ଧାମନଗର,୧୧।୨(ଡି.ଏନ.ଏ.)- ଭଦ୍ରକ ଜିଲା ଧାମନଗର ବ୍ଲକ ବୟାଙ୍ଗଡିହି ପଞ୍ଚାୟତରେ କଲ୍ୟାଣ ମଣ୍ଡପ ନିର୍ମାଣ ଆରମ୍ଭ ହେବାକୁ ଥିବାବେଳେ ସ୍ଥାନ ନିରୂପଣ ନେଇ ବିବାଦ ସୃଷ୍ଟି ହୋଇଛି। ଏ ନେଇ ପୂର୍ବତନ ସରପଞ୍ଚ ସୁରଜିତ ପାତ୍ର ଶତାଧିକ ଦସ୍ତଖତ ସମ୍ବଳିତ ଦାବିପତ୍ର ଜିଲାପାଳ ଓ ଜିଲା ପ୍ରକଳ୍ପ ଅଧିକାରୀଙ୍କୁ ପ୍ରଦାନ କରିଛନ୍ତି। ଶିଳାନ୍ୟାସ ସ୍ଥାନରେ କଲ୍ୟାଣ ମଣ୍ଡପ ନିର୍ମାଣ ପାଇଁ ସେ ଦାବି ଜଣାଇଛନ୍ତି। ଜିଲା ପ୍ରଶାସନ ଏହାର ତଦନ୍ତ ପାଇଁ ବିଡିଓଙ୍କୁ ଚିଠି ମଧ୍ୟ କରିଛନ୍ତି। ନିର୍ମାଣ କାର୍ଯ୍ୟର ଅଗ୍ରଗତି ହେଲେ କୋର୍ଟଙ୍କ ଦ୍ୱାରସ୍ଥ ହେବେ ବୋଲି ସ୍ଥାନୀୟ ଲୋକେ ଚେତାବନୀ ଦେଇଛନ୍ତି।
ଉଲ୍ଲେଖନୀୟ ଯେ, ୨୦୧୬ରେ ତତ୍କାଳୀନ ବିଧାୟକ ମୁକ୍ତିକାନ୍ତ ମଣ୍ଡଳ ପଞ୍ଚାୟତବାସୀଙ୍କ ସୁବିଧା ଦୃଷ୍ଟିରୁ ମଧ୍ୟବର୍ତ୍ତୀ ସ୍ଥାନ ବୟାଙ୍ଗଡିହି ଗ୍ରାମର ପ୍ରଧାନମନ୍ତ୍ରୀ ସଡ଼କ ଯୋଜନାରେ ମୁଖ୍ୟରାସ୍ତାକୁ ଲାଗି ଥିବା ଏକ ଜମିରେ କଲ୍ୟାଣ ମଣ୍ଡପର ଶିଳାନ୍ୟାସ କରିଥିଲେ। ସେତେବେଳର ସରପଞ୍ଚଙ୍କ ଉଦ୍ୟମରେ ଧାମନଗର ତହସିଲଦାରଙ୍କ ଜରିଆରେ ୩୨୪୨ ଚିଠି ଅନୁସାରେ ଶିଳାନ୍ୟାସ କରାଯାଇଥିବା ଜମିକୁ ତହସିଲଦାର କଲ୍ୟାଣ ମଣ୍ଡପ ନାମରେ ଦେଇଥିଲେ। ସେତେବେଳେ ରକ୍ଷିତ କିସମରୁ ୧୨ ଡିସିମିଲ ଜାଗା ତହସିଲଦାର କଲ୍ୟାଣ ମଣ୍ଡପ ନାମରେ ହସ୍ତାନ୍ତର କରିଥିଲେ। ପଞ୍ଚାୟତରେ ଏକ ଫାଇଲ ଖୋଲାଯାଇ ତହସିଲଦାର ବିଭାଗୀୟ କନିଷ୍ଠ ଯନ୍ତ୍ରୀଙ୍କୁ ମଧ୍ୟ ଜମି ଯୋଗାଇ ଦେଇଥିଲେ। ଏହାପରେ ପୂର୍ବତନ ବିଧାୟକ ମଣ୍ଡଳ, ବିଭାଗୀୟ ଆସିଷ୍ଟାଣ୍ଟ ଇଞ୍ଜିନିୟର ଏବଂ କନିଷ୍ଠ ଯନ୍ତ୍ରୀଙ୍କ ଉପସ୍ଥିତିରେ ଶିଳାନ୍ୟାସ କରାଯାଇଥିଲା। କିନ୍ତୁ ଏବେ କଲ୍ୟାଣ ମଣ୍ଡପ କାର୍ଯ୍ୟ ଆରମ୍ଭ ସମୟରେ ସ୍ଥାନ ବଦଳାଇ ଆମ୍ବିଳି ଗଁା ନିକଟରେ କାର୍ଯ୍ୟ ଆରମ୍ଭକୁ ନେଇ ପଞ୍ଚାୟତରେ ଅସନ୍ତୋଷ ପ୍ରକାଶ ପାଇଛି। ଶିଳାନ୍ୟାସ ସ୍ଥାନକୁ ଲାଗି ୯ଟି ଓ୍ବାର୍ଡରେ ବହୁ ଜନସାଧାରଣ ବସବାସ କରୁଥିବାବେଳେ ନିର୍ମାଣ ଆରମ୍ଭ ସ୍ଥାନ ନିକଟରେ ମାତ୍ର ୬ଟି ଓ୍ବାର୍ଡ ରହିଛି। ଏହା ଏକପାଖିଆ ହେବା ସହିତ ପଞ୍ଚାୟତର ସୀମାରେ ହୋଇଥିବାରୁ ଅଧିକାଂଶ ଲୋକେ ସେବା ପାଇବାରୁ ବଞ୍ଚିତ ହେବେ ବୋଲି ଅଭିଯୋଗ ହେଉଛି। ଏ ସମ୍ପର୍କରେ ବିଡିଓ ଦୁର୍ଗାଚରଣ ମୁର୍ମୁଙ୍କୁ ଯୋଗାଯୋଗ କରିବାରୁ ଉକ୍ତ ପଞ୍ଚାୟତରେ କଲ୍ୟାଣ ମଣ୍ଡପ ନିର୍ମାଣ ନେଇ ବିବାଦ ସୃଷ୍ଟି ହେଉଥିବା ସେ ସ୍ବୀକାର କରିଛନ୍ତି। ଲୋକକଲ୍ୟାଣ ଯୋଜନାରେ ସର୍ବସାଧାରଣଙ୍କ ସୁବିଧା ଦେଖିବାକୁ ପଡ଼ିବ। ଏହା ତଦନ୍ତସାପେକ୍ଷ ବୋଲି ସେ କହିଛନ୍ତି।
