କେନ୍ଦୁଝର,୧୫।୯(ସ୍ବ.ପ୍ର.): କମ୍ପ୍ୟୁଟର ଶିକ୍ଷକ ନିଯୁକ୍ତି ନାମରେ ଠକେଇ ମାମଲାରେ ଟାଉନ ଥାନା ପୋଲିସ ଓଡ଼ିଶା ଏଜୁକେଶନ ଆଣ୍ଡ ଟ୍ରେନିଂ (ଓଏଇଟି) ନାମକ ଏକ କମ୍ପ୍ୟୁଟର ସଂସ୍ଥାର ୩ ଜଣଙ୍କୁ ରବିବାର ଅଟକ ରଖି ପଚରା ଉଚରା କରୁଥିବା ଜଣାପଡ଼ିଛି। କମ୍ପ୍ୟୁଟର ତାଲିମ ନେବା ପରେ ବିଭିନ୍ନ ହାଇସ୍କୁଲ ଓ ଏମ୍ଇ ସ୍କୁଲରେ ଶିକ୍ଷକ ନିଯୁକ୍ତି ଦେବାକୁ କହି ପ୍ରତ୍ୟେକ ପିଲାଙ୍କ ଠାରୁ ୪୦ହଜାର ଟଙ୍କା ଆଦାୟ କରିଥିବା ସଂସ୍ଥା ବିରୋଧରେ କ୍ଷତିଗ୍ରସ୍ତ ଯୁବତୀ/ଯୁବକମାନେ ସ୍ଥାନୀୟ ଟାଉନ ଥାନାରେ ଲିଖିତ ଏତଲା ଦେବା ପରେ ପୋଲିସ ଏମାନଙ୍କୁ ଅଟକ ରଖିଛି।
ଅଭିଯୋଗ ଅନୁଯାୟୀ,୨୦୧୬ ଡିସେମ୍ବର ୨୫ରେ ପ୍ରଥମ ବ୍ୟାଚ୍ ମୟୂରଭଞ୍ଜ ଜିଲା କରଡିଆ ଶାଖା, କରିଆରେ ସେମାନଙ୍କୁ ତାଲିମ ଦିଆଯାଇଥିଲା। ଦ୍ୱିତୀୟ ବ୍ୟାଚ୍ ଫ୍ୟୁଚର ବିଦ୍ୟାର୍ଥୀ, ବଣିଆପାଟ, କେନ୍ଦୁଝର ସହରରେ ତାଲିମ ଦିଆଯାଇଥିଲା। ଅଲ୍ ଇଣ୍ଡିଆ ଆଇଟି ଆସୋସିଏଶନରୁ ଫ୍ରାଞ୍ଚାଇଜ୍ ଆଣି ଏହି ଓଇଏଟି ସଂସ୍ଥା ଚାଲିଥିଲା।ଏହି ସଂସ୍ଥାର ମାଲିକ ଅମୂଲ୍ୟ କୁମାର ମହାନ୍ତି(ଏମ୍ଡି), ମଳୟ କୁମାର ପାତ୍ର ( ନିର୍ଦ୍ଦେଶକ), ଜଗଦା ରଞ୍ଜନ ପାତ୍ର, ରବି ନାରାୟଣ ମହାନ୍ତ(ଆକାଉଣ୍ଟାଣ୍ଟ)ଥିବା ଅଭିଯୋଗ କରିଛନ୍ତି। ପ୍ରତ୍ୟେକ ଯୁବତୀ/ଯୁବକଙ୍କ ଠାରୁ ୪୦ ହଜାର ଟଙ୍କା ଲେଖାଏ ଆଦାୟ କରିଥିବା ଅଭିଯୋଗ ହୋଇଛି। ଏ ବାବଦକୁ ୩୦ ହଜାର ଟଙ୍କାର ରସିଦ ଦେଇଥିବା ବେଳେ ଅବଶିଷ୍ଟ ଟଙ୍କା ବିନା ରସିଦରେ ନେଇଥିବା ଅଭିଯୋଗ ହୋଇଛି। କିଛି ପିଲାଙ୍କୁ ଚାକିରି ଦେଇ ନ ପାରିବାରୁ ସେମାନେ କୋର୍ଟର ଆଶ୍ରୟ ନେଇଥିଲେ। ପରେ ୧୩ ଅକ୍ଟୋବରରେ ଚେକ୍ ପ୍ରଦାନ କରାଯାଇଥିଲେ ହେଁ ଏହି ଚେକରେ ଟଙ୍କା ଉଠାଯାଇ ପାରି ନ ଥିଲା ବୋଲି ସେମାନେ ଅଭିଯୋଗ କରିଛନ୍ତି। ଏଣୁ ଏହା ଏକ ବଡ଼ ଧରଣର ଠକେଇ କରାଯାଇଥିବାରୁ ଟଙ୍କା ଜମା ଦେଇଥିବା ଯୁବତୀ/ଯୁବକମାନେ ରବିବାର ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି। ଫଳରେ ଉକ୍ତ ସଂସ୍ଥାର ୩ ଜଣଙ୍କୁ ଅଟକ ରଖାଯାଇ ପଚରାଉଚରା କରାଯାଉଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଟାଉନ ଥାନାଧିକାରୀ ସୋମନାଥ ଜେନା କହିଛନ୍ତି।
