ମୁମ୍ବାଇ: ବଲିଉଡ୍ ଡ୍ରିମ ଗର୍ଲ ଏବେ ଖୁବ୍ ଚର୍ଚ୍ଚାରେ। ନିକଟରେ କେତେଜଣ ସୋସିଆଲ ମିଡିଆ ୟୁଜର୍ସ ଏକ ବିଜ୍ଞାପନକୁ ନେଇ ହେମାଙ୍କୁ ଟ୍ରୋଲ୍ କରିବା ପରେ ଏବେ ସେ ତା’ର ଉତ୍ତର ରଖିଛନ୍ତି। ହେମା ହେଲ୍ଥ କମ୍ପାନୀ କେଣ୍ଟ ଆରୋର ବ୍ରାଣ୍ଡ ଆମ୍ବାସଡର ହୋଇଥିବା ବେଳେ ନିକଟରେ ଏହି କମ୍ପାନୀର ଅଟା ପ୍ୟାକେଟ ଉପରେ ହେମାଙ୍କ ଫଟୋ ଦେଖିବାକୁ ମିଳିଥିଲା। ଆଉ ଏଥିରେ ଯେଉଁ କେତୋଟି ବାକ୍ୟ ଲେଖାଯାଇଥିଲା ତାକୁ ନେଇ ଏବେ ସୋସିଆଲ ମିଡିଆରେ ଚର୍ଚ୍ଚା ଆରମ୍ଭ ହୋଇ ଯାଇଛି। ଏହାକୁ ଦେଖିବା ପରେ ହେମା ଟୁଇଟ୍ କରି କହିଛନ୍ତି ଏଥିପାଇଁ ଉକ୍ତ କମ୍ପାନୀର ଚେୟାରମ୍ୟାନ ପୂର୍ବରୁ କ୍ଷମା ମାଗି ସାରିଛନ୍ତି। ତେଣୁ ହେମା ସ୍ପଷ୍ଟ କରିଛନ୍ତି ଯେ, ସେ ସବୁ ବର୍ଗର ଲୋକଙ୍କ ସମ୍ମାନ କରନ୍ତି। କେହିଜଣେ ସୋସିଆଲ ମିଡିଆ ୟୁଜର୍ସ ଏକ ସ୍କ୍ରିନ୍ ସଟ୍ ଶେୟାର କରିବା ପରେ ଏବେ ଏହା ଭାଇରାଲ ହୋଇଛି। ହେଲେ କାହାକୁ କଷ୍ଟ ଦେବା ମୋର ଉଦ୍ଦେଶ୍ୟ ନୁହେଁ ବୋଲି ହେମା କହିଛନ୍ତି। ସୂଚନାଯୋଗ୍ୟ,ବିଜ୍ଞାପନର ଯେଉଁ ବାକ୍ୟରେ ଲେଖାଯାଇଥିଲା, ଆପଣ ଆପଣଙ୍କ ଘରେ କାମ କରୁଥିବା ଲୋକକୁ ଅଟା ଚକଟିବାକୁ କହୁଛନ୍ତି କି? କାରଣ ସେମାନଙ୍କ ହାତ ସଂକ୍ରମିତ ହୋଇଥାଇପାରେ। ଏହାକୁ ଦେଖିବା ପରେ ସୋସିଆଲ ମିଡିଆ ୟୁଜର୍ସମାନେ ହେମାଙ୍କୁ ଟ୍ରୋଲ୍ କରିବା ଆରମ୍ଭ କରିଦେଇଥିଲେ।
