ମାଲକାନଗିରି ,୨୨ା୧(ସ୍ବ.ପ୍ର.): ମାଲକାନଗିରି ଜିଲା ଆଇନସେବା ପ୍ରାଧିକରଣ ମାଲକାନଗିରି ଆନୁକୂଲ୍ୟରେ ବୁଧବାର ବାଲିମେଳାସ୍ଥିତ ସରକାରୀ ଉଚ୍ଚ ବିଦ୍ୟାଳୟଠାରେ କିନ୍ନରଙ୍କ ଅଧିକାର ସମ୍ପର୍କିତ ଆଇନ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଏଥିରେ ମାଲକାନଗିରି ଆଇନସେବା ପ୍ରାଧିକରଣର ସଚିବ ଅମରେଶ ନାୟକ, ଚିତ୍ରକୋଣ୍ଡାର ଅତିରିକ୍ତ ତହସିଲଦାର, ଚନ୍ଦ୍ରମଣି ସ୍ବାଇଁ, ଜିଲା ସମାଜିକ ସୁରକ୍ଷା ଅଧିକାରୀ ରାଧାମଣି ଦଳେଇ, ଅଧ୍ୟାପକ ଡ. ରଞ୍ଜନ କୁମାର ସ୍ବାଇଁ, ଗୋଷ୍ଠୀ ସମାଜ ସୁରକ୍ଷା ଅଧିକାରୀ ପଦ୍ମରଞ୍ଜନ ଦାସ, ଡ. ରାଜେଶ କୁମାର ସାହୁ, ପ୍ରଧାନଶିକ୍ଷକ ଅଜୟ କୁମାର ନାୟକ ଶିକ୍ଷୟିତ୍ରୀ ସୁସ୍ମିତା ଗଡନାୟକ ପ୍ରମୁଖ ଉପସ୍ଥିତ ଥିଲେ। କିନ୍ନରଙ୍କ ଅଧିକାର ଓ ସେମାନଙ୍କ ସାମ୍ବିଧାନିକ ଅଧିକାର ସମ୍ପର୍କରେ ଅତିଥିମାନେ ବିସ୍ତୃତ ଭାବେ ଆଲୋଚନା କରିଥିଲେ। ସମ୍ବିଧାନର ଧାରା ୧୪, ୧୫, ୨୧ ଓ ୨୩ ମୁତାବକ କିନ୍ନରଙ୍କୁ ଆଇନଗତ ସମାନତା ଓ ସୁରକ୍ଷା, ସମ୍ମାନ ସହିତ ବଞ୍ଚିବାର ଅଧିକାର ମିଳିଛି। ସେମାନଙ୍କୁ ସମାଜ ଓ ସଂସ୍କୃତିରୁ ବଞ୍ଚତ୍ତ କରିବା ମାନବାଧିକାରର ଉଲ୍ଲଂଘନ । ସଭାରେ ଉପସ୍ଥିତ କିନ୍ନରମାନଙ୍କୁ ସରକାରଙ୍କର କିନ୍ନରମାନଙ୍କ ଅଧିକାର ଓ ସୁରକ୍ଷା ସକାଶେ ରହିଥିବା ନିର୍ଦ୍ଦେଶନାମା ସମ୍ପର୍କରେ ଅବଗତ କରାଯାଇଥିଲା। ତୃତୀୟ ଲିଙ୍ଗୀ ଭାବେ ପରିଗଣିତ କିନ୍ନରଙ୍କୁ ଶିକ୍ଷା, କର୍ମନିଯୁକ୍ତି କ୍ଷେତ୍ରରେ ସାମାଜିକ ଓ ଶିକ୍ଷାଗତ ପଛୁଆବର୍ଗ ଭାବେ ପରିଗଣିତ କରି ସଂରକ୍ଷଣ ଦେବା, ସମାଜରେ ସଚେତନତା ସୃଷ୍ଟି କରିବା, ସେମାନେ ମଧ୍ୟ ସମାଜର ଏକ ଅଙ୍ଗ ବୋଲି ଅତିଥିମାନେ ପ୍ରକାଶ କରିଥିଲେ। ଜାତୀୟ ଆଇନ ସେବା ପ୍ରାଧିକରଣ ଦ୍ୱାରା ପ୍ରଦତ୍ତ ୧୦ଟି ନୂଆ ଯୋଜନା ସମ୍ପର୍କରେ ମଧ୍ୟ ଶିବିରରେ ଆଲୋଚନା ହୋଇଥିଲା।
