ଲସ୍ କାବୋସ (ମେକ୍ସିକୋ), ୧।୮ (ପି.ଟି.)- ଏଠାରେ ଚାଲିଥିବା ଏଟିପି ଲସ୍ କାବୋସ ଟେନିସ ପ୍ରତିଯୋଗିତାର ପୁରୁଷ ସିଙ୍ଗଲ୍ସ ୨ୟ ରାଉଣ୍ଡର ଏକ ମୁକାବିଲାରେ ଭାରତର ପ୍ରଜନେଶ ଗୁଣେଶ୍ୱରନଙ୍କୁ ପରାଜୟର ସାମ୍ନା କରିବାକୁ ପଡ଼ିଛି। ବିଶ୍ୱ ମାନ୍ୟତାର ୯୦ତମ ସ୍ଥାନରେ ରହିଥିବା ପ୍ରଜନେଶ ୬-୪, ୩-୬, ୨-୬ ସେଟ୍ରେ ଆମେରିକାର ଟେଲର୍ ଫ୍ରିତ୍ଜଙ୍କ ନିକଟରୁ ପରାସ୍ତ ହୋଇଛନ୍ତି। ପ୍ରଜନେଶ ପ୍ରଥମ ସେଟ୍କୁ ଜିତି ନେଇଥିଲେ ମଧ୍ୟ ପରବର୍ତ୍ତୀ ୨ ସେଟ୍ରେ ବିଶ୍ୱ ମାନ୍ୟତାର ୨୮ତମ ସ୍ଥାନରେ ରହିଥିବା ଟେଲରଙ୍କ ନିକଟରୁ ପରାସ୍ତ ହୋଇ ସୁଯୋଗ ହାତଛଡ଼ା କରିଥିଲେ। ଏହି ପ୍ରତିଯୋଗିତାରୁ ପ୍ରଜନେଶଙ୍କୁ ୨୦ ପଏଣ୍ଟ ଓ ୧୨,୮୨୫ ଆମେରିକୀୟ ଡଲାର ମିଳିଛି। ଏଥିସହ ର଼୍ୟାଙ୍କିଙ୍ଗ୍ରେ ମଧ୍ୟ ସେ ୨ଟି ସ୍ଥାନ ଉପରକୁ ଉଠିଛନ୍ତି। ଅପରପକ୍ଷରେ ପୁରୁଷ ଡବଲ୍ସରେ ଅଂଶଗ୍ରହଣ କରିଥିବା ଅନ୍ୟତମ ଭାରତୀୟ ଟେନିସ ଖେଳାଳି ଡିଭିଜ ଶରନ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଇସ୍ରାଏଲ୍ର ଜୋନାଥନ ଏରିକ୍ଙ୍କୁ ସାଥୀ କରି ଖେଳୁଥିବା ଶରନ ୭-୫, ୬-୧ ସେଟ୍ରେ ୪ର୍ଥ ସିଡ୍ ବେନ୍ ମ୍ୟାକ୍ଲାଚଲାନ ଓ ଜନ୍-ପ୍ୟାଟ୍ରିକ ସ୍ମିଥ୍ ଯୋଡ଼ିଙ୍କୁ ହରାଇ ଦେଇଛନ୍ତି।
