ନୟାଗଡ ଅଫିସ/ରଣପୁର,୨୬।୫(ସ୍ବ.ପ୍ର.):ନୟାଗଡ଼ ଜିଲା ରଣପୁର ଥାନାର ବିରୁଡ଼ା ଅଞ୍ଚଳରେ ଏକ ମୃତଦେହ ଖାଲରେ ପଡିରହିଛି। ମୃତକ ହେଲେ ରାଇପଡାର ଆଦିତ୍ୟ ବେହେରା। ତେବେ ଆଦିତ୍ୟଙ୍କୁ ପୋଲିସ ହତ୍ୟା କରି ଫୋପାଡି ଦେଇଥିବା ଅଭିଯୋଗ ହେବା ସହ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ଅଭିଯୋଗ ଅନୁସାରେ, ପୋଲିସ ରାଇପଡା ହତ୍ୟା ଘଟଣାରେ ମହାତପଲର ବିରୁଡା ଗାଁରେ ସୋମବାର ରାତିରେ ସେଠାରେ ଚଢ଼ାଉ କରିଥିଲା। ଚଢ଼ାଉ ସମୟରେ ରାଇପଡାର ରାଜୀବ ସାହୁଙ୍କୁ ଗିରଫ କରିଥିଲା। ତେବେ ଆଦିତ୍ୟଙ୍କୁ ଗିରଫ କରିବାକୁ ପୋଲିସ ଗୋଡେଇ ଗୋଡେଇ ପିଟିଥିଲା। ତେବେ ଆଦିତ୍ୟ ଏକ ଖାଲରେ ଖସି ପଡ଼ିଥିଲେ। ପୋଲିସ ତାଙ୍କୁ ଉଦ୍ଧାର ନ କରି ମରିବାକୁ ଛାଡି ଦେଇଥିଲା। ବହୁ ସମୟ ଧରି ଖାଲରେ ପଡି ରହିବା ପରେ ଆଦିତ୍ୟ ପ୍ରାଣ ହରାଇଛନ୍ତି ବୋଲି ଅଭିଯୋଗ ହୋଇଛି। ସୂଚନାଯୋଗ୍ୟ, ଗତ ଏପ୍ରିଲ ମାସରେ ରାଇପଡାରେ କାଜୁ ଜଙ୍ଗଲକୁ ନେଇ ମାରପିଟ ହୋଇଥିଲା। ଏଥିରେ ୨ ଜଣ ଆଦିବାସୀ ପ୍ରାଣ ହରାଇଥିଲେ।
