ମୁମ୍ବାଇ: ବଲିଉଡ୍ ସିଙ୍ଗର କନିକା କପୁର କରୋନା ଭାଇରସ ଦ୍ୱାରା ସଂକ୍ରମିତ ହେବା ପରେ ପ୍ରତିଦିନ ତାଙ୍କ ସ୍ବାସ୍ଥ୍ୟକୁ ନେଇ କିଛି ନା କିଛି ଖବର ସାମ୍ନାକୁ ଅସୁଥିଲା। ସବୁଠାରୁ ବଡ କଥା ହେଲା ସେ ବିଦେଶରୁ ଫେରି କ୍ୱାରାଣ୍ଟାଇନରେ ନ ରହି କିଛି ପାର୍ଟିରେ ଯୋଗ ଦେଇଥିବାରୁ ଅନେକେ ତାଙ୍କୁ ଗାଳି ଦେଇଥିଲେ। ଏହା ତାଙ୍କର ଖାମଖିଆଲ ନୀତି ବୋଲି କେହି କେହି କହିଥିଲେ। ଯେବେ କନିକା କରୋନାରେ ସଂକ୍ରମିତ ଥିବା ଜଣାପଡିଥିଲା ସେତେବେଳେ ସେ ପୁରା ଭାଙ୍ଗି ପଡିଥିଲେ। ଏବେ ସେ ସମ୍ପୂର୍ଣ୍ଣ ସୁସ୍ଥ ହେବା ସହ ଲକ୍ଷ୍ନୌ ସ୍ଥିତ ଘରେ ନିଜ ପରିବାର ସହ କ୍ୱାଲିଟି ଟାଇମ୍ ସ୍ପେଣ୍ଡ କରୁଛନ୍ତି ବୋଲି ସୋସିଆଲ ମିଡିଆ ମାଧ୍ୟମରେ ଜଣାଇଛନ୍ତି। ସେ ଏବେ ଘରେ ଥିବା ବେଳେ ମାତାପିତାଙ୍କ ସହ ଆରାମରେ ବସି ଚା’ ପିଇବାର ଏକ ଫଟୋ କନିକା ନିକଟରେ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଶେୟାର କରିଛନ୍ତି। ତେବେ ସେ ସୁସ୍ଥ ହେବା ପରେ ପ୍ରଥମେ ଇନଷ୍ଟାଗ୍ରାମରେ ତାଙ୍କ କରୋନା ସଂକ୍ରମଣକୁ ନେଇ ଏକ ଲମ୍ବା ଚଉଡା ବାର୍ତ୍ତା ଲେଖିଥିଲେ। ସେ କେମିତି କରୋନାରେ ସଂକ୍ରମିତ ହେଲେ। ଏହାପରେ ଲୋକେ ତାଙ୍କୁ କେମିତି ଦୋଷାରୋପ କଲେ ସବୁକଥା ସେ ଉଲ୍ଲେଖ କରିଛନ୍ତି। ହେଲେ ଏଥିରେ ତାଙ୍କର କିଛି ଭୁଲ୍ ନ ଥିଲା ବୋଲି ସେ ସଫେଇ ଦେଇଛନ୍ତି। କାରଣ ବିମାନ ବନ୍ଦରରେ ତାଙ୍କର ଟେଷ୍ଟ କରାଯାଇ ନ ଥିଲା। ଏହାସହ ସେ କୌଣସି ପାର୍ଟି ମଧ୍ୟ ହୋଷ୍ଟ କରି ନ ଥିବା ସ୍ପଷ୍ଟ କରିଛନ୍ତି।
