ଲସ୍ ଏଞ୍ଜେଲ୍ସ, ୩୧।୧ (ଏଏଫ୍ପି)- କାନାଡାର କ୍ରିଷ୍ଟିନେ ସିନ୍କ୍ଲେୟାର ଅନ୍ତର୍ଜାତୀୟ ଫୁଟ୍ବଲ (ଉଭୟ ମହିଳା ଓ ପୁରୁଷ)ରେ ସର୍ବାଧିକ ଗୋଲସ୍କୋର କରି ବିରଳ କୀର୍ତ୍ତିମାନର ଅଧିକାରୀ ହୋଇଛନ୍ତି। ଏଠାରେ ଅନୁଷ୍ଠିତ ଅଲିମ୍ପିକ ଯୋଗ୍ୟତା ପର୍ଯ୍ୟାୟ ଟୁର୍ନାମେଣ୍ଟରେ କାନାଡା ୧୧-୦ ଗୋଲରେ ସେଣ୍ଟ କିଟ୍ସ ଓ ନେଭିସ୍ ଦଳକୁ ପରାସ୍ତ କରିଥିଲା। ଏହି ମ୍ୟାଚ୍ରେ ୨ଟି ଗୋଲ ଦେଇ କ୍ରିଷ୍ଟିନେ ରେକର୍ଡର ଅଧିକାରିଣୀ ହୋଇଛନ୍ତି। କାନାଡାର ୩୬ ବର୍ଷୀୟା ଏହି ଅଭିଜ୍ଞ ମହିଳା ଫୁଟ୍ବଲ ଖେଳାଳି କ୍ୟାରିୟରର ୧୮୫ତମ ଗୋଲସ୍କୋର କରି ଆମେରିକାର ଆବି ଓ୍ବାମ୍ବାଚଙ୍କୁ ପଛରେ ପକାଇଛନ୍ତି। ଅବସର ନେଇସାରିଥିବା ଆମେରିକୀୟ ମହିଳା ଫୁଟ୍ବଲ ଖେଳାଳି ଓ୍ବାମ୍ବାଚ୍ କ୍ୟାରିୟରରେ ୧୮୪ ଅନ୍ତର୍ଜାତୀୟ ଗୋଲ ଦେଇଥିଲେ। ମାତ୍ର ୧୬ ବର୍ଷ ବୟସରେ କାନାଡା ପକ୍ଷରୁ ଖେଳି କ୍ୟାରିୟର ଆରମ୍ଭ କରିଥିବା କ୍ରିଷ୍ଟିନେ ମହିଳା ଫୁଟ୍ବଲରେ ଜଣେ ନିୟମିତ ଗୋଲସ୍କୋରର। ଅଲିମ୍ପିକରେ ସେ ୧୧ଟି ଗୋଲ ଦେଇଛନ୍ତି। ସେହିଭଳି ୫ଟି ବିଶ୍ୱକପ୍ରେ ଗୋଲସ୍କୋର କରିଥିବା ବିଶ୍ୱର ୨ ମହିଳା ଫୁଟ୍ବଲ ଖେଳାଳିଙ୍କ ମଧ୍ୟରୁ କ୍ରିଷ୍ଟିନେ ଅନ୍ୟତମ। ତାଙ୍କ ନାମରେ ୨ଟି ଅଲିମ୍ପିକ ବ୍ରୋଞ୍ଜ ପଦକ ମଧ୍ୟ ରହିଛି। ଫୁଟ୍ବଲରେ ଉଲ୍ଲେଖନୀୟ ଅବଦାନ ଲାଗି ୨୦୧୨ରେ ତାଙ୍କୁ ‘ଅର୍ଡର ଅଫ୍ କାନାଡା’ ସମ୍ମାନରେ ସମ୍ମାନିତ କରାଯାଇଥିଲା।
ଅନ୍ତର୍ଜାତୀୟ ପୁରୁଷ ଫୁଟ୍ବଲରେ ଇରାନର ଅଲି ଡେଇଙ୍କ ନାମରେ ବିଶ୍ୱରେ ସର୍ବାଧିକ ଗୋଲସ୍କୋର ରେକର୍ଡ ରହିଛି। ସେ ୧୪୯ ମ୍ୟାଚ୍ରେ ୧୦୯ ଗୋଲସ୍କୋର କରି ତାଲିକାର ସର୍ବାଗ୍ରେ ରହିଛନ୍ତି। ଏହି ତାଲିକାରେ କ୍ରିଷ୍ଟିଆନୋ ରୋନାଲ୍ଡୋ (୯୯ ଗୋଲ) ଦ୍ୱିତୀୟ ଏବଂ ଭାରତର ସୁନୀଲ ଛେତ୍ରୀ (୭୨) ୧୦ମ ସ୍ଥାନରେ ରହିଛନ୍ତି।
