ହଂକଂ, ୨।୪(ଏଏଫ୍ପି): କରୋନା ଭାଇରସ ସଂକ୍ରମଣକୁ ଦୃଷ୍ଟିରେ ରଖି ଏସିଆନ ଫୁଟବଲ କନ୍ଫେଡେରେଶନ (ଏଏଫ୍ସି) ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରିଛି। ୨୦୨୭ ଏସିଆନ କପ୍ ଫୁଟବଲ ଟୁର୍ନାମେଣ୍ଟର ଆୟୋଜନ ନେଇ ପ୍ରିଲିମିନାରୀ ବିଡ୍ ଦାଖଲର ଡେଡ୍ ଲାଇନ୍ ତଥା ଶେଷ ତାରିଖକୁ ଘୁଞ୍ଚାଇବାକୁ ଏଏଫ୍ସି ନିଷ୍ପତ୍ତି ଗ୍ରହଣ କରିଛି। ଏଥିପାଇଁ ମାର୍ଚ୍ଚ ୩୧ ଶେଷ ତାରିଖ ଥିଲା। ତେବେ ଏହାକୁ ୩ ମାସ ଅର୍ଥାତ୍ ଜୁନ୍ ୩୦କୁ ଘୁଞ୍ଚାଇ ଦିଆଯାଇଛି ବୋଲି ଗୁରୁବାର ଏଏଫ୍ସି ଘୋଷଣା କରିଛି।
କୋଭିଡ-୧୯ ମହାମାରୀର ରୂପ ନେଇଥିତ୍ବାରୁ ଆମକୁ ଏପରି ନିଷ୍ପତ୍ତି ନେବାକୁ ହେଲା ବୋଲି ଏଏଫ୍ସି କହିଛି। ଏହି ଭାଇରସ ଦ୍ୱାରା ବିଶ୍ୱର ପ୍ରାୟ ସବୁ ଦେଶ ପ୍ରଭାବିତ ହୋଇଛନ୍ତି। ଏପରି ସ୍ଥଳେ ବିଡ୍ ଦାଖଲ ପ୍ରକ୍ରିୟା ବାଧାପ୍ରାପ୍ତ ହେବା ସ୍ବାଭାବିକ୍। ତାରିଖ ଘୁଞ୍ଚାଯାଇଥିବାରୁ ସଭ୍ୟ ଦେଶମାନେ ବିଡ୍ ଦାଖଲ ପାଇଁ ଆବଶ୍ୟକୀୟ ସମୟ ପାଇବେ। ଉଲ୍ଲେଖଥାଉ କି, ଚାଇନା ୨୦୨୩ରେ ପରବର୍ତ୍ତୀ ଏସିଆନ୍ କପ୍ ଆୟୋଜନ କରିବ। ତେବେ ୨୦୨୭ ଇଭେଣ୍ଟ ବିଡ୍ ଦାଖଲ ଦୌଡରେ ସୌଦୀ ଆରବ ସବୁଠାରୁ ଆଗରେ ଥିବା ପରି ମନେ ହେଉଛି। କରୋନା ଭାଇରସ୍ କାରଣରୁ ୨୦୨୩ ଏସିଆନ କପ୍ ପାଇଁ କ୍ୱାଲିଫାଇଙ୍ଗ୍ ଟୁର୍ନାମେଣ୍ଟଗୁଡିକୁ ସ୍ଥଗିତ ରଖାଯାଇଛି। ୨୦୨୨ ଫିଫା ବିଶ୍ୱକପ୍ ଏଥର କାତାରରେ ଆୟୋଜନ ହେବ। କାତାର ମଧ୍ୟ ୨୦୧୯ ଏସିଆନ୍ କପ୍ ଟାଇଟଲ ହାସଲ କରିଥିଲା। ଏଥିରେ ଅଂଶଗ୍ରହଣକାରୀ ଦଳ ସଂଖ୍ୟାକୁ ୧୬ରୁ ୨୪କୁ ବୃଦ୍ଧି କରାଯାଇଥିଲା।
