା ବେଶିଦିନ ଅଛପା ରହିଲାନାହିଁ। ସେଥିଲାଗି ତାଙ୍କୁ ଛୋଟମୋଟ ଅଭିନୟ କରିବାର ସୁଯୋଗ ମିଳିଲା। ଫୁଲହାର ହେଲା ଫାଶୀ ଦଉଡ଼ି, ମୁଁ ନୁହେଁ ଅର୍ଦ୍ଧାଙ୍ଗିନୀ, ଗୋଟିଏ ନାରୀର କୋଟିଏ କାହାଣୀ ଆଦି ନାଟକରେ ଅଭିନୟ କରି ସେ ମଞ୍ଚ ଉପରକୁ ଆସିଲେ। ଚାରିବର୍ଷ ରହିଲେ ତୁଳସୀ ଗଣନାଟ୍ୟରେ। ତୁଳସୀରୁ ଆସି ଯୋଗଦେଲେ ଯାତ୍ରାଶ୍ରୀ ବିଶ୍ୱଦରବାରରେ। ବିଳମ୍ବରେ ବିଶ୍ୱଦରବାରକୁ ଆସିଥିବାରୁ ତାଙ୍କୁ ଅଭିନୟର ସୁଯୋଗ ମିଳି ନ ଥିଲା। ଚଳିତବର୍ଷ ସେ ଆସି ଯୋଗ ଦେଇଛନ୍ତି ‘ମାୟାନଗରୀ’ ଯାତ୍ରାନୁଷ୍ଠାନରେ। ଗୀତ ତ ଗାଉଛନ୍ତି। ତା’ ସହିତ ତାଙ୍କୁ ମିଳିଛି ତିନିଗୋଟି ନାଟକରେ କମେଡ଼ି କରିବାର ସୁଯୋଗ। ସେହି ନାଟକ ତିନୋଟି ହେଉଛି ‘ଦେଲେ ଧରା କଥା ସରେ’, ଧନ ପାଖେ ମନ ବନ୍ଧାପଡ଼ିଛି’ ଏବଂ ନିଜେ ନିଜର ରାମାୟଣ’। ସ୍ବାମୀ ବିଭୂତି ଭୂଷଣ ଦାସ ଏବଂ ଶ୍ୱଶୁର ବିଜନ ଦାସ ତଥା ଶାଶୁଙ୍କ ପ୍ରେରଣା ତାଙ୍କୁ ଅଭିନୟ ତଥା ସଙ୍ଗୀତର ରାସ୍ତାରେ ଆଗକୁ ଆଗେଇ ନେଉଛି ବୋଲି କହନ୍ତି ଏହି ଗାୟିକା ତଥା ଅଭିନେତ୍ରୀ।
