ପୁରୀ ଅଫିସ, ୨୬।୪: ମହାମାରୀ କରୋନା ବିଶ୍ୱବାସୀଙ୍କ ପାଇଁ ଆତଙ୍କ ସୃଷ୍ଟି କରିଛି। ଲକ୍ଷଲକ୍ଷ ଲୋକଙ୍କ ଜୀବନଜୀବିକା ଛଡ଼ାଇ ନେଇଛି। ଏପରି କି ଭକ୍ତ ଓ ଭଗବାନଙ୍କ ମଧ୍ୟରେ ପାଚେରି ସାଜିଛି। ନୀତିକାନ୍ତି, ପ୍ରଥା, ପରମ୍ପରା ଉପରେ ବିଶେଷ ପ୍ରଭାବ ପଡ଼ିଛି। ଏହି କ୍ରମରେ ପ୍ରସିଦ୍ଧ ଚନ୍ଦନଯାତ୍ରାରେ ମୁଖ୍ୟ ଭୂମିକା ଗ୍ରହଣ କରିଥିବା ନନ୍ଦା ଓ ଭଦ୍ରାର ଖୁସି ଛଡାଇ ନେଇଛି ମହାମାରୀ କରୋନା। ଆମେ ଯେଉଁ ନନ୍ଦା, ଭଦ୍ରାଙ୍କ କଥା କହୁଛୁ ସେ କୌଣସି ମାନବ ନୁହନ୍ତି। ଦୁଇଟି ଚାପ, ଯେଉଁଥିରେ ମାନବୀୟ ଲୀଳା ସ୍ବରୂପ ଜଳକ୍ରୀଡ଼ା କରିଥାନ୍ତି ମହାପ୍ରଭୁ ଶ୍ରୀଜଗନ୍ନାଥ ଓ ଶ୍ରୀକ୍ଷେତ୍ରର ପଞ୍ଚ ମହାଦେବ। ମହାପ୍ରଭୁଙ୍କ ବାଟକୁ ଚାହିଁ ରହିଥିବା ନନ୍ଦା, ଭଦ୍ରାଙ୍କ ଖୁସି ଶେଷ ମୁହୂର୍ତ୍ତରେ ଛଡ଼ାଇ ନେଇଛି କରୋନା।
ମହାପ୍ରଭୁଙ୍କ ଚନ୍ଦନ ଯାତ୍ରାରେ ନିଜକୁ ନିୟୋଜିତ କରିବା ପାଇଁ ପ୍ରସ୍ତୁତ ହେଉଥିଲେ। ନନ୍ଦା, ଭଦ୍ରାଙ୍କ ମନରେ ଥିଲା ଅସରନ୍ତି ଖୁସି । ସେଥିପାଇଁ ସଜେଇ ବି ହେଉଥିଲେ । ଶେଷ ପର୍ଯ୍ୟାୟରେ ପହଞ୍ଚତ୍ଥିଲା କାମ। ବିଜେ କରିଥାନ୍ତେ ବିଶ୍ୱନିୟନ୍ତା। ଆଉ କାତ ମାରି ନାଉରିଆ ବୁହାଇଥାନ୍ତା ଚାପ। ହେଲେ କରୋନା ପାଇଁ ଶେଷ ମୁହୂର୍ତ୍ତରେ ସବୁ କିଛି ବଦଳିଗଲା। ଲକ୍ଡାଉନ ଚାଲିଥିବାରୁ ନରେନ୍ଦ୍ରକୁ ଠାକୁର ବିଜେ କରିବେ ନାହିଁ। ଶ୍ରୀମନ୍ଦିର ଭିତରେ ହିଁ ହେବ ଚନ୍ଦନ ଯାତ୍ରା । ଏମିତି ନିଷ୍ପତ୍ତି ପରେ ଅଲୋଡ଼ା ହୋଇଛନ୍ତି ନନ୍ଦା ଓ ଭଦ୍ରା। ସୂଚନାଥାଉ କି, ପ୍ରତିବର୍ଷ ଚନ୍ଦନ ଯାତ୍ରା ସରିବା ପରେ ନନ୍ଦା ଓ ଭଦ୍ରା ଚାପକୁ ନରେନ୍ଦ୍ର ପୁଷ୍କରିଣୀ ଭିତରେ ବୁଡାଇ ରଖାଯାଏ। ଚୈତ୍ର ପୂର୍ଣ୍ଣିମାରେ ଭୋଇ ସେବକମାନେ ଏହି ଡଙ୍ଗାକୁ କାଢିଥାନ୍ତି। ଶୁଖିଗଲା ପରେ ଏଥିରେ ଆବଶ୍ୟକ ମରାମତି ଏବଂ ରଙ୍ଗ ହୁଏ। ଏହାପରେ ଚାପଦ୍ୱୟକୁ ନବବଧୂ ଭଳି ସଜାଇ ଦିଆଯାଏ । ହେଲେ ଶୁକ୍ରବାର ଚନ୍ଦନ ଯାତ୍ରା ନରେନ୍ଦ୍ରରେ ହେବ ନାହିଁ ବୋଲି ନିଷ୍ପତ୍ତି ନିଆଯିବା ପରେ ଚାପ ସଜେଇବା କାମ ବନ୍ଦ ରହିଛି । ଅଧାଗଢ଼ା ଅବସ୍ଥାରେ ଏବେ ନରେନ୍ଦ୍ରରେ ଭାସୁଛନ୍ତି ନନ୍ଦା ଓ ଭଦ୍ରା।
