କଟକ ଅଫିସ,୧୦ା୬: ଲକ୍ଡାଉନ ମଧ୍ୟରେ ବାନ୍ଧି ହୋଇ ଯାଇଛି କଳା ଜଗତ ଓ କଳାକାରଙ୍କ ଜୀବନ ଜୀବିକା। କଳା ଜଗତକୁ ବଞ୍ଚାଇବା ନିମନ୍ତେ ସରକାରୀ ସହାୟତା ମିଳିବା ଉଚିତ ବୋଲି ବିଭିନ୍ନ ବର୍ଗରୁ ଦାବି ହେଉଛି। ରାଜ୍ୟର ଅନେକ ବରିଷ୍ଠ କଳାକାର ମଧ୍ୟ ସୋସିଆଲ ମିଡ଼ିଆରେ ଏ ନେଇ ପୋଷ୍ଟ କରୁଥିବା ଦେଖିବାକୁ ମିଳୁଛି। ତେବେ ଏଭଳି ଘଡ଼ିିସନ୍ଧି ମୁହୂର୍ତ୍ତରେ କଳାକାରଙ୍କ ପ୍ରତି ସହାୟତାର ହାତ ବଢ଼ାଇଛନ୍ତି ଓଡ଼ିଶାର ପ୍ରସିଦ୍ଧ ପ୍ରଚ୍ଛଟପଟ୍ଟ କଣ୍ଠଶିଳ୍ପୀ ହ୍ୟୁମାନ ସାଗର। ଓଡ଼ିଶା ମେଲୋଡ଼ି ଆସୋସିଏଶନ (ଓଏମ୍ଏ) ସହ ଅନୁବନ୍ଧିତ ରାଜ୍ୟର ବିଭିନ୍ନ ମେଲୋଡ଼ି ଗ୍ରୁପର ୫୦୦ କଳାକାରଙ୍କୁ ସେ ଆର୍ଥିକ ସହାୟତା ପ୍ରଦାନ କରିଛନ୍ତି। ମାଣିକଘୋଷ ବଜାରସ୍ଥିତ ମାରୱାଡ଼ି କ୍ଲବ ପରିସରରେ ବୁଧବାର ଓଏମ୍ଏ ପକ୍ଷରୁ ଉକ୍ତ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ଏସିପି ସେଖ୍ ସରିଫୁଦ୍ଦିନ, ସଞ୍ଜୟ ଶର୍ମା, ସାନୁ ରଥ, ସମ୍ପତ୍ତି ମୋଦି ପ୍ରମୁଖ ଅତିଥି ଭାବେ ଯୋଗଦେଇଥିଲେ। ଓଏମ୍ଏର ସଭାପତି ନିଲୁ ମହାନ୍ତି, ସମ୍ପାଦକ ଶ୍ୟାମ କୁମାର ନାୟାର, ପ୍ରଭାତ ରଞ୍ଜନ ବୋଷ, ପ୍ରଦୀପ ମହାପାତ୍ର, ବିରେନ୍ଦ୍ର କୁମାର ଦାସ, ବବଲୁ ଅନସାରୀ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ। ଏଭଳି କାର୍ଯ୍ୟକ୍ରମ ଅନ୍ୟମାନଙ୍କ ପାଇଁ ପ୍ରେରଣାଦାୟକ ବୋଲି ମତ ପ୍ରକାଶ ପାଇଥିଲା। ସଙ୍ଗୀତ ନିର୍ଦ୍ଦେଶକ ମହମ୍ମଦ ଆବିଦ କହିଛନ୍ତି, କରୋନା ଯୋଗୁ ପର୍ବପର୍ବାଣି, ଉତ୍ସବ ସବୁ ବନ୍ଦ। ଏଣୁ ମେଲୋଡ଼ି ହେବାର ଆଶା ନାହିଁ। କଟକଣା କେବେ ଉଠିବ ଓ କଳାକାରମାନେ ରୋଜଗାରର ବାଟ ପାଇବେ ତାହାକୁ ସମସ୍ତେ ଚାହିଁ ରହିଛନ୍ତି। ହ୍ୟୁମାନଙ୍କ ଏହି ଅବଦାନକୁ କଳାକାର ଜଗତ ସବୁଦିନ ପାଇଁ ମନେ ରଖିବ। ସେହିପରି ପୁରୀରୁ ଆସିଥିବା ଏକ ମେଲୋଡ଼ି ଗ୍ରୁପ୍ର ବାଦକ ସୁନୀଲ ରାଓ କହିଛନ୍ତି, ମେଲୋଡ଼ି ପ୍ରୋଗ୍ରାମ ହେଲେ କିଛି ଅର୍ଥ ରୋଜଗାର ହୁଏ। ରୋଜଗାରର ଅନ୍ୟ କିଛି ପନ୍ଥା ନାହିଁ। ମାତ୍ର ଏବେ କରୋନା ପାଇଁ ସବୁ ବନ୍ଦ। ଏଭଳି ସମୟରେ ହ୍ୟୁମାନ ସାଗରଙ୍କ ଏହି ସହାୟତା ଏକ ପ୍ରଶଂସନୀୟ ପଦକ୍ଷେପ।
