ଆନନ୍ଦପୁର,୨୩।୯(ସ୍ବ.ପ୍ର.)- କେନ୍ଦୁଝର ଜିଲା ଆନନ୍ଦପୁର ପୌରପରିଷଦ ୭ ନଂ ଓ୍ବାର୍ଡର ରିଟେଲର୍ ସୁଦର୍ଶନ ରଣା(୫୪) ମାନବିକତାର ପରିଚୟ ଦେଇ ସମସ୍ତଙ୍କ ପାଇଁ ଉଦାହରଣ ପାଲଟିଛନ୍ତି। ସରକାରଙ୍କ ନିର୍ଦ୍ଦେଶନାମାକୁ ପାଳନ କରିବାକୁ ଯାଇ ରିଟେଲର୍ ଜଣକ କାନ୍ଧରେ ଯୋଗାଣ ସାମଗ୍ରୀ ଧରି ଓ୍ବାର୍ଡରେ ରହିଥିବା ଅକର୍ମଣ୍ୟ ଓ ଅସହାୟ ହିତାଧିକାରୀଙ୍କ ଘରକୁ ଯାଇ ବିତରଣ କରୁଥିବା ଦୃଶ୍ୟ ନଜରକୁ ଆସିଛି। ବିଭିନ୍ନ ସମୟରେ ସରକାରୀ ଖୁଚୁରା ବିକ୍ରୟ କେନ୍ଦ୍ରର ରିଟେଲରମାନଙ୍କ ଦ୍ୱାରା ହିତାଧିକାରୀମାନେ ଶୋଷଣର ଶିକାର ହେଉଥିବା ନେଇ ଖବର ଗଣମାଧ୍ୟମର ପୃଷ୍ଠାମଣ୍ଡନ କରିଆସୁଥିବାବେଳେ ସଂପୃକ୍ତ ରିଟେଲରଙ୍କ କାର୍ଯ୍ୟଶୈଳୀ ତଦାରଖ କରିବା ସମୟରେ ଏଭଳି ଘଟଣା ନଜରକୁ ଆସିଛି। ରିଟେଲର୍ ରଣାଙ୍କ ସରକାରୀ ଖୁଚୁରା ବିକ୍ରୟ କେନ୍ଦ୍ରରେ ପ୍ରାୟ ୧୩ ଜଣ ହିତାଧିକାରୀ ଶାରୀରିକ ଅକ୍ଷମ। ଖୁଚୁରା ବିକ୍ରୟ କେନ୍ଦ୍ରକୁ ଆସି ଯୋଗାଣ ସାମଗ୍ରୀ ନେବା ସେମାନଙ୍କ ପାଇଁ ଆସମ୍ଭବ। ତେଣୁ ସେମାନଙ୍କର ହକ ମୁତାବକ ଯୋଗାଣ ସାମଗ୍ରୀକୁ ସେମାନଙ୍କ ଘରେ ପହଞ୍ଚାଇବା ପାଇଁ ଦୀର୍ଘ ୨ବର୍ଷ ଧରି ରିଟେଲର ରଣା ଏହି ପ୍ରୟାସ ଜାରି ରଖିଥିବା କହିଛନ୍ତି। ସମ୍ପୃକ୍ତ ଘଟଣାକୁ ନେଇ ଉପଖଣ୍ଡ ଯୋଗାଣ ବିଭାଗ ଅଧିକାରୀ ବୁଦ୍ଧଦେବ ଜେନାଙ୍କୁ ପଚାରିବାରୁ ଏଥିନିମନ୍ତେ ବିଧିବଦ୍ଧ ଭାବେ ସରକାରଙ୍କ ପକ୍ଷରୁ କୌଣସି ନିର୍ଦ୍ଦେଶନାମା ନାହିଁ। ମାତ୍ର ସମ୍ପୃକ୍ତ ରିଟେଲର ଜଣକ ଯଦି ଏପରି କରୁଥାନ୍ତି ତା’ହେଲେ ଅତ୍ୟନ୍ତ ସ୍ବାଗତଯୋଗ୍ୟ ପଦକ୍ଷେପ ବୋଲି ସେ କହିଛନ୍ତି। ଅନ୍ୟପକ୍ଷରେ ଓ୍ବାର୍ଡରେ ଥିବା ଶାରୀରିକ ଅକ୍ଷମ ହିତାଧିକାରୀମାନେ ରିଟେଲରଙ୍କ ଏଭଳି କାର୍ଯ୍ୟକୁ ଭୂୟସୀ ପ୍ରଶଂସା କରିଛନ୍ତି। ସୂଚନାଯୋଗ୍ୟ, ସଂପୃକ୍ତ ରିଟେଲରଙ୍କ ଅଧୀନରେ ୪୬୫ ହିତାଧିକାରୀ ଯୋଗାଣ ସାମଗ୍ରୀ ନେଉଛନ୍ତି। ସେଥିମଧ୍ୟରୁ ଅନ୍ତ୍ୟୋଦୟ ଯୋଜନାରେ ୯୨ ଜଣ, ଅନ୍ନପୂର୍ଣ୍ଣା ଯୋଜନାରେ ୩ ଜଣ, ଅସହାୟ ହିତାଧିକାରୀ ୧୩ ଜଣ ରହିଛନ୍ତି। ପ୍ରତିମାସ ୭୦ରୁ ୮୦ କୁଇଣ୍ଟାଲ ପର୍ଯ୍ୟନ୍ତ ଉଭୟ ଚାଉଳ ଓ ଗହମ ସଂପୃକ୍ତ କେନ୍ଦ୍ରକୁ ଯୋଗାଇ ଦିଆଯାଉଛି। ରିଟେଲର୍ ରଣା ୧୯୮୯ ମସିହାରୁ ଆନନ୍ଦପୁର ପୌରପରିଷଦ ୭ନଂ ଓ୍ବାର୍ଡରେ ନିଜ କାର୍ଯ୍ୟ ଜାରି ରଖିଥିବାବେଳେ ଏଭଳି କାର୍ଯ୍ୟ କରିବାରେ ସେ ନିଜକୁ ଆତ୍ମସନ୍ତୋଷ ଲାଭ କରୁଥିବା କହିଛନ୍ତି।
