ଟ୍ରାନ୍ସଜେଣ୍ଡରଙ୍କ ଜୀବନ ଜୀବିକା ଉପରେ ଯେଉଁ କେତେଜଣ ଚିନ୍ତା କରୁଛନ୍ତି, ସେମାନଙ୍କ ମଧ୍ୟରେ ରହିଛନ୍ତି ତାମିଲନାଡୁର ଆଇଏଏସ୍ ଅଧିକାରୀ ସନ୍ଦିପ ନନ୍ଦୁରି। ସେ ୩୦ ଜଣ ଟ୍ରାନ୍ସଜେଣ୍ଡରଙ୍କୁ ନେଇ କୋଭିପଟ୍ଟିରେ ଭାରତର ସର୍ବ ପ୍ରଥମ ମିଲ୍କ କୋଅପରେଟିଭ ସୋସାଇଟି ଗଠନ କରିଛନ୍ତି। ସନ୍ଦିପ ଏହି ଫାର୍ମକୁ ନିୟମିତ ବ୍ୟବଧାନରେ ନିରୀକ୍ଷଣ କରିବା ସହ ସେମାନଙ୍କୁ ପ୍ରୋତ୍ସାହିତ କରୁଛନ୍ତି। ଟ୍ରାନ୍ସଜେଣ୍ଡରମାନେ ଏଥିରୁ ଏବେ ମାସକୁ ୩ ଲକ୍ଷ ଟଙ୍କାର କାରବାର କରି ପ୍ରତ୍ୟେକେ ୮,୦୦୦ ଟଙ୍କା ରୋଜଗାର କରିବାକୁ ସକ୍ଷମ ହୋଇଛନ୍ତି। ଏହି ସୋସାଇଟିର ନାମ ରଖାଯାଇଛି ‘ମନ୍ଥିଥୋପେ ଟ୍ରାନ୍ସଜେଣ୍ଡର୍ସ ମିଲ୍କ ପ୍ରଡ୍ୟୁସର୍ସ୍ କୋଅପରେଟିଭ ସୋସାଇଟି’। ସନ୍ଦିପ ଥୁଥୁକୋଡ଼ି ଜିଲାର ଜିଲାପାଳ ଭାବେ ଦାୟିତ୍ୱ ନେବା ପରେ ଜିଲାରେ ପ୍ରାୟ ୨୫୦ ଟ୍ରାନ୍ସଜେଣ୍ଡରଙ୍କୁ ଠାବ କରି ସେମାନଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବା ଲାଗି ଏହି ସୋସାଇଟି ଆରମ୍ଭ କରିଥିଲେ। ଫାର୍ମରେ କାର୍ଯ୍ୟରତ ୩୦ ଜଣ ଟ୍ରାନ୍ସଜେଣ୍ଡରଙ୍କୁ ବି ପ୍ରାଣୀପାଳନ ବିଭାଗ ପକ୍ଷରୁ ପ୍ରଶିକ୍ଷଣ ଦିଆଯାଇଛି। ପ୍ରତ୍ୟେକଙ୍କୁ ଗୋଟିଏ ଲେଖା ଗାଈ ହିସାବରେ ୩୦ଟି ଗାଈ ଲାଗି ସେଣ୍ଟ୍ରାଲ କୋଅପରେଟିଭ ବ୍ୟାଙ୍କରୁ ଋଣ ଦିଆଯାଇଛି। କ୍ଷୀର ବିକ୍ରି କରିବା ପାଇଁ ଜିଲା ପ୍ରଶାସନ ଅଭିନ୍ନ ନାମକ ଏକ ମିଲ୍କ୍ ବ୍ରାଣ୍ଡ୍ ସହ ଚୁକ୍ତି କରିଛି। ସକାଳ ୬ଟାରୁ ଉଠି ସେମାନେ କାମରେ ଲାଗି ଯାଉଛନ୍ତି ଓ କ୍ଷୀର ଦୁହଁି ଅଭିନ୍ନକୁ ଦେଉଛନ୍ତି। ଯାହା ଆୟ ହୁଏ ,ତାହାକୁ ସୋସାଇଟି ଆକାଉଣ୍ଟରେ ଜମା କରାଯାଏ ଓ ପରେ ତାହାକୁ ସମାନ ଭାବେ ବାଣ୍ଟି ଦିଆଯାଏ।
