କଟକ ଅଫିସ, ୨୭ା୧୦: ଏସ୍ସିବି ମେଡିକାଲରେ ମୃତ୍ୟୁ ଘଟୁଥିବା ଅସହାୟ ଓ ଅପରିଚିତ ରୋଗୀଙ୍କୁ ନେଇ ପୁଣି ବିବାଦ ଉପୁଜିଛି। ଦୁଇଟି ଆରଟିଆଇ ତଥ୍ୟକୁ ନେଇ ସନ୍ଦେହ ସୃଷ୍ଟି ହୋଇଛି। ସାମାଜିକ କର୍ମୀ ଅଚ୍ୟୁତ କୁମାର ସାହୁ ୨୦୧୮ ଅକ୍ଟୋବର ଓ ୨୦୧୯ ଜୁଲାଇରେ ଏସ୍ସିବି ମେଡିକାଲରେ ଦୁଇଟି ପର୍ଯ୍ୟାୟରେ ମୃତ୍ୟୁ ଘଟିଥିବା ଅସହାୟ ଓ ଅପରିଚିତ ରୋଗୀଙ୍କ ମୃତଦେହ ସମ୍ପର୍କରେ ଜାଣିବାକୁ ଚାହିଁଥିଲେ। ୨୦୧୮ ଅକ୍ଟୋବରରେ ଆଦେବନକାରୀ ସାହୁ ୨୦୧୩ ଜାନୁୟାରୀ ପହିଲାରୁ ୨୦୧୫ ମଧ୍ୟରେ ତଥ୍ୟ ମାଗିବାରୁ ମେଡିକାଲ ପକ୍ଷରୁ କୁହାଯାଇଥିଲା ଯେ, ଏହି ସମୟ ମଧ୍ୟରେ ଏସ୍ସିବି ମେଡିକାଲରେ ୭୦ ଅପରିଚିତଙ୍କ ମୃତଦେହ ପୋତାଯାଇଛି। ମୃତଦେହକୁ ମେଡିକାଲ କଲେଜର ଆନାଟୋମି ବିଭାଗକୁ ଦିଆଯାଇଥିଲା। ସେଠାରେ ମେଡିକାଲ ଛାତ୍ରୀଛାତ୍ର ପାଠ ପଢିସାରିବା ପରେ ମୃତଦେହଗୁଡ଼ିକୁ ଗଭୀର ଗାତ ଖୋଳି ପୋତି ଦିଆଯାଇଛି। ତେବେ ଗୋଟିଏ ବି ମୃତଦେହ କୌଣସି ଘରୋଇ ମେଡିକାଲ କଲେଜକୁ ଦିଆଯାଇ ନ ଥିବା ଏହି ତଥ୍ୟରେ ମେଡିକାଲ ପକ୍ଷରୁ ଦର୍ଶାଯାଇଛି।
ଗତ ଜୁଲାଇରେ ସାହୁ ପୁନର୍ବାର ୨୦୧୬ରୁ ୨୦୧୮ ମଧ୍ୟରେ ଏହି ତଥ୍ୟ ମାଗିବାରୁ ମେଡିକାଲ ପକ୍ଷରୁ କୁହାଯାଇଛି ଯେ, ଏହି ସମୟ ମଧ୍ୟରେ ୫୪ଟି ମୃତଦେହ ମେଡିକାଲକୁ ମିଳିଥିଲା। ସେଥିରୁ ୨୦ଟି ମୃତଦେହ ଦାନ ଆକାରରେ ମିଳିଥିବାବେଳେ ବାକି ମୃତଦେହର କେହି ଦାବିଦାର ନ ଥିଲେ। ତେଣୁ ଏହି ସବୁ ମୃତଦେହକୁ ପୋଡି ଦିଆଯାଇଛି। ଏଥିରୁ ସ୍ପଷ୍ଟ ଯେ, ପୂର୍ବରୁ ପୋତା ଯାଉଥିବାବେଳେ ପରେ ପୋଡା ଯାଉଥିଲା। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ମେଡିକାଲର କେଉଁ ସ୍ଥାନରେ ମୃତଦେହକୁ ପୋତାଯାଇଛି ପଚରାଯିବାରୁ ମେଡିକାଲ ପକ୍ଷରୁ କୌଣସି ସୂଚନା ଦିଆଯାଇନାହିଁ। ଯାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରୁଛି ବୋଲି ସାମାଜିକ କର୍ମୀ ସାହୁ କହିଛନ୍ତି।
ଏସ୍ସିବି ମେଡିକାଲରେ ଅସହାୟ ରୋଗୀମାନଙ୍କୁ ମଣିଷ ଭଳି ବ୍ୟବହାର କରାଯାଉନାହିଁ। ଏଠାରେ ସେମାନଙ୍କ କ୍ଷେତ୍ରରେ ପ୍ରତି ମୁହୂର୍ତ୍ତରେ ମାନବାଧିକାର ଉଲ୍ଲଂଘନ କରାଯାଉଛି। ଏ ସମ୍ପର୍କରେ ସାହୁ ପୂର୍ବରୁ ଓଡ଼ିଶା ମାନବାଧିକାର କମିଶନ(ଓଏଚ୍ଆର୍ସି) ଓ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟରେ ମାମଲା ବିଚାରାଧୀନ ଥିବାବେଳେ ୨୦୧୮ ଜୁଲାଇ ୨୫ରେ ତତ୍କାଳୀନ ଓଏଚ୍ଆର୍ସି ଅଧ୍ୟକ୍ଷ ଜଷ୍ଟିସ ବୀରକିଶୋର ମିଶ୍ର ଏସ୍ସିବି ମେଡିକାଲକୁ ଆସି ଅସହାୟଙ୍କ ଦୁର୍ଦ୍ଦଶା ଦେଖିଥିଲେ। ତୁରନ୍ତ ସେମାନଙ୍କ ନିମନ୍ତେ ବ୍ୟବସ୍ଥା କରିବା ପାଇଁ ରାଜ୍ୟ ମୁଖ୍ୟ ଶାସନ ସଚିବଙ୍କ ସମେତ ଏସ୍ସିବି କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ। ମାତ୍ର ଇତିମଧ୍ୟରେ ଦେଢ଼ବର୍ଷ ବିତିଥିଲେ ମଧ୍ୟ ଏ କ୍ଷେତ୍ରରେ କୌଣସି ସମାଧାନ କରାଯାଇନାହିଁ। ଏ ସମ୍ପର୍କରେ ଏସ୍ସିବି ମେଡିକାଲ ଅଧୀକ୍ଷକ ପ୍ରଫେସର ଡା. ସିବିକେ ମହାନ୍ତି କୁହନ୍ତି, ପୋଲିସକୁ ମୃତଦେହ ହସ୍ତାନ୍ତର କରାଯାଇଥାଏ। ଅନେକ ମୃତଦେହକୁ ହରିଶ୍ଚନ୍ଦ୍ର ଯୋଜନାରେ ସଂସ୍କାର କରାଯାଉଛି। ସେହିପରି କେତେକ ମୃତଦେହକୁ ଆନାଟୋମି ବିଭାଗକୁ ପିଲାଙ୍କ ପାଠ ପଢ଼ିବା ପାଇଁ ହସ୍ତାନ୍ତର କରାଯାଉଛି। ସୂଚନାଥାଉ କି, ଅତୀତରେ ଏସ୍ସିବି ମେଡିକାଲରେ ମୃତଦେହରୁ ଆଖି ଗାଏବ ହେବା ଓ କଙ୍କାଳ ଚାଲାଣ ହେଉଥିବା ନେଇ ବିବାଦ ଉପୁଜିଥିଲା। ତେଣୁ ଏ କ୍ଷେତ୍ରରେ ଏକ ର଼୍ୟାକେଟ ମେଡିକାଲରେ କାର୍ଯ୍ୟ କରୁଥିବା ସାମାଜିକ କର୍ମୀ ସାହୁ କହିଛନ୍ତି।
