ରାୟଗଡା ଅଫିସ୍, ୧୭।୫: ରାୟଗଡା ସହରର ରୟତ କଲୋନୀରେ ୧୩ଟି ଲେନ ରହିଛି। ୧୩ଟି ଲେନ ମଧ୍ୟରୁ ପ୍ରଥମ, ଦ୍ୱିତୀୟ, ତୃତୀୟ ଓ ଚତୁର୍ଥ ଲେନରେ ଜଳ ଯୋଗାଣ ସହରର ଅନ୍ୟ ଅଞ୍ଚଳ ଭଳି ସ୍ବାଭାବିକ ରହିଛି। ହେଲେ ପଞ୍ଚମ ଠାରୁ ତ୍ରୟୋଦଶ ଲେନ ପର୍ଯ୍ୟନ୍ତ ସବୁ ଗଳିରେ ପାନୀୟ ଜଳର ସମସ୍ୟା ଦେଖାଦେଇଛି। ଏହି ୧୩ଟି ଲେନରେ ରହୁଥିବା ୩ହଜାରରୁ ଊର୍ଦ୍ଧ୍ୱ ଜନସଂଖ୍ୟା ପାଣି ଟୋପାଏ ପାଇଁ ନା ନା ସଂଗ୍ରାମ କରୁଛନ୍ତି। ପ୍ରତିଦିନ ରାତିପାହିଲେ ସେମାନଙ୍କ ସଂଗ୍ରାମ ଅସରନ୍ତି ହୋଇପଡିଛି । ଏହାର ମୂଳ କାରଣ ହେଲା ୪ବର୍ଷ ହେବ ଏଠାରେ ଥିବା ପମ୍ପହାଉସ ଅଚଳ। ଫଳରେ ଲୋକେ ଗରାଏ ପାଣିକୁ ୧୦ ଟଙ୍କାରେ କିଣିବାକୁ ବାଧ ହେଉଛନ୍ତି ।
୧୯୯୩ ଓ ୨୦୧୮ରେ ରୟତ କଲୋନୀର ୧୩ଟି ଲେନ ପାଇଁ ଗୋଟିଏ ଲେଖାଏଁ ପମ୍ପ ହାଉସ୍ ନିର୍ମାଣ ହୋଇଥିଲା। ୧୯୯୩ରେ ନିର୍ମିତ ପମ୍ପହାଉସ୍ ସମସ୍ତ ଲେନକୁ ଜଳ ଯୋଗାଣ କରୁଥିଲା। ହେଲେ ଗୋଟିଏ ପମ୍ପହାଉସ ସମସ୍ତ ଅଞ୍ଚଳକୁ ଜଳ ଯୋଗାଣ କରିବାରେ ଅଧିକ ଚାପ ହେବାରୁ ୨୦୧୮ରେ ନୂତନ ପମ୍ପହାଉସ ନିର୍ମାଣ କରାଗଲା। ଏହା ପୂର୍ବରୁ ପୁରୁଣା ପମ୍ପ ହାଉସଟି ୨୦୧୫ ରୁ ଅଚଳ ହୋଇଯାଇଛି । ନୂତନ ପମ୍ପହାଉସ ୪ଟି ଲେନକୁ ସମ୍ପୂର୍ଣ୍ଣ ରୂପେ ଜଳ ଯୋଗାଣ କରିପାରୁଛି । ହେଲେ ଅନ୍ୟ ୯ଟି ଲେନକୁ ଜଳ ଯୋଗାଣ କରିପାରୁନାହିଁ । ଗୋଟିଏ ପମ୍ପହାଉସରୁ ଏତେ ଅଞ୍ଚଳକୁ ଜଳ ଯୋଗାଣ କରିବା ମଧ୍ୟ ସମ୍ଭବପର ନୁହେଁ। ତେବେ ଦୂରଦୃଷ୍ଟି ଅଭାବରୁ ପିଏଚ୍ଡି କର୍ତ୍ତୃପକ୍ଷ ଠିକଭାବେ ୨ଟି ପମ୍ପହାଉସ ନିର୍ମାଣ କରିପାରିନାହଁାନ୍ତି । ରାଜନୈତିକ ଚାପରେ ଇଚ୍ଛା ମୁତାବକ ପମ୍ପ ହାଉସ ସ୍ଥାପନ କରାଯାଇଛି । ଫଳରେ ବର୍ତ୍ତମାନ ଘୋର ଜଳ ସମସ୍ୟା ଉକ୍ତ ଅଞ୍ଚଳରେ ଦେଖାଦେଇଛି । ଲୋକେ ପାଣି ପାଇ ନ ପାରି ୧୦ଟଙ୍କା ଦେଇ ଗରାଏ ପାଣି କିଣୁଛନ୍ତି । ରୟତକଲୋନୀକୁ ଲାଗି ରହିଥିବା ଅନ୍ୟ ଏକ ବସ୍ତିରୁ ପାଣି କିଣି ଶୋଷ ମେଣ୍ଟାଉଛନ୍ତି । ଗାଧୋଇବା ଠାରୁ ଆରମ୍ଭକରି ନିତ୍ୟ ବ୍ୟବହାର୍ଯ୍ୟ ପାଇଁ ଆବଶ୍ୟକ ପାଣି ପାଇ ନ ପାରି ମହିଳାମାନେ ଛଟପଟ ହେଉଥିବା ପ୍ରକାଶ କରିଛନ୍ତି । ସାହିରେ ଯେଉଁ ଷ୍ଟାଣ୍ଡପୋଷ୍ଟ ରହିଛି ତାହା କେବଳ ନାମକୁମାତ୍ର ରହିିଛି । ସେହିଭଳି ଘରକୁ ପାଇପ୍ ଜଳ ଯୋଗାଣ ଧର୍ମକୁ ଆଖିଠାର ସଦୃଶ୍ୟ ପାଲଟିଛି। ଜଳ ସମସ୍ୟା ନେଇ ସାହିବାସିନ୍ଦା ବାରମ୍ବାର ପିଏଚ୍ଡି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଅଭିଯୋଗ କରିଛନ୍ତ। କେବଳ ପାଇପ୍ ଜଳ ଯୋଗାଣ କଥା ନୁହେଁ ପିଏଚ୍ଡି ପକ୍ଷରୁ ଯେଉଁ ନଳକୂପ ଖନନ ହୋଇଛି ତାହା ମଧ୍ୟ କାମ କରୁନାହିଁ । ବର୍ଷାଧିକ କାଳ ହେବ ୭ଟି ନଳକୂପ ଅଚଳ ହୋଇ ପଡିରହିଛି । ନଳକୂପ ଗୁଡିକ ଖନନ ପରେ ତାହାର ରକ୍ଷଣାବେକ୍ଷଣ ଓ ମରାମତି କରାଯାଇ ନ ଥିବା ସାହିବାସିନ୍ଦା ସୂଚନା ଦେଇଛନ୍ତି। ଫଳରେ ଅଚଳ ନଳକୂପରେ ଲୋକେ ଗାଈଗୋରୁ ବାନ୍ଧୁଛନ୍ତି । ପଞ୍ଚମ, ଷଷ୍ଠ ଓ ସପ୍ତମ ଲେନକୁ ଯେଉଁ ଅଳ୍ପ ମାତ୍ରାରେ ପମ୍ପ ହାଉସ୍ରୁ ଜଳ ଯୋଗାଣ ହେଉଛି ତାହା ଗୋଟିଏ ପରିବାର ପାଇଁ ଆବଶ୍ୟକତାର ମାତ୍ର ୨୦ରୁ ୨୫ପ୍ରତିଶତ। ପିଏଚ୍ଡି କର୍ତ୍ତୃପକ୍ଷ ଏଥିପ୍ରତି ଗୁରୁତ୍ୱ ଦେଇ ରୟତକଲୋନୀର ଜଳ ଯୋଗାଣ ସମସ୍ୟା ଦୂର କରିବା ନେଇ ଦାବି ହୋଇଛି ।
