ମଣିଷପଣିଆ ଦେଖାଇବାକୁ ଟଙ୍କା, ପଇସା ଦରକାର ନାହିଁ । ଏହାକୁ ବିନା ମୂଲ୍ୟରେ ବି ଖର୍ଚ୍ଚ କରାଯାଇ ପାରେ । ଆଉ ଯିଏ ନିଜର ମଣିଷପଣିଆକୁ ଖୁସିରେ ଖର୍ଚ୍ଚ କରି ଶିଖିଛି, ସେ ହେଉଛି ପ୍ରକୃତ ମଣିଷ । ଅନ୍ୟକୁ ଟିକେ ସାହାର୍ଯ୍ୟ କରିବା ପରେ ବୋଧହୁଏ ଶାନ୍ତିରେ ନିଃଶ୍ୱାସ ନେଇ ହୁଏ, ସବୁ ଦୁଃଶ୍ଚିନ୍ତା ଦୂର ହୋଇଯାଏ । ନିଜର ମଣିଷପଣିଆକୁ ଖର୍ଚ୍ଚ କଲେ କିଛି କ୍ଷତି ନାହିଁ । ଏ କଥା କହିଛନ୍ତି କଟକ ମହିଳା ଥାନାରେ କାର୍ଯ୍ୟରତ ସବଇନିସପେକ୍ଟର (ଏସଆଇ ) ବର୍ଷା ମହାନ୍ତି । ଗୁରୁବାର ସନ୍ଧ୍ୟାରେ ବର୍ଷା ଜଣେ ବୃଦ୍ଧାଙ୍କୁ ବୁଝାଇସୁଝାଇ ଖୁଆଇ ଦେଉଥିବାର ଦୃଶ୍ୟ ଏବେ ସୋସିଆଲ ମିଡ଼ିଆରେ ଭାଇରାଲ ହେଉଛି । ଏହି ଘଟଣା ପରେ ଏସ୍ଆଇ ବର୍ଷାଙ୍କ ମାନବିକତାକୁ ନେଇ ସହରରେ ବେଶ ଚର୍ଚ୍ଚା ମଧ୍ୟ ଚାଲିଛି ।
କଟକ ଅଫିସ,୧୮।୪- ଖାକି ପୋଷାକ ଦେଖିଲେ ସାଧାରଣରେ ମନକୁ ଏକ ଭୟ ଆସେ । ଖାକି ପିନ୍ଧିବା ପରେ ପୋଲିସ ଯେପରି କର୍ତ୍ତବ୍ୟ ଭିତରେ ବାନ୍ଧି ହୋଇଯାଏ ବୋଲି କୁହାଯାଏ । ହେଲେ ଏହି ଘଡ଼ିସନ୍ଧି ମୂହୁର୍ତ୍ତରେ ମହିଳା ଥାନାରେ କାର୍ଯ୍ୟରତ ଏସ୍ଆଇ ବର୍ଷା ସମାଜ ପାଇଁ ଏକ ଭିନ୍ନ ବାର୍ତ୍ତା ଦେଇଛନ୍ତି । ଦରଘାବଜାର ଛକରେ ଜଣେ ପାଗେଳୀଙ୍କ ପାଖରେ ବସି ମା’ ବୋଲି ସମ୍ବୋଦନ କରି ତାଙ୍କୁ ଖୁଆଇ ଦେଉଥିବା ଘଟଣାକୁ ବିଭିନ୍ନ ବର୍ଗରୁ ପ୍ରଶଂସା କରାଯାଉଛି ।
ମର୍କତନଗର ଥାନା, ବାଦାମବାଡ଼ି ଥାନାରେ କାର୍ଯ୍ୟ କରିବା ପରେ ବର୍ଷା ଏବେ ମହିଳା ଥାନାରେ ନିଯୁକ୍ତ ହୋଇଛନ୍ତି । ଗୁରୁବାର ସନ୍ଧ୍ୟା ପ୍ରାୟ ୮:୩୦ ସମୟରେ ପୋଲିସ ପକ୍ଷରୁ ଦରଘାବଜାର ଅଞ୍ଚଳରେ ଖାଦ୍ୟ ବଣ୍ଟନ କରାଯାଉଥିଲା । ଏହି ସମୟରେ ରାସ୍ତା କଡ଼ରେ ବସିଥିବା ଜଣେ ବୃଦ୍ଧା ହଠାତ୍ ରାସ୍ତା ଉପରକୁ ଚାଲି ଆସିଥିଲେ । ଜଣେ ପୋଲିସ କର୍ମଚାରୀ ତାଙ୍କୁ ନେଇ ଖାଦ୍ୟ ପୁଡ଼ିଆ ଦେଇଥିଲେ । ହେଲେ ବୃଦ୍ଧା ଜଣଙ୍କ ଏହାକୁ ନ ଧରି ବିଚ୍ ରାସ୍ତା ଉପରେ ବସି ପଡ଼ିଥିଲେ । ତାଙ୍କ ଚାଲିଚଳନରୁ ସେ ଜଣେ ମାନସିକ ବିକୃତ ବୋଲି ଠଉରାଇଥିଲା ପୋଲିସ । ଏଣୁ କୌଣସି ପୋଲିସ କର୍ମଚାରୀ ତାଙ୍କ ପାଖକୁ ଯାଇ ନଥିଲେ । ହେଲେ ବର୍ଷା କିଛି ସମୟ ଦୂରରେ ରହି ଦେଖିବା ପରେ ବୃଦ୍ଧାଙ୍କ ନିକଟକୁ ଯାଇଥିଲେ । ବୃଦ୍ଧା ଖାଇବା ପାଇଁ କହିଥିଲେ ସୁଦ୍ଧା ସେ କିଛି ଉତ୍ତର ଦେଇ ନ ଥିଲେ । ବୃଦ୍ଧା ଜଣଙ୍କ ହିନ୍ଦୀ ଭାଷାରେ କଥାବାର୍ତ୍ତା କରୁଥିଲେ ବୋଲି ବର୍ଷା କୁହନ୍ତି । ବୃଦ୍ଧାଙ୍କ ପାଟିକୁ କିଛି ସମୟ ନିରେଖି ଦେଖିବା ପରେ ସେ ଭୋକିଲା ଅଛନ୍ତି ବୋଲି ବର୍ଷା ଅନୁଭବ କରିଥିଲେ । ଏହା ପରେ ବର୍ଷା ନିଜେ ଖାଦ୍ୟ ପୁଡ଼ିଆକୁ ଖୋଲି ବୃଦ୍ଧାଙ୍କ ପିଠି ଥାପୁଡ଼ାଇ ତାଙ୍କୁ ଖୁଆଇ ଦେଇଥିଲେ । ଅଳ୍ପ ଟିକେ ଖାଇବାକୁ ବୃଦ୍ଧା ଜଣଙ୍କ ଅନେକ ସମୟ ନେଇଥିଲେ ବୋଲି ବର୍ଷା କୁହନ୍ତି । ହେଲେ ତାଙ୍କୁ ଭୋକ ଲାଗୁଥିଲେ ସୁଦ୍ଧା ସେ ଆମ ହାତରୁ ଖାଇବାକୁ ଯେପରି ଅରାଜି ଥିଲେ ବୋଲି ବର୍ଷା କୁହନ୍ତି । ପରେ ପାଣି ବୋତଲ ଓ କିଛି ବିସ୍କୁଟ ପ୍ୟାକେଟ ବୃଦ୍ଧାଙ୍କୁ ଦେଇ ଘରକୁ ଫେରିଥିଲେ ଏସ୍ଆଇ ବର୍ଷା । ବୃଦ୍ଧାଙ୍କ ପ୍ରତି ତାଙ୍କର ଏହି ସହାନୁଭୂତି ସମ୍ପର୍କରେ ବର୍ଷା କୁହନ୍ତି, କିଛି ସମୟ ତାଙ୍କୁ ଦେଖିବା ପରେ ମନ ବିଚଳିତ ହୋଇଥିଲା । ଭୋକରେ ଥିଲେ ସୁଦ୍ଧା ସେ କାହିଁକି ପେଟପୁରା ଖାଇ ନ ଥିଲେ ନେଇ ମୋ ଭିତରେ ଅନେକ ପ୍ରଶ୍ନ ଆସୁଛି ବୋଲି ବର୍ଷା କୁହନ୍ତି । ସୂଚନା ଥାଉକି, ବର୍ଷାଙ୍କ ସ୍ବାମୀ ଜ୍ଞାନରଞ୍ଜନ ମହାପାତ୍ର ଭୁବନେଶ୍ୱର ଧଉଳିଥାନାର ଏସ୍ଆଇ ।
