ନୂଆଦିଲ୍ଲୀ,୪।୧୧- ଭାରତୀୟ ଅଧିନାୟକ ବିରାଟ କୋହଲି ମଙ୍ଗଳବାର ୩୧ତମ ଜନ୍ମଦିନ ପାଳିବାକୁ ଯାଉଛନ୍ତି। ଏହି ମହାନ ବ୍ୟାଟ୍ସମ୍ୟାନ ୧୯୮୮ ମସିହା ନଭେମ୍ବର ୫ ତାରିଖରେ ଦିଲ୍ଲୀର ଏକ ପଞ୍ଜାବୀ ପରିବାରରେ ଜନ୍ମ ନେଇଥିଲେ। ୨୦୦୮ରେ ତାଙ୍କ ନେତୃତ୍ୱରେ ୧୯ ବର୍ଷରୁ କମ୍ ଭାରତୀୟ ଦଳ ବିଶ୍ୱକପ୍ ଜିତିଥିଲା। ଏହାର କିଛି ମାସ ପରେ ତାଙ୍କୁ ଅନ୍ତର୍ଜାତୀୟ ଦିନିକିଆରେ ପଦାର୍ପଣ ସୁଯୋଗ ମିଳିଥିଲା। ୧୯ ବର୍ଷୀୟ କୋହଲି ଶ୍ରୀଲଙ୍କା ବିପକ୍ଷରେ ପଦାର୍ପଣ କରିଥିଲେ। କ୍ୟାରିୟରର ଆରମ୍ଭରୁ ଅତିରିକ୍ତ ବ୍ୟାଟ୍ସମ୍ୟାନ ଭାବେ ଖେଳୁଥିବା ଚିକୁ ଶୀଘ୍ର ଦଳରେ ସ୍ଥାନ ପକ୍କା କରି ଦେଇଥିଲେ। ତାଙ୍କ ପ୍ରତିନିଧିତ୍ୱରେ ଭାରତ ୨୦୧୧ ଆଇସିସି ବିଶ୍ୱକପ ଓ ୨୦୧୩ ଆଇସିସି ଚାମ୍ପିୟନ୍ସ ଟ୍ରଫିରେ ଚାମ୍ପିୟନ ହୋଇଥିଲା। ୨୦୧୩ରେ ଟେଷ୍ଟରୁ ମହେନ୍ଦ୍ର ସିଂ ଧୋନୀଙ୍କ ଅବସର ପରେ କୋହଲିଙ୍କୁ ଅଧିନାୟକ ଘୋଷଣା କରାଯାଇଥିଲା। ସେହିଭଳି ୨୦୧୭ରେ ଦିନିକିଆ ଓ ଟି୨୦ ଦଳର ନେତୃତ୍ୱ ପାଇଥିଲେ। ବିଶ୍ୱର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ପରିଗଣିତ ହେଉଥିବା କୋହଲିଙ୍କ ନାମରେ ମୋଟ ଉପରେ ୬୯ ଶତକ ରହିଛି। ଦିନିକିଆରେ ୧୦ ଓ ୧୧ ହଜାର ରନ୍ ପୂରଣ କରିବାରେ ଦ୍ରୁତତମ ବ୍ୟାଟ୍ସମ୍ୟାନ ଅନ୍ତର୍ଜାତୀୟ କ୍ରିକେଟରେ ମୋଟ ଉପରେ ୨୧ ହଜାର ରନ୍ ପୂରଣ କରିସାରିଛନ୍ତି। ସବୁଠୁ ସଫଳତମ ଭାରତୀୟ ଟେଷ୍ଟ ଅଧିନାୟକ ଏପର୍ଯ୍ୟନ୍ତ ୮୨ ଟେଷ୍ଟ ଖେଳି ୨୬ ଶତକ ସହ ୭,୦୬୬ ରନ୍ କରିଛନ୍ତି। ସେହିଭଳି ୨୩୯ ଦିନିକିଆରୁ ୬୦.୩୧ ହାରରେ ୧୧,୫୨୦ ରନ୍ କରିସାରିଛନ୍ତି। ଏହି ଫର୍ମାଟରେ ତାଙ୍କ ନାମରେ ୪୩ ଶତକ ରହିଛି। ଟି୨୦ ଫର୍ମାଟରେ ଶତକ ହାସଲ କରି ନ ଥିଲେ ମଧ୍ୟ ୭୧ ମ୍ୟାଚ୍ରୁ ୫୦ ଆଭରେଜରେ ୨,୪୪୧ ରନ୍ କରିଛନ୍ତି। ତାଙ୍କୁ ଦୁଇ ଥର ଆଇସିସି କ୍ରିକେଟର ଅଫ୍ ଦ ଇୟର(୨୦୧୭ ଓ ୨୦୧୮), ଆଇସିସି ଶ୍ରେଷ୍ଠ ଟେଷ୍ଟ ଖେଳାଳି (୨୦୧୮) ଓ ଶ୍ରେଷ୍ଠ ଦିନିକିଆ ଖେଳାଳି (୨୦୧୨, ୨୦୧୭ ଓ ୨୦୧୮) ପୁରସ୍କାର ମିଳିସାରିଛି। ଏହାବାଦ୍ ସେ ଅର୍ଜୁନ ସମ୍ମାନ (୨୦୧୩), ପଦ୍ମ ଶ୍ରୀ (୨୦୧୭) ଓ ରାଜୀବ ଗାନ୍ଧୀ ଖେଳରତ୍ନ (୨୦୧୮) ମଧ୍ୟ ପାଇଛନ୍ତି।
