ଶିକ୍ଷାର ବିକାଶ ଲାଗି ସରକାର ଯାହା କରନ୍ତୁ ନା କାହିଁକି ଏଥିଲାଗି ମହାରାଷ୍ଟ୍ରର ଏକ ଗାଁର ପ୍ରୟାସ ନିଶ୍ଚିତ ପ୍ରଶଂସନୀୟ। ଓରଙ୍ଗାବାଦ ଜିଲାର ଗାଁ ପୋଖ୍ରୀର ଲୋକେ ଶିକ୍ଷାରେ ଉନ୍ନତି ଆଣିବା ଲାଗି ଏକ ଆଦର୍ଶଗତ ନିଷ୍ପତ୍ତି ନେଇ ଦେଶକୁ ଶିକ୍ଷା ବି ଦେଇଛନ୍ତି। ଗାଁରେ ଅନୁଷ୍ଠିତ ହେଉଥିବା ବିଭିନ୍ନ ଧାର୍ମିକ କାର୍ଯ୍ୟକ୍ରମର ଖର୍ଚ୍ଚ କାଟଛାଣ୍ଟ କରି ସେହି ଅର୍ଥକୁ ସ୍କୁଲ୍ର ବିକାଶରେ ବିନିଯୋଗ କରିବା ପାଇଁ ନିଷ୍ପତ୍ତି ନେଇଛନ୍ତି। ଏହି ସ୍କୁଲର ୦.୪୫ ଏକର ଜମି ରହିଛି। ପାଖାପାଖି ୨୪୦ ପିଲା ଏଠାରେ ପଢନ୍ତି। ପରିସରକୁ ବଢାଇବା ଲାଗି ସ୍କୁଲ ୨ ଏକର ଜମି କିଣିିବାକୁ ଯାଉଛି ବୋଲି କୁହନ୍ତି ଜିଲା ପରିଷଦ ସିଇଓ ପବନୀତ କୌର। ଏହି ଜମି କିଣି ଏହାକୁ ଏକ ଆନ୍ତର୍ଜାତିକସ୍ତରର ସ୍କୁଲ କରିବାକୁ ଗ୍ରାମବାସୀ ଯୋଜନା କରିଛନ୍ତି। ଏଥିପାଇଁ ସେମାନେ ତିନିମାସ ପୂର୍ବରୁ ଧାର୍ମିକ କାର୍ଯ୍ୟରେ ହେବାକୁ ଥିବା ଖର୍ଚ୍ଚକାଟ କରିବାର ନିଷ୍ପତ୍ତି ନେଇ ଗାଁରେ ଅନୁଷ୍ଠିତ ହେଉଥିବା ଭାଗବତ ସପ୍ତାହ ଓ ଅନ୍ୟ ଧାର୍ମିକ କାର୍ଯ୍ୟକ୍ରମରେ ଟେଣ୍ଟ ଓ ମିଠା ଲାଗି ରଖାଯାଇଥିବା ଖର୍ଚ୍ଚକୁ କମାଇ ଦେଇଛନ୍ତି। ଧାର୍ମିକ କାର୍ଯ୍ୟକ୍ରମରେ ପ୍ରସାଦସେବନର ବି ଏକ ନିଆରା ବ୍ୟବସ୍ଥା କରାଯାଇଛି। ଏଥିରେ ଗୋଟିଏ ଜାଗାରେ ଡାଲି କରାଯିବ ଓ ସମସ୍ତଙ୍କ ଘରୁ ରୋଟି ମଗାଯାଇ ଅଣାଯିବା ପରେ ସମସ୍ତେ ପ୍ରସାଦ ପାଇବେ। ଏହି ଉପାୟରେ ଯେତିକି ଟଙ୍କା ବଳିପଡିବ ତାହା ସ୍କୁଲପାଇଁ ବ୍ୟୟ କରାଯିବ।
