ବେଙ୍ଗାଲୁରୁ,୨୭।୭: କର୍ନାଟକ ବିଧାନସଭାକୁ ମିଳିଛି ନୂଆ ମୁଖ୍ୟମନ୍ତ୍ରୀ। ଏବେ ଏଠାରେ ରାଜନୈତିକ ପରିବେଶ ବେଶ୍ ସରଗରମ। ତେଣୁ ବିଧାନସଭା ପରିସରରେ ୧୪୪ ଧାରା ଜାରି କରାଯିବ ବୋଲି ଶନିବାର ଘୋଷଣା କରାଯାଇଛି। ବିଧାନସଭାର ୨ କିଲୋମିଟର ମଧ୍ୟରେ ଆସନ୍ତା ୨୯ ଜୁଲାଇ ସକାଳ ୬ଟାରୁ ୩୦ ଜୁଲାଇ ମଧ୍ୟ ରାତ୍ରି ପର୍ଯ୍ୟନ୍ତ ଏହା ଲାଗୁ କରାଯିବ ବୋଲି ପୋଲିସ କମିଶନର ଆଲୋକ କୁମାର ସୂଚନା ଦେଇଛନ୍ତି। ଏକାଥରେ ୫ ଜଣରୁ ଅଧିକ ବ୍ୟକ୍ତିଙ୍କୁ ଦେଖିଲେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ରହିଛି। ତେବେ ଆସନ୍ତା ୨୯ରେ ୟେଦୁରପ୍ପା ବିଧାନସଭାରେ ତାଙ୍କ ସଂଖ୍ୟା ଗରିଷ୍ଠତାର ପ୍ରମାଣ ଦେବାକୁ ଥିବା ବେଳେ ଏପରି ପଦକ୍ଷେପ ନିଆଯାଇଥିବା ଅନୁମାନ କରାଯାଉଛି। କାରଣ କଂଗ୍ରେସ ଜେଡିଏସ୍ ମେଣ୍ଟ ସରକାର ଭାଙ୍ଗିଯିବା ପରେ ନାଟକୀୟ ଢଙ୍ଗରେ ଏବେ ୟେଦୁରପ୍ପା କର୍ନାଟକର ଶାସନ ଦାୟିତ୍ୱ ନେଇଛନ୍ତି।
