ନୂଆଦିଲ୍ଲୀ,୨୩-୭: ଗୁଜରାଟ, କର୍ନାଟକ, ତାମିଲନାଡୁ ଓ ଆନ୍ଧ୍ରପ୍ରଦେଶ ୨୦୧୮-୧୯ରେ ନିଜ ରାଜ୍ୟର ମତ୍ସ୍ୟଜୀବୀଙ୍କୁ ସର୍ବାଧିକ ସବ୍ସିଡି ପ୍ରଦାନ କରିଛନ୍ତି। ତେବେ ଓଡ଼ିଶା ଏହାର ମତ୍ସ୍ୟଜୀବୀଙ୍କୁ ମାତ୍ର ୩ କୋଟି ଟଙ୍କା ସବ୍ସିଡି ପ୍ରଦାନ କରିିଥିବା ଭାରତ ପକ୍ଷରୁ ବିଶ୍ୱ ବାଣିଜ୍ୟ ସଂଗଠନ(ଡବ୍ଲ୍ୟୁଟିଓ)କୁ ସୂଚନା ଦିଆଯାଇଛି। ଏଥିରେ କୁହାଯାଇଛି ଯେ, ଉକ୍ତ ରାଜ୍ୟ ସମେତ ଏକାଧିକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ବିଭିନ୍ନ ଯୋଜନା ମାଧ୍ୟମରେ ସବ୍ସିଡି ପ୍ରଦାନ କରିଛନ୍ତି। ସେମାନଙ୍କର ସୁରକ୍ଷା, କିରୋସିନ, ନୌପରିବହନ ସହାୟତା, ହାଇସ୍ପିଡ୍ ଡିଜେଲରେ ବିକ୍ରି କର ପ୍ରତ୍ୟାହାର, ପରମ୍ପରାଗତ ଡଙ୍ଗାରେ ମୋଟର ଲଗାଇବା ଆଦି ଲାଗି ସବ୍ସିଡି ପ୍ରଦାନ କରାଯାଇଛି। ଭାରତ ପକ୍ଷରୁ ଡବ୍ଲ୍ୟୁଟିଓକୁ ପ୍ରଦାନ କରାଯାଇଥିବା ତଥ୍ୟ ଅନୁଯାୟୀ, ଗୁଜରାଟ, କର୍ନାଟକ, ତାମିଲନାଡୁ ଓ ଆନ୍ଧ୍ରପ୍ରଦେଶ ମତ୍ସ୍ୟଜୀବୀଙ୍କୁ କ୍ରମଶଃ ୨୪୭.୪ କୋଟି, ୨୪୩.୬ କୋଟି, ୧୮୦ କୋଟି ଏବଂ ୧୦୯ କୋଟି ଟଙ୍କାର ସବ୍ସିଡି ପ୍ରଦାନ କରିଛି। ଏହାଛଡ଼ା ମହାରାଷ୍ଟ୍ର ୫୪.୭ କୋଟି, କେରଳ ୪୧.୯ କୋଟି, ଗୋଆ ୧୬.୫ କୋଟି, ପଶ୍ଚିମବଙ୍ଗ ୮.୪ କୋଟି ଏବଂ ଓଡ଼ିଶା ୩.୩ କୋଟି ଟଙ୍କାର ସବ୍ସିଡି ମତ୍ସ୍ୟଜୀବୀଙ୍କୁ ଦେଇଛନ୍ତି। ସୂଚନାଥାଉ କି, ଭାରତ ଏହି ସବ୍ସିଡି ଦେବା ବନ୍ଦ କରୁ ବୋଲି ଆମେରିକା ସମେତ ବିଦେଶୀ ରାଷ୍ଟ୍ରଗୁଡ଼ିକ ଦାବି କରୁଛନ୍ତି। ଅନ୍ୟପକ୍ଷରେ ସ୍ବଳ୍ପ ଆୟକାରୀ ଚାଷୀ ଓ ମତ୍ସ୍ୟଜୀବୀଙ୍କ ପାଇଁ ସବ୍ସିଡି ପ୍ରଦାନ ଜାରି ରଖିବାକୁ ଭାରତ ଚାହୁଁଛି। ୧୯୯୫ରେ ଡବ୍ଲ୍ୟୁଟିଓର ସଦସ୍ୟ ହୋଇଥିବା ଭାରତ ପ୍ରତିବର୍ଷ ସବ୍ସିଡି ସମ୍ପର୍କରେ ଏହାକୁ ଜଣାଇଥାଏ।
