ଭୁବନେଶ୍ୱର, ୨୪ା୧୨(ବ୍ୟୁରୋ): ଓଡ଼ିଶା ରାଜ୍ୟ କାଜୁ ଉନ୍ନୟନ ନିଗମ ଏବଂ କେନ୍ଦ୍ର କାଜୁ ଓ କୋକା ନିର୍ଦ୍ଦେଶାଳୟର ମିଳିତ ଆନୁକୂଲ୍ୟରେ ଜାତୀୟ ସ୍ତରୀୟ ପ୍ରଶିକ୍ଷଣ ଶିବିର ସୋମବାର ଇମେଜ ପରିସରରେ ଉଦ୍ଘାଟିତ ହୋଇଯାଇଛି। ଏହି କର୍ମଶାଳାକୁ କୃଷି ଓ କୃଷକ ସଶକ୍ତୀକରଣ ବିଭାଗ ପ୍ରମୁଖ ଶାସନ ସଚିବ ସୌରଭ ଗର୍ଗ ମୁଖ୍ୟଅତିଥି ଭାବେ ଯୋଗଦେଇ ଉଦ୍ଘାଟନ କରିଥିଲେ। ଓଡ଼ିଶା ରାଜ୍ୟ କାଜୁ ଉନ୍ନୟନ ନିଗମ ଅଧ୍ୟକ୍ଷ ଅମରେନ୍ଦ୍ର ଦାସ ଯୋଗଦେଇ କହିଥିଲେ ଯେ, ରାଜ୍ୟର ବିଭିନ୍ନ ଅଞ୍ଚଳରେ କାଜୁ ଉତ୍ପାଦନ ପାଇଁ ଭଲ ମାଟି ଓ ପାଣିପାଗ ରହିଛି। କାଜୁବାଦାମ ଚାରା ରୋପଣ ଓ ଉତ୍ପାଦନରେ ସାରା ଭାରତରେ ଓଡ଼ିଶା ତୃତୀୟ ସ୍ଥାନରେ ରହିଛି ବୋଲି ସେ କହିଛନ୍ତି। ଅନ୍ୟମାନଙ୍କ ମଧ୍ୟରେ ନିଗମ ପରିଚାଳନା ନିର୍ଦ୍ଦେଶକ ସଦାନନ୍ଦ ନାୟକ, କେନ୍ଦ୍ର କାଜୁ ଓ କୋକା ନିର୍ଦ୍ଦେଶାଳୟର ନିର୍ଦ୍ଦେଶକ ଭି.ଏନ୍. ହୁବାଲି, କାଜୁ ବିଶେଷଜ୍ଞ ପ୍ରଫେସର ପି.ସି. ଲେଙ୍କା ଉପସ୍ଥିତ ଥିଲେ। ୪ ଦିନ ଧରି ଚାଲିବାକୁ ଥିବା ଏହି କର୍ମଶାଳାରେ ୯ ରାଜ୍ୟରୁ ପ୍ରାୟ ୫୦ କୃଷି ଓ ଉଦ୍ୟାନ ଅଧିକାରୀମାନେ ଯୋଗଦେଇଛନ୍ତି। ଏହି ଶିବିରରେ କାଜୁ ଚାଷର ଉନ୍ନତି, ଅଧିକ ଅମଳକ୍ଷମ କାଜୁ ଉତ୍ପାଦନ, ଆଧୁନିକ ବୈଜ୍ଞାନିକ ପଦ୍ଧତିରେ ରୋଗପୋକ ନିୟନ୍ତ୍ରଣ ଓ କାଜୁ ଚାଷର ପ୍ରଚାର ପ୍ରସାର ତଥା ଲଙ୍କାଆମ୍ବର ପ୍ରକ୍ରିୟାକରଣ ଉପରେ ଜ୍ଞାନକୌଶଳ ପ୍ରଶିକ୍ଷଣ ଦିଆଯିବ। ଏହାଦ୍ୱାରା ରାଜ୍ୟ ତଥା ଦେଶରେ କାଜୁ ଉତ୍ପାଦନ ବୃଦ୍ଧି ହେବାରେ ସହାୟକ ହେବ।
