ଇସଲାମାବାଦ୍,୧୫।୭: ଭାରତର ପୂର୍ବତନ ଅଧିନାୟକ ବିରାଟ କୋହଲି ଏବେ ଖରାପ ଫର୍ମରେ ଅଛନ୍ତି। ସେ ଗତ ଅଢେଇ ବର୍ଷ ମଧ୍ୟରେ ଅନ୍ତର୍ଜାତୀୟ କ୍ରିକେଟ୍ରେ ଗୋଟିଏ ବି ଶତକ ମାରିପାରିନାହାନ୍ତି। ତାଙ୍କୁ ଦଳରୁ ବାଦ୍ ଦେବା ପାଇଁ କ୍ରିକେଟ୍ ବିଶେଷଜ୍ଞମାନେ ଦାବି କରିଛନ୍ତି। ଏସବୁ ଭିତରେ ବିରାଟ କିନ୍ତୁ ପାକିସ୍ତାନ ଅଧିନାୟକ ବାବର ଆଜାମଙ୍କ ସମର୍ଥନ ପାଇଛନ୍ତି।
ଜୁଲାଇ ୧୫ରେ ଲର୍ଡସରେ ଖେଳାଯାଇଥିବା ଇଂଲଣ୍ଡ ବିପକ୍ଷ ଦ୍ୱିତୀୟ ଦିନିକିଆରେ ବିରାଟ ୧୬ ରନ ସ୍କୋର କରିବା ପରେ ଆଉଟ ହୋଇଥିଲେ। ସେ ୨୫ ବଲର ସମ୍ମୁଖୀନ ହୋଇ ୩ଟି ଚୌକା ମାରିଥିଲେ। ଏହାର କିଛି ସମୟ ପରେ ବାବର ବିରାଟଙ୍କ ସହ ଏକ ଫଟୋ ଶେୟାର କରି ଭାରତୀୟ ପ୍ରଶଂସକଙ୍କ ହୃଦୟ ଜିତିଥିଲେ। ବାବର ଲେଖିଛନ୍ତି, ଏହା ମଧ୍ୟ ଚାଲିଯିବ, ସାହସ ରଖ। ବିରାଟଙ୍କ ପ୍ରଶଂସକ ତାଙ୍କ ଟୁଇଟ୍କୁ ବହୁତ ପସନ୍ଦ କରିଛନ୍ତି ଏବଂ ତାଙ୍କୁ ପ୍ରଶଂସା କରୁଛନ୍ତି।
କୋହଲି ଏବଂ ବାବର ବିଶ୍ୱ କ୍ରିକେଟର ଦୁଇ ବଡ ବ୍ୟାଟ୍ସମ୍ୟାନ। ବାବର ଅନେକ ଥର କହିଛନ୍ତି ଯେ ସେ ବିରାଟଙ୍କୁ ଅନୁସରଣ କରୁଛନ୍ତି। ତାଙ୍କ ପରି ବ୍ୟାଟିଂ କରିବାକୁ ଚାହୁଁଛନ୍ତି। ସେ ମଧ୍ୟ ନିଜକୁ ପ୍ରମାଣିତ କରିଛନ୍ତି। ସେ ଆଇସିସି ଦିନିକିଆ ର଼୍ୟାଙ୍କିଙ୍ଗରେ ପ୍ରଥମ ସ୍ଥାନ ଅଧିକାର କରିଛନ୍ତି।
