ଇଷ୍ଟ ଗୋଦାବରୀ,୨୫।୭: ଆନ୍ଧ୍ର ପ୍ରଦେଶର ପୂର୍ବ ଗୋଦାବରୀରୁ ଅପହୃତ ହୋଇଥିବା ୪ ବର୍ଷର ବାଳକ ଏନ୍ ଯଶହିତଙ୍କର ସନ୍ଧାନ ମିଳିଛି। ପୂର୍ବ ଗୋଦାବରୀର ମଣ୍ଡାପେଟା ସହରରେ ଗୁରୁବାର ପୋଲିସକୁ ମିଳିଥିବା ସୂଚନା ରହିଛି। ଯଶହିତଙ୍କ ଅପହରଣ ପରେ ୧୭ଟି ଟିମ୍ ତାଙ୍କୁ ଖୋଜିବା କାର୍ଯ୍ୟରେ ନିୟୋଜିତ ହୋଇଥିଲେ। ତେବେ ଅପହର୍ତ୍ତା ଗୁରୁବାର ଭୋର ସମୟରେ ଯଶହିତଙ୍କୁ ରାୟଭରମ ମଣ୍ଡଳରେ ଥିବା କୁଟୁକୁଲୁରୁ ଗାଁରେ ଛାଡି ଦେଇ ଚାଲି ଯାଇଥିଲେ। ସ୍ଥାନୀୟ ଲୋକେ ଯଶହିତଙ୍କୁ ଦେଖି ପୋଲିସକୁ ଖବର ଦେବା ପରେ ପୋଲିସ ତୁରନ୍ତ ସେଠାରେ ପହଞ୍ଚି ଶିଶୁଙ୍କୁ ଉଦ୍ଧାର କରିଥିଲା। ତେବେ କିଏ ଓ କାହିଁକି ୪ ବର୍ଷୀୟ ଯଶହିତଙ୍କୁ ଅପହରଣ କରିଥିଲେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ସୂଚନାଯୋଗ୍ୟ, ଯଶହିତ ସୋମବାର ତାଙ୍କ ଜେଜେମା’ଙ୍କ ସହ ବାହାରେ ବୁଲୁଥିବା ସମୟରେ କେହି ଅଜଣା ବ୍ୟକ୍ତି ତାଙ୍କୁ ଅପହରଣ କରି ନେଇଥିଲେ।
