ନୂଆପଡ଼ା ଅଫିସ,୧ା୬: ସରକାରୀ କ୍ୱାରାଣ୍ଟାଇନ୍ର ସାତଦିନ ଅବଧି ପୂର୍ଣ୍ଣ ପରେ ପ୍ରବାସୀ ଘରକୁ ଯାଇ ହୋମ କ୍ୱାରାଣ୍ଟାଇନରେ ରହିବାକୁ ସରକାରୀ ନିର୍ଦ୍ଦେଶ ରହିଛି । ହେଲେ ଶ୍ରମିକମାନଙ୍କୁ ବିନା ସ୍ବାବ୍ ପରୀକ୍ଷଣରେ ଘରକୁ ଛାଡି ଦିଆଯାଉଥିବାରୁ ପରବର୍ତ୍ତୀ ସମୟରେ ସେମାନେ କରୋନା ସଂକ୍ରମିତ ବୋଲି ଜଣାପଡୁଛନ୍ତି। ଏଥି ଯୋଗୁ ପରିବାର ଲୋକଙ୍କ ସହ ଗ୍ରାମବାସୀ ଭୟ ଓ ଆଶଙ୍କାରେ ଦିନ କାଟୁଛନ୍ତି। ଏପଟେ ଦୋଛକିରେ ପ୍ରବାସୀ ଶ୍ରମିକ ଗାଁବାହାରେ କୁଡିଆ କରି ଦିନ କାଟୁଛନ୍ତି। ଏଭଳି ଏକ ଉଦାହରଣ ଦେଖିବାକୁ ମିଳିଛି ନୂଆପଡ଼ା ଜିଲା କୋମନା ବ୍ଲକ ଅନ୍ତର୍ଗତ ଭେଲା ପଞ୍ଚାୟତ ଖରିକାର ପଡାରେ। ପ୍ରମିଳା ଓ ଚୂଡାମଣି ସଗରିଆଙ୍କ ପୁଅ ରାଧାକାନ୍ତ(୧୯)ଗତମାସ ୨୫ତାରିଖରେ ମୁମ୍ବାଇରୁ ଫେରିଥିଲେ। ତାଙ୍କୁ ପ୍ରଶାସନ ଜଟଗଡ ପଞ୍ଚାୟତ ସାହାଜଟ କ୍ୱାରାଣ୍ଟାଇନ୍ ସେଣ୍ଟରରେ ରଖିଥିଲା । ସାତଦିନର ଅବଧି ସମାପ୍ତ ପରେ ରବିବାର ସନ୍ଧ୍ୟାରେ ତାଙ୍କୁ ଛାଡି ଦିଆଗଲା । ହେଲେ ସ୍ବାବ୍ ପରୀକ୍ଷଣ ନ ହେବା ଯାଏ ଘରକୁ ଯିବେ ନାହିଁ ବୋଲି ସେ ଅଡିବସିଲେ । ହେଲେ ସରକାରୀ ନିୟମ ଅନୁସାରେ ତାଙ୍କୁ କ୍ୱାରାଣ୍ଟାଇନ୍ ସେଣ୍ଟରରେ ରଖିବା ସମ୍ଭବ ନୁହେଁ ବୋଲି କୁହାଯାଇଥିଲା। ବାଧ୍ୟ ହୋଇ ସେଠାରୁ ସେ ଆସି କିଷ୍ଣା ଛକ ନିକଟରେ ଥିବା ଏକ ପୋଖରୀ ହୁଡାରେ କୁଡିଆ କରି ରହୁଛନ୍ତି। ମୁମ୍ବାଇରୁ ଆସୁଥିବା ଅଧିକାଂଶ ଶ୍ରମିକ କରୋନା ସଂକ୍ରମିତ ହେଉଥିବାରୁ ସେ ଘରକୁ ଯାଇ ପରିବାରର ଅନ୍ୟ ସଦସ୍ୟଙ୍କୁ ବିପଦରେ ପକାଇବାକୁ ଚାହୁଁ ନାହାନ୍ତି। ଅପରପକ୍ଷରେ ଗୋଟିଏ କୁଡିଆରେ ୮/୧୦ପରିବାର ରହୁଥିବାରୁ ସଂକ୍ରମଣ ଭୟ ରହିଛି ା ତେଣୁ ପରିବାର ଏବଂ ଗାଁକୁ ସଂକ୍ରମଣ ହେବାକୁ ଦେବିନାହିଁ ବୋଲି ସ୍ପଷ୍ଟ କରିଛନ୍ତି ରାଧାକାନ୍ତ। ତାଙ୍କ ପାଇଁ ବୃଦ୍ଧ ମା’ବାପା ଗାଧୋଇବା, ପିଇବାକୁ ପାଣି ଏବଂ ଖାଦ୍ୟ ଆଣି ଦେଉଛନ୍ତି। ଏ ସମ୍ପର୍କରେ ଭେଲା ପଞ୍ଚାୟତ ସରପଞ୍ଚ ରିଖିରାମ ଦଣ୍ଡସେନାଙ୍କୁ ପଚାରିବାରେ ସମ୍ପୃକ୍ତ ପ୍ରବାସୀ ଶ୍ରମିକଙ୍କ ସ୍ବାବ୍ ନମୁନା କିପରି ଶୀଘ୍ର ସଂଗ୍ରହ କରାଯାଇ ପରୀକ୍ଷା ଲାଗି ପଠାଯିବ ତାହର ବ୍ୟବସ୍ଥା କରିବି ବୋଲି କହିଛନ୍ତି।
