ବିଶ୍ୱରେ ଏମିତି ଏକ ଦେଶ ରହିଛି ଯେଉଁଠି ମନପସନ୍ଦର ପାର୍ଟନର ମିଳୁ ନ ଥିବାରୁ ଏଠାରେ ୪୭ ପ୍ରତିଶତ ଅବିବାହିତ ରହିଛନ୍ତି। ବିଶ୍ୱାସ ହେଉ ନ ଥିଲେ ମଧ୍ୟ ସତ। ଏମିତି ଅଜବ ସ୍ଥିତି ଦେଖିବାକୁ ମିଳିଛି ଜାପାନରେ। ଏକ ରିପୋର୍ଟରୁ ଜଣାପଡ଼ିଛି, ୧୮୯୯ ମସିହା ପରଠାରୁ ଏଠାରେ ବିବାହିତଙ୍କ ସଂଖ୍ୟା କମି କମି ଯାଉଛି। ଏକ ଅନ୍ଲାଇନ୍ ସର୍ଭେରୁ ଜଣାପଡ଼ିଛି, ୨୦ରୁ ୪୦ ବର୍ଷ ବୟସର ବ୍ୟକ୍ତିଙ୍କୁ ମନପସନ୍ଦର ପାର୍ଟନର ମିଳି ନ ଥିବାରୁ ଆଜିପର୍ଯ୍ୟନ୍ତ ଅବିବାହିତ ରହିଛନ୍ତି। ସେହିପରି ୨୯ ପ୍ରତିଶତ ପୁରୁଷ କୁହନ୍ତି, ସେମାନଙ୍କ ନିକଟରେ ପର୍ଯ୍ୟାପ୍ତ ଟଙ୍କା ନ ଥିବାରୁ ବିବାହ ହେବାକୁ ଇଚ୍ଛା କରୁନାହାନ୍ତି। ୩୧ ପ୍ରତିଶତ ମହିଳା କୁହନ୍ତି, ସେମାନେ ତାଙ୍କର ସ୍ବାଧୀନତା ହରାଇବାକୁ ଚାହଁୁନାହାନ୍ତି। ଫଳରେ ସିଙ୍ଗଲ ରହିଛନ୍ତି। ୨୦୧୮ରେ ଦେଶରେ ୯ ଲକ୍ଷ ୧୮ ହଜାର ୩୯୭ ପିଲା ଜନ୍ମ ନେଇଥିବାବେଳେ ୧୯୪୦ ଦଶକରେ ଏଠାରେ ୨୭ ଲକ୍ଷ ପିଲା ଜନ୍ମ ହୋଇଥିଲେ। ଫଳରେ ସରକାର ୨୦୨୬ରେ ପ୍ରଜନନ ସଂଖ୍ୟା ବୃଦ୍ଧି କରାଇବାକୁ ଲକ୍ଷ୍ୟ ରଖିଛନ୍ତି। ଜାପାନର ପ୍ରଧାନମନ୍ତ୍ରୀ ଶିଞ୍ଜୋ ଆବେ ଦେଶର ଜନସଂଖ୍ୟାକୁ ନେଇ ଚିନ୍ତିତ ଅଛନ୍ତି। ପିଲାଙ୍କ ସଂଖ୍ୟା ବଢ଼ାଇବା ପାଇଁ ପ୍ରୋତ୍ସାହନ କରିବାକୁ ପଡ଼ିବ। ଏଥିପାଇଁ ଦେଶରେ ସମସ୍ତ ଅବିବାହିତଙ୍କୁ ବିବାହ ବନ୍ଧନରେ ଆବଦ୍ଧ ନେଇ ସ୍ବତନ୍ତ୍ର ନୀତି ପ୍ରଣୟନ କରିବାକୁ ହେବ ବୋଲି ସେ କହିଛନ୍ତି।
