ହାଟଡିହୀ,୨୮ା୧(ଡି.ଏନ.ଏ.)-କେନ୍ଦୁଝର ଜିଲା ହାଟଡିହୀ ବ୍ଲକ ଗେଡମା ଗ୍ରାମର ଜଣେ ଅବସରପ୍ରାପ୍ତ ଶିକ୍ଷକ ୪ ଲକ୍ଷ ଟଙ୍କା ଠକେଇର ଶିକାର ହୋଇଛନ୍ତି। ଏନେଇ ନନ୍ଦିପଦା ଥାନାରେ ଏକ ମାମଲା (ନଂ.୭/୨୦୨୦) ଦାୟର ହୋଇଛି। ଅଭିଯୋଗ ଅନୁସାରେ ଜଣେ ବ୍ୟକ୍ତି ଶିକ୍ଷକ ଲକ୍ଷ୍ମୀଧର ସାହୁଙ୍କ ଘରକୁ ଯାଇ ନିଜକୁ କୃଷି ବିଭାଗର କର୍ମଚାରୀ ବୋଲି ପରିଚୟ ଦେଇଥିଲେ। ତୁମ ପଞ୍ଚାୟତରେ କୃଷି ଯନ୍ତ୍ରପାତି ଅଫିସ ଖୋଲାଯିବ ଏବଂ ତୁମକୁ ଜଣେ ଅବସରପ୍ରାପ୍ତ ବ୍ୟକ୍ତି ହିସାବରେ ମୁଖ୍ୟ ଦାୟିତ୍ୱ ଦିଆଯିବ ମଧ୍ୟ କହିଥିଲେ। ଏଥିପାଇଁ ଗୋଟିଏ ୧ ହଜାର ଟଙ୍କାର ହାଟଡିହୀ ବ୍ୟାଙ୍କ ଅଫ ଇଣ୍ଡିଆ ଚେକ ଶିକ୍ଷକଙ୍କ ଠାରୁ ନେଇଥିଲେ। ପରେ ଶିକ୍ଷକଙ୍କ ସନ୍ଦେହ ହେବାରୁ ହାଟଡିହୀ ବ୍ୟାଙ୍କ ଅଫ ଇଣ୍ଡିଆକୁ ଯାଇ ବୁଝାବୁଝି କରିଥିଲେ। ଶିକ୍ଷକଙ୍କ ପାସବହିରୁ ୪ ଲକ୍ଷ ୧୦ ହଜାର ଟଙ୍କା ଯାଜପୁର ଜିଲା କୋରାବନ୍ଦି ସାହାଡାକୋଲି ଗ୍ରାମର ଜଣେ ବ୍ୟକ୍ତିଙ୍କ ରଗୁଡି ବ୍ୟାଙ୍କ ଅଫ ଇଣ୍ଡିଆ ଶାଖାରେ ଥିବା ପାସବହିକୁ ଟ୍ରାନ୍ସଫର ହୋଇଥିବା ଜଣାପଡିଲା। ପୋଲିସ ଘଟଣାର ତଦନ୍ତ ଜାରି ରଖିଛି। ଅଦ୍ୟାବଧି ପୋଲିସ ଅଭିଯୁକ୍ତଙ୍କୁ ଗିରଫ କରିପାରି ନ ଥିବା ବେଳେ ବ୍ୟାଙ୍କ ସିସିଟିଭି ଯାଞ୍ଚ ନିମନ୍ତେ ଦାବି ହୋଇଛି ା
