ମୁମ୍ବାଇ: ଜୁନ୍ ୫ରେ ରିଲିଜ୍ ହେବାକୁ ଯାଉଛି କାଟ୍ରିନା କୈଫ୍ ଅଭିନୀତ ବଲିଉଡ୍ ଚଳଚ୍ଚିତ୍ର ‘ଭାରତ’। ଏଥିଲାଗି ତାଙ୍କ ଆଖିରେ ନିଦ ନ ଥିବା କାଟ୍ରିନା କହିଛନ୍ତି। ରାତି ତମାମ୍ ଉଜାଗର ରହି ଚଳଚ୍ଚିତ୍ରରେ ତାଙ୍କ ଅଭିନୟକୁ ଦର୍ଶକ କିପରି ଗ୍ରହଣ କରିବେ, ସେ କଥା ଭାବୁଥିବା ସେ କହିଛନ୍ତି। ସଲ୍ମାନ୍ଙ୍କ ସହ ଅଭିନୟକୁ ଲୋକମାନେ କେମିତି ନେବେ ଓ ତାଙ୍କ ଅଭିନୟର ଯାଦୁ ଦର୍ଶକଙ୍କ ମନକୁ ଛୁଇଁବ କି ନାହିଁ, ତାକୁନେଇ କାଟ୍ରିନା ଏବେ ପୂରା ଚିନ୍ତାରେ ଅଛନ୍ତି। ଏହି ଚଳଚ୍ଚିତ୍ରରେ ଅନ୍ୟମାନଙ୍କ ମଧ୍ୟରେ ଅଛନ୍ତି ତବୁ, ଦିଶା ପଟାନି ଓ ଜ୍ୟାକି ଶ୍ରଫ୍। ବକ୍ସ ଅଫିସ୍ରେ ‘ଭାରତ’ ସଫଳ ହେବ ବୋଲି କୁହାଯାଉଥିବାବେଳେ ସବୁକିଛି ଦର୍ଶକଙ୍କ ଉପରେ ନିର୍ଭର କରେ ବୋଲି କାଟ୍ରିନା କହିଛନ୍ତି। ପ୍ରତିଟି ଶଟ୍ ନିଖୁଣ ରହିଛି ଓ ଏହି ଚଳଚ୍ଚିତ୍ର ହିଟ୍ ହେବ ବୋଲି ଆଶା ରଖିଥିବା ସେ ପ୍ରକାଶ କରିଛନ୍ତି। ଅଲୀ ଅବ୍ବାସ ଜାଫର୍ ନିର୍ଦ୍ଦେଶିତ ଓ ଅଲଭିରା ଖାନ୍ ଅଗ୍ନିହୋତ୍ରୀ ପ୍ରଯୋଜିତ ‘ଭାରତ’ ଭଲ ଫଳ ଆଣିଦେବ ବୋଲି ଆଶା କରାଯାଉଛି। ପ୍ରକାଶଥାଉ କି, କାଟ୍ରିନା ତାଙ୍କ ପରବର୍ତ୍ତୀ ଚଳଚ୍ଚିତ୍ର ‘ସୂର୍ଯ୍ୟବଂଶୀ’ରେ ଅକ୍ଷୟ କୁମାରଙ୍କ ସହ ଆସୁଛନ୍ତି।
